نبضات لا تعرف المستحيل ج1
ضحكت لارا وهي تعقد يديها: انت كمان مش عاجبك.
هتف بمزاح: تعبت يا حبيبتي…. ده عاشر محل ندخله ومفيش حاجة تعجبك.
اشارت له بيدها: خلاص خلاص… المحل هنا شكله فيه حاجات حلوة.
غابت لارا لدقائق تتنقل بين الفستانين المرصوصة بعناية، جاءت تحمل اثنين في كلتا يديها إلي يوسف، حلو؟ …. قالتها لارا وهي تشير بالفستان إلي يوسف.
نظر لها يوسف بابتسامة: قيسيه يا حبيبتي ونشوف.
جلست إلي جواره و تنهدت: ما هي دي المشكلة… انا طول عمري بحب البينك و نفسي ألبس فستان بينك منفوش… بس مش عارفة ليه حاسة من جوايا ان مفروض اختار الموف… حاسة كأني متفقة مع نفسي ألبس موف في اليوم ده…. فاهم حاجة.
ضحك يوسف ومال علي أذنها: متفقة معايا يا حبيبتي تلبسي اللون ده.
نظرت له لارا بعدم فهم، فأردف: انتي عارفة اني بحب اللون الموف، و انتي بتحبي البينك… كنا نتخانق، فا اتفقنا هتلبسي موف في الخطوبة و هاسيبك تدهني الحيطة في اوضة النوم بتاعتنا بينك.
نظرت له لارا وعقدت حاجبيها: وانت كنت عاوز أوضة النوم ندهنا ايه؟ أبيض؟
ضحك يوسف وهو يميل برأسه عليها: بيئة أوي الأبيض فعلا.
ضحكت لارا حتى دمعت عيناها… بينما يوسف ظل شاردا يشاهد ضحكتها التي اشتاق لها طوال الأيام الطويلة الماضية.
سكتت ضحكتها عندما لاحظت نظرة يوسف لها، حاول ان يتدراك ارتباكهها فقال: ها هتختاري انهي واحد فيهم، لسة هنشتري البدلة.
رفعت كتفيها في حركة طفولية: احنا متفقين على الموف، علشان انا مش هاتنازل عن اوضة نوم بينك.
نبضات لاتعرف المستحيل
الفصل التاسع:
في يوم حفلة الخطوبة… في داخل القاعة جلس زياد بجوار نور و همس: مش هتفردي وشك بقي ؟
قالت من بين اسنانها: شايف الخطوبة اللي ابنك عاملها لبنت سارة…. شايفة يا حياة يا حبيبتي… عارفة ان ماما متعملهاش حتى فرح.
رفع زياد يديه في استسلام وهتف: والله يا بنتي ما عملت فرح لا ليها و لا لغيرها.
رفعت نور حاجبيها وعقدت جبينها ومالت على أذنه و همست: انت كنت عاوز تعملها فرح كمان؟
نظر زياد إلي عينيها و قال بمشاكسة: يعني يرضيكي جوازتين و معملش حتي فرح واحد.
اشاحت نور بوجهها عنه ولم تعقب، مال علي أذنها و هو يحاوطها بذراعه: يعني عاوزة تنكدي يوم خطوبة أبنك؟
ابتسمت نور وهي لاتزال تشيح بوجهها عنه، مال عليها وهمس: أنقذك مني أن طارق جه.
