عن العشق والهوى 3
انتفضت الفتاة من مكانها مثل الحمقاء والتفتت الى صاحب الصوت ويا ليتها لم تفعل فقالت بتوتر شديد : ا.. انا اسفه يا كمال بيه انا بس كنت ….
ضحك كمال واردف : خلاص ولا يهمك ، اعتبري اني مسمعتش حاجة بس خلي بالك علشان هو ميسمعش.
قال ذلك ورسم على محياه ابتسامة لطيفة ثم توجه نحو مكتب ادهم وطرق الباب مرة واحده وبعدها دخل.. اما سلمى تمنت لو ان الارض تنشق وتبتلعها لانها تفوهت بكلام تافه امام كمال الذي يعتبر اهم شخص في الشركة بعد ادهم لذا ضربت فمها وقالت بتذمر : الله يخرب بيت ام لسانك يا سلمى.. ضروري تقولي الكلام دا وانتي عارفه انك مش لوحدك في الشركة دي وان ممكن اي حد يسمعك !
وفي نفس الوقت داخل مكتب ادهم ……
كان هو واقفاً ينظر من خلال نافذة مكتبه العملاقة على الشوارع والسيارات بينما كان يدخن سيجارة بصمت مرعب… فدخل كمال وقال بصوت مرح : ايه يا عم.. انت ابتديت تدخين من الصبح كدا ؟؟
التفت إليه وقال : اهلاً يا كمال… عملت ايه في موضوع شراكتنا احنا وصاحبك الامريكي دا ؟
جلس كمال ووضع قدم فوق الاخرى قائلاً : كل حاجة جاهزه ومفضلش غير اننا نسافر علشان نوقع العقد مع خالد.
فجلس ادهم ايضاً ثم اطفأ سيجارته وسأل : انت متأكد اننا نقدر نثق في الراجل دا ؟
ابتسم كمال وقال : متقلقش ، خالد نجم دا راجل كويس وانا اعرفه من ايام الجامعة… صح هو اصغر مني بسنه وحده وعاش معظم وقته برا مصر بس تقدر تقول انه راجل عنده خبره كبيرة في مجال التجارة وكمان هو بنى شركته بنفسه زيك بالزبط لان بباه كان مهندس معماري ومكانش بيفهم في ادارة الاعمال ابداً .
فاسند ادهم ظهره الى الكرسي وكتف ذراعيه ثم قال : ما دام انت اللي بتقول كدا انا هثق فيه لاني عارف انك دايماً بتختار الصح.
كمال : متشكر وان شاء الله هبقى عند حسن ظنك فيا .
ادهم : وامتى هنسافر ؟
كمال : بعد بكرا… هنروح شركته اللي في نيويورك.
في تلك اللحظة شعر ادهم بغصة في قلبه لانه تذكر اخر تجربة له في نيويورك حين طلق مريم قبل اربعة سنوات وخمسة اشهر فعبس وجهه وقال : نيويورك !
كمال : ايوا…شركته الاساسية هناك وهو بيعقد كل الصفقات المهة في الفرع الرئيسي بتاع الشركة.
فتنهد ادهم وقال : تمام .
– مر الوقت سريعاً وجاء موعد سفرهما ومعهما مدير قسم المالية محمود ياسين البالغ من العمر 29 عاماً والذي كان زميل مريم في السابق ، فهو عمل بجد حتى ترقى من مبرمج ومصمم مواقع اليكترونية واصبح مدير قسم المالية في شركة رويال ، فذهبوا ثلاثتهم الى نيويورك من اجل اتمام الصفقة مع خالد .
