ملح بطعم السكر 7

ارتجفت ورد من الوجع في حديثه ونهضت من الفراش وسترت جسدها بعبائتها واقتربت منه ليوليها ظهره و التفت ووقفت أمامه وامسكت به حتي لا يهرب منها وملست علي خده برقة وحنان”
رياض انت بتشكك في حبي، ولد ايه اللي ابديه عليك، كل الحكاية نفسي امزج دمي بدمك في حاجه خاصه بينا، مش قصدى اذيتك او احسسك بالنقص انت عندى اغلي الاماني وكل يوم بحمد ربنا انه جمعنا من تاني
لكن ده ميمنعش اني اتمني واحلم واسعي لتحقيقي حلمي، اللي هو حلمك زيي بالظبط ولا احساسي بيكذب عليا ؟

انزل يدها عن خده وغامت عيناه بغموض وأردف قائلًا”
لو كنت كافي عليكي مكنتش احس بالحياة الجديده اللي اتولدت جواتك ، حتي لو كان حب من نوع خاص ان يكون ليكي ولد مني، لكن وانتي بتحلمي اعرفي زين اني حاولت وتعبت من كسرة النفس واحساسي بالعجز
لو بتحبيني اكتفي بيا انا ولدك وحبيبك وزوجك وعشيجك
بلاش يا ورد نخوض تجربة تانية، انتي وانا خابرين زين انها مستحيله، لو لي غلاوة عندك كفاية وجع وتجطيع فيا
••••••••••••••••••••••••••••••••••••••••••••••••••☆

ارتعدت اوصالها خوفًا من فكرة رفضه للفرصه الاخيرة التي اتاحها لهم القدر،اخذت نفس عميق واخذت تدعو ربها سرًا ان يقبل رياض خوض هذه التجربة لعل الله يكتب لهم الذرية سويا بعد طول عناء وتمني ورجاء تشجعت وقالت ”
رياض انا هطلبها منك ولأخر مره وحياه كل حاجه حلوة بينا امنح قلبي وقلبك سعادة لا منتهاه واقبل نجرب لاخر مره واوعدك بعدها نقفل الموضوع للابد
لو زي ما بتقول اتولدت حياة جديدة جوايا وحاسس بيها اسال نفسك لمين وليه
هقولك انا لمين ليك وليه لابني منك يعني انت المحور والاساس، مشتاقه أكون ام لاولادك مش كتير عليا ، حقي حلمي اللي بسعي له ولو فرصه صغيرة مش هيأس

نظر اليها بحدة وظل صامتًا كانه يعطيها الاذن بان تكمل ما تقول الي ان يعرف ما يهدف حديثها فاكملت قائلة”
صديقتي دعاء زوجها تخصص جراحه خصوبة وتناسلية وعالج ناس في نفس حالتك صحيح الامل ضعيف بس موجود،ارجوك يا رياض
واخرجت زجاجه من الدواء واعطتها له ومعها ورقة وقالت،”
ده دوا هتمشي عليه ٤٠ يوم وده واشارت الي الورقه…..
رقم الدكتور تقدر تتواصل معاه وهيقولك هتعمل ايه ،أعملها علشان خاطري وخاطر حلمنا اللي ممكن يتحقق
مش يمكن مرض حنان ولقائي بدعاء سبب ان ربنا يمنحنا رضاه علينا بطفل يجمعنا ها ايه رايك؟