نبضات لا تعرف المستحيل ج1
همس له شادي بصوت ضعيف: انت عرفت؟
وكزه مالك في كتفه وهو يدفعه بعيدا عنه: مش قادر اصدق إنك بجد تعمل كده…. وفي واحدة بتحبها.
بكي شادي بضعف وبصوت متهدج: انا مستعد اتجوزها دلوقتي.
نظر له مالك باستحقار: وانت هتبقي راضي عن نفسك لو هي وافقت تتجوزك علشان انت كنت حقير معاها؟ هتعيش معاها ازاي وانت عارف انها بس وافقت بس علشان انت كسرت عينها.
صاح شادي بغضب: كنت عاوزني اسيبها تتجوز راجل تاني؟
ازدادت نظرات مالك استحقار وقال باستهزاء: وهي كده هتتجوزك و تبقي انت في عينيها راجل؟ انت مفكرتش ان ده ممكن يحصل لاختك؟
صرخ شادي: انا عارف إني غلط… بس كل اللي كنت بافكر فيه انها تستناني…. متتجوزش راجل تاني.
نظر له مالك بغضب و هم بالخروج: انت الكلام مع واحد حقير زيك ملوش فايدة… ابعد عنها يا شادي و مش هاكرر كلامي تاني … و إلا …انا اللي هاعمل فيك بلاغ في القسم… وياريت متخرجش من اوضتك الليلة اللي فاضلة دي لحد اما نرجع القاهرة و نشوف حل في المصيبة دي….. وقف مالك لحظات عند الباب ثم أستدار و نظر لشادي نظرة مليئة بالاستحقار: انا مش عايز أعرفك تاني يا شادي…. انت مقزز.
————————————–
طرق مالك باب غرفة حنين وجميلة وهمس: افتحي يا جميلة انا مالك.
فتحت جميلة الباب بحذر، ناولها مالك كيس أدوية: البرشام ده تاخد منه قرص دلوقتي، وانا جبتلها كريم للكدمات خليها تستخدمه… تهدج صوت مالك: هي عاملة ايه دلوقتي؟
نظرت له جميلة بعينين مليئة بالألم والضعف: مش كويسة خالص يا مالك….
اخرج مالك من جيبه شريط من الدواء وناوله لجميلة: بصي ده برشام مهدئ… اديها قرص منه علشان تهدا وتعرف تنام… بس يا جميلة خلي الشريط معاكي …. انا مش عارف بالحالة اللي هي فيها دي ممكن تعمل في نفسها ايه.
لمعت حدقتي جميلة وهمست وهي تضغط علي كف مالك الممدودة بالدواء: انا مش عارفة من غيرك كنت عملت ايه يا مالك… شكرا.
سحب مالك كفه من كفها بهدوء وهمس: لو احتاجتي حاجة انا موجود.
ابتسمت له جميلة في هدوء وأغلقت الباب.
—————————————–
انقضي اليوم في رتابة علي الجميع، الجميع يشعر بالتوتر المحيط بهم دون ان يعرفوا سببا له، لم يري مالك شادي طوال اليوم و لم يحاول ان يتواصل معه، كان يشعر بالغضب من فعلته الشنعاء، كان مالك يطمأن علي حنين من جميلة بين الحين و الأخر.
