نبضات لا تعرف المستحيل ج2
ارتبك أنس من سؤالها المباشر، لكنه حاول ان يسيطر على نبرة صوته وضحك بسخرية: هاغير ليه؟ وعلي مين؟
لم تستطع ان تمنع ابتسامة مشاكسة ظهرت علي جانب شفتيها و همست و هي تسند ظهرها علي المقعد بارتياح: معرفش بس حسيت كده.
ازداد ارتباك أنس وهتف: يلا خلصي قهوتك علشان اوصاك عند عربيتك.
ابتسمت ليلي وهي تحتضن كوب القهوة بين يديها: القهوة لازم تتشرب بمزاج….. وطبعا انت استاذ في إنك تقتل المزاج الحلو.
غضبت ملامح انس، لكن نبرة صوته بقيت هادئة وقال بسخرية: اسف لو ضيعتلك المود الحلو اللي كان عاملهولك سيف.
همست ليلي بثقة وهي تضغط على كلماتها: سيف بالنسبالي كلاينت وبس.
رفع حاجبه: اه ماهو واضح.
رفعت ليلي حاجبها وهتفت بتحدي: ماخلاص بقي متزودهاش…… قولتلك كلاينت وبس و انا باعرف اوقف اي حد زي سيف ده عند حده.
صاح بعصبية: يعني هو حاول يضايقك؟
ابتسمت ليلي بثقة: ميقدرش…. انا بقولك إنه حتى لو عمل حاجة انا هاوقفه عند حدوده.
لانت ملامح انس وهتف: طيب خلصي قهوتك…. ولو سيف او غيره فكر يضايقك قوليلي.
ضحكت ليلي بسخرية وقالت: وانت بقي بتقنعني أنك مش زي صاحبك؟
نظر لها أنس بحدة: أنا مبقنعش حد بحاجة… أنا بس حبيت أنبهك.
في طريق العودة في السيارة…. كان الصمت سيد الموقف…. يقبض أنس علي مقود السيارة بيد واحدة بعنف، ويده الأخرى يضعها فوق جبهته وكأنه يفكر في شيء…. بينما ليلي كانت تنظر من النافذة بجوارها بشرود.
أخيرا كسر أنس الصمت بينهما وقال: بقالك كتير شغالة على مشروع المكتب بتاع سيف؟
تنهدت ليلي ببطء وقالت: أسبوعين تقريبا…. ناوي نروح نكمل التحقيق في النيابة؟
زفر أنس: مش كده يا ليلي…. أنا بس…
صمت أنس… لم يجد كلمات بإمكانه النطق بها…. نظرت له ليلي وقالت بنبرة أهدأ: بس أيه؟
نظر لها أنس للحظة، ثم عاود النظر للطريق: أنا بس محبيتش أشوف واحد زي سيف بيضحك عليكي…. هو يبان انه شخص لطيف بس أنا عارفه كويس مع البنات.
ضحكت ليلي بخفة ولم تعقب…. عاد الصمت يملأ المكان بينهما….. أخيرا توقف أنس بجوار سيارة ليلي… فتحت باب السيارة ونزلت بهدوء بلا كلام.
راقبها أنس تنزل من السيارة وتتجه إلي سيارتها، ثم تنطلق بعيد…أشعل سيجارته من جديد… أسند رأسه علي ظهر مقعد سيارته وبدأت الأفكار تتزاحم في رأسه.
