رواية روعة روعة ج3

كانت تحاول تجنبه، تحاول الهروب منه، ولكن وللاسف من ذاك الذي يهرب من قدره!! ويونس الزهار كان قدرها والذي كلما ابتعدت عنه اكثر تجد انها سقطت فى دائرته اكثر، وهي سقطت صريعة هوى هيبة هذا الرجل وخشونته ورجولته ومرؤته وقوته وحنانه ولطفه ودفئه والذي يحاول باستماتة اخفاؤه تحت قشرة قسوته الكاذبة، حتى انها احبت ابنته فقط لانها منه وتشبهه اذا…

ماذا عليها ان تفعل؟ وكيف تهرب من لعنته؟

ظلت تبكي وتتعالى شهقاتها لتتأوه لينا هامسة بوجع:

_روفان!!

اجابتها روفان وقتها بقوة ممزوج بانهيار:

_ايوة بحبه يا لينا، بحب يونس الزهار ومش عارفة اعمل ايه قدام طوفان حبه، هو احتلنى بنظرته يا لينا، بقيت اتمنى اشوف ابتسامته، بيوجعنى قسوته لانها منه يا لينا مش اى حاجة تانية، بهرب منه ومن حبه بس مين اللى يقدر يهرب من قدره!! وللاسف حب يونس قدرى

لما بيبصلي بحنان ودفء ونظرة صافية من الغضب احس طايرة فى السما، ولما بيغضب منى احس انه بيكسرنى ويفتتنى، امانى بقى يونس، وسعادتى يونس، علشان كدة بحاول اهرب يا لينا بس للاسف هو احتلنى.
امتى وازاى مش عارفة بس بقى هو كل امنيتى اللى بدعيها دايما

تجمدت لينا مكانها وهي تستمع لشقيقتها لتبتلع رمقها بتوتر لتجيبها بعدها بغضب:

_روفان فوقي، يونس مينفعكيش لاسباب كتير، يونس اكبر منك بكتير، اكتر من اتناشر سنة، وفوق كدة ارمل ومعاه طفلة وانتِ لسة صغيرة مدخلتيش دنيا، ليه تظلمي نفسك وتظلمي قلبك معاه؟ مينفعش يا روفان

وهنا هدرت روفان بغضب:

_عارفة بس انا مش عايزة غير يونس، كل رجالة العالم متجيش ضفره، عيوب يونس متجيش نقطة فى بحر مميزاته، وهو افضل راجل ممكن اقابله فى حياتي وعارفة اني مش هقابل زيه ابدا

هنا وصرخت لينا بحنق:

_بس هو مش هيبصلك يا روفان، يونس مش هيتنازل ويبصلك لانه وللاسف عارف غلطك كله، وان سامحك او التمسلك العذر كسن وكبنت فهو كراجل صعيدي وشرقى استحالة كرامته تلتمسلك العذر يا روفان، واستحالة يوافق انه يرتبط بيكِ.

كرامته وكبريائه كراجل صعيدي هتقف ضد ده، وحتى وان كان روحه فيكِ، وقلبه مجنون بيكِ هيطلع قلبه ويدوس عليه برجليه ولا انه يوافق يا روفان، فاهمة؟

بكت روفان بانهيار لتسمع صوت اختها الحانى والرقيق:

_متعذبيش نفسك يا حبيبتي ارجوكِ، بلاش توجعي قلبك فى قصة انتِ عارفة نهايتها