نبضات لا تعرف المستحيل ج2
نظر إليه مالك باهتمام وقال: حلو بس مش شبهك.
امسك مالك بفستان من الدانتيل بلون الكريمة، بأكمام طويلة وتطريز ناعم يزيّن جزأه العلوي، بينما انسدل الجزء السفلي منه بخفة وهمس لها: حاسس ده شبهك اكتر.
امسكته جميلة بإعجاب وهتفت: ماشي هادخل اقيسه.
دخلت جميلة غرفة القياس وخرجت بعد دقائق ترتدي الفستان… بدت وكأنها حورية خرجت من زمن اسطوري… نظر لها مالك بصمت وعينين تشع بالحب والإعجاب …. وقف ينظر لها من كل الزوايا، هتفت جميلة بدلال: حلو؟
ابتسم مالك وهمس: اووي.
اقتربت منه جميلة وقالت: نشتريه؟
لايزال ينظر مالك بإعجاب وقال: مش عارف…شكلك حلو اوووي لدرجة ان مش عايز حد يشوفك حلوة كده غيري.
ضحكت جميلة: خلاص طالما حلو كده خلينا نشتريه يا مالك… ويبقي تعويض عن اللي حصل في الخطوبة.
ضحك مالك: ماشي نشتريه.
وفي محل لبيع الملابس الرجالية الانيقة… دخل مالك وجميلة، اخذ مالك يدور بين الارفف يبحث عن البدلة المناسبة…… كان الحماس يبدو على وجه جميلة اكثر من مالك، فقال ممازحا: ايه يا جوجو الحماس ده كله؟
ضحكت جميلة: دي اول مرة اختار معاك هدومك… طبعا متحمسة.
هتف مالك وهو يشير لاحد البدلات المعلقة: بفكر اجيب بدلة سودا.
اقتربت منه جميلة وهمست في اذنه: لأ … البدل السودا بتخليك حلو اوي مش هينفع.
ضحك مالك: طيب اختاري معايا.
امسكت ببدلة باللون الرمادي الغامق وقالت: دي لونها هيبقي حلو عليك… شبه لون عنيك.
ابتسم مالك: ماشي هاقيسها.
خرج من غرفة القياس بعد دقائق وهو يعدل من جاكيت البذلة….. بدي انيقا فيها، طوله الفارع وجسده الذي على الرغم من انه نحيل لكنه لا يبدو ضعيفا…. متناسق بشكل ملحوظ، كانت وسامته تبدو مضاعفة في البدل الرسمية….. هتفت جميلة بعينين لامعتين وضحكة خفيفة: انت مين ؟ ووديت مالك فين؟
ضحك مالك وهو يعدل من ياقة قميصه: حلوة؟؟
اقتربت منه جميلة وهمست في اذنه: البنات هيقعوا تحت رجلك لما يشوفوك بالحلاوة دي.
ضحك مالك وهمس في اذنها: يبقوا يقعوا على جنب… علشان انا مش بشوف غيرك.
ضحكت جميلة بدلال.
في طريق العودة…. جلست جميلة بجوار مالك في السيارة، امسك بكفها بحنان وهمس: مبسوطة؟
امسكت بكفه ووضعت قبلة رقيقة عليه وهمست: مبسوطة طول ما احنا سوا.
سحب كفه من يديها وربت علي وجنتها بحنان: انا مش عايز بس غير انك تبقي مبسوطة.
