رواية الثلاثة يحبونها ج2
تنهدت نهاد قائلة فى حزن:
ماهو مش هينفع ياشروق..انتى مش فاهمة حاجة؟
نظرت إليها شروق قائلة بمرارة:
لأ أنا أكتر واحدة فاهمة وحاسة بيكى..وحاسة بيه هو كمان..الحب أجمل حاجة فى الدنيا..ولما يكون الحب متبادل بين الإتنين.. يبقى كدة لقوا جنتهم على الأرض يانهاد..ليه بقى ترفسى جنتك عشان أوهام فى دماغك ..ليه تخرجى تانى من الجنة يابنت حوا عشان وساوس شيطان ملهاش أي أساس؟ ..إتمسكى برأفت وعيشى معاه..حبى وإتحبى..إدى نفسك فرصة..الحياة من غير حب مش حياة يا نهاد..ومش كل حد بيحب بيبادله حبيبه مشاعره.
لتسقط دموعها فى تلك اللحظة..فتسرع إليها نهاد تأخذها فى حضنها قائلة:
طب إهدى ياحبيبتى ..إهدى عشان خاطر اللى فى بطنك.
قالت شروق بسخرية مريرة من وسط دموعها:
اللى فى بطنى..اللى فى بطنى غلطة مش ضامنه مراد يتقبلها..ورغم إنى نفسى فيه بس ممكن محتفظش بيه…
أخرجتها نهاد من حضنها وهي تقول بجزع:
إنتى بتقولى إيه يا شروق؟مراد مستحيل يقبل بحاجة زي دى..مستحيل يخليكى تجهضى طفلكم.
مسحت شروق دموعها وهي تقول فى مرارة:
كان ممكن أصدقك لو كان مراد بيحبنى ..بس مراد مش بيحبنى يانهاد..مراد بيحب واحدة تانية.
عقدت نهاد حاجبيها قائلة:
إزاي؟ ..إنتى مش قايلالى إنه مبيحبش بشرى.
قالت شروق بسخرية مريرة:
هو فعلا مبيحبش بشرى..بس بيحب رحمة..مرات يحيي..أخوه الكبير.
إتسعت عينا نهاد بصدمة وهي تقول:
إنتى بتقولى إيه؟
تنهدت شروق قائلة:
هحكيلك يا نهاد..لإنى تعبت..تعبت ومش لاقية حد أفضفضله غيرك.
قالت نهاد بشفقة:
طيب ..إحكيلى ياشروق..إحكيلى ياصاحبتى.
لتسرد لها شروق ما إكتشفته اخيرا من مشاعر زوجها التى أخفاها داخل قلبه طويلا والتى جعلت من أملها فى عشق زوجها ……أملا مستحيلا.
الفصل الثالث عشر
كان يحيي ممددا على الأريكة داخل حجرة مكتبه داخل منزله..يفكر فيما يحدث بينه وبين تلك الشقية الفاتنة والتى ستودى به يوما إلى حتفه من جراء ذلك الصراع الذى يكتنفه حين يكون معها ..فتارة يود لو آلمها كما تؤلمه كلماتها وخيانتها له قديما ..وتارة يود فقط لو إحتضنها حتى يعتصرها ويشبع توقه إليها والذى يأخذ أنفاسه بعيدا ويزيد من نبضاته مجرد تخيله لذلك….
فجأة..ومض بعقله ما مر به اليوم معها لترتسم على شفتيه إبتسامة حانية..وهو يسترجع ما حدث.
