خارج أسوار القلب ج3

الفصل الثالث عشر _____________ في نفس اليوم كانت (لمياء) قد قررت أن تنهي الأمر وتواجه زوجها وتحسم المعلق بينهما لتنهي عذا,ب قلبها المرهق, استيقظت مبكرا و تناولت فطورها مع والدتها وشقيقتها وابنتها ثم سلمت عليهما عائدة لمنزلها, اليوم هو إجازة زوجها ولن تذهب لمكتبها لذلك ستعود للمنزل وتجده هناك بالتأكيد, وصلت للبيت ودلفت إليه بهدوء فوجدت حموها يتناول فطوره وحيدا على طاولة المطبخ, اقتربت منه وربتت على كتفه قائلة بحنان : – صباح الخير يا بابا, انت عملت الفطار لنفسك ؟ كنت استناني شوية. ابتسم الرجل في حب وأجاب : – صباح الورد يا أستاذتنا, اقعدي افطري معايا بقى ودوقي البيض بتاعي. بادلته ابتسامته وقالت : – أكيد لذيذ, بالهنا والشفا يا بابا, هو أحمد لسه نايم ؟ أجاب : – مااعتقدش, سمعت صوته من شوية بياخد شاور. ابتسمت مرة أخرى ثم اتجهت لغرفتها, دخلت بهدوء فوجدته جالسا على السرير يلف نفسه بمنشفة كبير ويجفف شعره بأخرى في يده, نظرت إليه وابتسمت, شعرت بالحنين إليه, بالشوق لصدره وتربيتة يده لتشعرها بالأمان, لم يكن الوقت مناسبا لتفيض مشاعرها نحوه فهي تريد إنهاء الأمر لذلك قطعت سيل أفكارها واتجهت إليه وهو يتطلع إليها مبتسما جلست بجواره وسألته : – أحضرلك الفطار ؟ أجاب مبتسما هو الآخر : – لا هأفطر مع نسيم. شعرت به يطعن قلبها في الصميم, كذبته, لم تصدق أنها سيتركها يوم أجازته ليقضي اليوم مع صديقه, بل سيقضيه مع الأخرى, فقالت في حزم : – طيب معلش يا أحمد ياريت تلبس هدومك وتستنى شوية, عاوزاك في موضوع مهم, معلش مش هأخرك على صاحبك. شعر بالقلق من لهجتها فتساءل وهو يحاول أن يمسك كفها : – خير يا لميا ؟ هي جمانة كويسة ؟ أومأت برأسها أن نعم وقالت : – الحمد لله, الموضوع اللي هأكلمك فيه يخصني انا وانت مش جمانة يا أحمد, ياريت بس تلبس وتستناني على مااغسل وشي . رد ببعض العصبية : – خير يا لميا, هو نكد ع الصبح, ارحميني بقى مش كل ماتشوفي وشي تضر.بي البوز الخشب وتفتحي أي خناقة. ثم قام من مكانه متجها للدولاب وفتحه بعنف وهو يهتف : – انا نازل, مش ناقص قرف حتى يوم الأجازة مافيهوش راحة. وجدت أن عدوى العصبية قد انتقلت إليها وهي تقول : – أحمد من فضلك, لا نكد ولا غيره, هو موضوع واحد وأخير هنتكلم فيه ونحط النقط ع الحروف وبعدها هترتاح. نظر إليها بقلق فاتجهت للحمام وغسلت وجهها بالماء البارد الذي اختلط بدمعة سالت على وجنتها بدون أن يراها أحد, عادت إليه لتجده يزرر قميصه فاتجهت للأريكة في ركن الغرفة وجلست عليها وأشارت إليه ليجلس بجوارها, كانت تريده قريبا تستشعر رائحة الندى على جسده, يلامسها دفئه ولو من على بعد, اتجه إليها وجلس بجوارها, الآن ستعلم من الكاذب, أخرجت هاتفها وفتحت الرسالة ومدت يدها به إليه وسألته : – الموضوع اللي هنتكلم فيه يا أحمد أهم موضوع في حياتنا, هو الحاجة اللي بتجمع بيننا, مش هاقول أولاد أو انشغالك او انشغالي, لا هأقول الحب اللي متأكدة إني حبيتهولك, حبك لي مش عارفة هو موجود ولا لا, بس حبي موجود وبإيدك يعيش أو يمو*ت. نظر إليها ولم يفهم, شعر بالقلق وتساءل في داخله : مالذي تقصده ؟ أما هي فبعد لحظة صمت استطردت : – عاوزة إجابة صريحة يا أحمد وصدقني هأقدر أتعايش مع الموقف وأتقبله. ثم رفعت الهاتف بالرسالة أمام عينيه وسألته : – ممكن تقول لي إيه الرسالة دي ؟ لم يحاول التقاط الهاتف منها بل قرأها بعينيه سريعا وشعر بالبرودة تغزو أطرافه, توتر وهو يجيب : – مااعرفش, ايه الكلام الفارغ ده؟ لم تعلق بل مدت يدها إليه وقالت : – طيب ده كلام فارغ, ممكن موبايلك ثواني. قال بعصبية : – عاوزاه ليه ؟ ردت بهدوء : – أبدا, إنت بتقول الرسالة دي كلام فارغ, عاوزة تقولي الرسايل المقرفة اللي على موبايلك برده كلام فارغ ولا بجد ؟ اتسعت عيناه وازدادت عصبيته وهو يهتف : – انت بتفتشي في موبايلي يا لميا؟ من امتى ؟ وانا نايم على وداني وفاكرك الاستاذة المحامية المتحضرة الواثقة من نفسها, طلعتي بتعملي زي الستات الجاهلة اللي بتفتش ورا ازواجها. قابلت عصبيته ببرود شديد وقالت : – ممكن الموبايل. تطلع إليها لوهلة في دهشة, لما هي باردة هكذا؟ أين الحب والوله الذي كان يسكن ملامحها؟ أتراها تعلم بالفعل وتصدق؟ قال بعد تفكير : – إنت عاوزة ايه يالميا ؟ ردت بهدوء : – عاوزة نحط النقط ع الحروف, أعرف أنا بقيت فين في حياتك ؟ عاوزة القلق والألم والخوف اللي عايشة فيه ينتهي. قال بدهشة : – قلق وألم وخوف ؟ معايا يالميا ؟ سالت دمعة صامتة لم تشأ لها أن تظهر أمامه فيستشعر ضعفها وحبها لكنها أجابت : – أيوة معاك يا أحمد, إنت شفت الرسالة بنفسك, وأنا شفت رسايل أقل وصف لها إنها قذرة على موبايلك, أهملتني وتقريبا عايشة أنا وباباك لوحدنا, ياشغل يا أصحاب ياالله أعلم ايه تاني ؟ ايه يخليني اصبر أو اقيدك, احنا اللي كان بيربط بينا خلاص, انقطع من عندك فمالوش داعي أفضل متمسكة بيه, الأفضل أسيبه عشان ع الاقل قلبي الموجوع يستريح شوية وانت تشوف حياتك ومستقبلك والولاد اللي نفسك فيهم مع اللي بعتتلي الرسالة. شعر بالغضب فانتفض واقفا وهو يهتف بها في عصبية : – انت أكيد اتجننتي يالميا, لمجرد إن حد بعت لك رسالة مالهاش لازمة تقومي تهاجميني بالشكل ده وتقولي لي نبعد وقطعت وانت عملت, كنت فاكرك أعقل من كده. وقفت أمامه وقالت بهدوء حازم : – بلاش سياسة خدوهم بالصوت دي يا أحمد, إحنا الاتنين أعقل وأكبر من كده, بتنكر ليه؟ ماتقوليش لسه باقي علي, لو كنت باقي ماكنتش تخون, وماتقولش لا ماعملتش, انت حتى وانت بتنكر صوتك مهزوز وواضح في عينيك. زم شفتيه وظهر الغضب جليا على وجهه وهو يضم قبضتيه بشدة, شعرت بالخوف فتراجعت خطوة للخلف, لكنه اقترب منها بسرعة وأمسك ذراعها بعنف وصرخ في وجهها : – عاوزة ايه يالميا؟ عاوزة اعتراف ؟ عاوزة تسمعي مني بودانك إني باخونك واني باحب واحدة تانية ؟ طيب يالميا, انا فعلا باحب واحدة تانية ومش بس باحبها انا اتجوزتها وخدي دي كمان, هي حامل في الشهر الخامس, مبسوطة كده يا أستاذة يا كبيرة ؟ كال لها لكمات كلماته حرفا حرفا متتابعة حتى انهارت وتكسر قلبها فتاتا من الألم, ثم تركها مبتعدا يملؤه الغضب, لم تدر ماذا تفعل, هل كانت تتمنى أن ينكر ويصر على إنكاره, أن يرجوها, أن يبثها حبه ؟ أن يسخر حتى من أفكارها ومخاوفها ؟ ربما, لكن أن يلقي بقنابله تباعا في وجهها وبتلك القسوة هذا مالم تتوقعه, شعرت بقبضة قاسية تعتصر قلبها فينزف دموعه, صمتت تتطلع إليه وهو يلهث من شدة الغضب بعد تلك القنابل المدوية التي فجرها لسانه, وقبل أن تتمكن من منعها سالت دمعة حارقة من عينيها, لمحها هو فلان قلبه, اقترب منها لكنها تراجعت للخلف بسرعة وهي تمد يدها لتمسح دمعتها, تنهد وقال : – ليه كده يالميا ؟ أنا ماطلبتش حاجة وحشة أو حرام؟ أنا نفسي أكون أب ومن حقي أكون أب, ماقلتش لأني مش عاوز أجرحك, وباقي عليكي حتى لو مش مصدقة, ابني هيبقى ابنك وتشوفيه وتربيه زي مامته بالظبط, مش عاوزك تسيبيني. كان قلبها يبكي وهي تحاول التماسك, حاولت الكلام فخرج صوتها دامعا وهي تقول : – أنا ماقلتش حرام يا أحمد, إنت خبيت علي ماكنتش صريح, مااديتنيش حرية الاختيار, عاملتني بقلة اهتمام لمجرد إنك عاوزني أفضل معاك, ديكور, أكسسوار, المهم إني موجودة, بس للأسف زي ما إنت من حقك تدور وتسعى عشان تكون أب انا كمان من حقي أكون أم وأسعى لتحقيق الحق ده, كل الدكاترة قالوا إن مفيش حاجة فينا احنا الاتنين تمنع الحمل, لكن نصيبنا كده, إنت مارضيتش بنصيبك على الرغم من إني سكت وكل ده لأني بحبك, لكن مادام إنت دورت ع اللي ناقصك, أنا كمان من حقي أدور ع اللي ناقصني, وكمان بتقولي ابني هو ابنك, ليه هتاخده من مامته, هتكسر قلبها هي كمان زي ماكسرت قلبي, ابني يا أحمد هيكون ابني من دمي وكنت أتمنى إنه يكون من دمك, لكن ربنا ما أرادش وإنت ماصبرتش. شعر بالتوتر وتساءل : – قصدك ايه بالظبط يا لميا ؟ ردت في هدوء ظاهري : – قصدي الطلاق يا أحمد, وهي كلمة محددة وواضحة مش هأجملها أو أختار غيرها, إحنا مالناش نصيب نكمل مع بعض, يبقى كل واحد يشوف حياته ويمشي في طريقه لوحده, واضح إن من الأول حياتنا كانت خطين متوازيين وبالخطأ حصل بينهم نقطة تقاطع لكن في النهاية كل خط بيرجع يمشي في مساره الطبيعي موازي للتاني وبعيد عنه. توتر أكثر لكنه لم يجب, لم يكن يتوقع أن يأتي يوم وتطلب فيه زوجته الانفصال عنه, تلك التي كانت تذوب له عشقا وتتمنى رضاه في كل لحظة, تلك العملاقة القوية التي كانت أنثاه هو, والضعيفة دوما بين ذراعيه, هل يصدق؟ ها هي تقف أمامه الآن تتحداه وتطلب منه الفراق, لكن هل يوافق ؟ بل هل يمكنه ذلك ؟ طال صمته فحثته قائلة : – ماتفكرش كتير يا أحمد, لميا بتاعة زمان ضاعت منك ومش هتعرف ترجعها, حياتنا مع بعض انتهت خلاص واللي كان بينا مات, وعمر اللي بيمو*ت مابيرجع للحياة تاني. نظر إليها لثوان أخرى ثم التقط سترته وارتداها ونظر إليها في المرآة وقال مخاطبا إياها عبرها : – لميا انا مش هاخد على كلامك دلوقتي, أنا خارج واقعدي مع نفسك وانا كمان هاقعد مع نفسي, راجعيها في القرار اللي أخدتيه, وبلغيني بعدها. ثم التفت إليها واقترب منها وهو يكمل : – فكري في اللي بينا, ومش هاقول كان لأنه لسه موجود, وقفي عقلك شوية وخلي لميا الحنونة الأنثى اللي حبيتها هي اللي تقرر. نظرت إليه في صمت, هكذا كان يفكر, يريدها أنثاه فقط, يقت*لها ويحييها, يقربها منه ليسقيها خمر عشقه ثم يبعدها ليذيقها مرار بعده, وهي الضعيفة المستكينة المستسلمة لأمره, خرج وتركها فانتظرت للحظات ثم انهارت على أريكتها باكية ودموعها تروي قلبها المكسور. ___________________________بعدها بيومين تم الطلاق في هدوء, بكت (لمياء) ونزفت دموعها أنهارا, بكت كما لم تبك من قبل وكما لن تبكي بعد اليوم, ظنت أنها أقوى لكن بعد نطقه لكلمتي : أنت طالق; انهار بداخلها شيء ما جعل حمم دموعها تنصهر في قلبها وتحرق مقلتيها فوجنتيها ثم تستقر مبللة وسادتها, انتقلت لتقيم مع شقيقتها ووالدتها اللتين حزنتا كثيرا من أجلها, لم تكن والدتها تعتقد أنها عندما تركت الأمر بيديها أنه سيصل لهذه المرحلة, لكنها لم تعاتبها او تراجعها, فهي تعلم مدى تحمل ابنتها ومادام الأمر قد وصل لنهاية مسدودة فلابد ان ابنتها قد سعت قبلها كثيرا لتحول دونها, لكن قدر الله وما شاء فعل, وفي خلال اليومين أيضا عرض (آدم) على (جمانة) العمل الجديد في مكتبه فرحبت بالفكرة, واستقرت الأمور مرة أخرى حتى أتاها اتصال من أخي زوجها الحاج (عبدالرحمن) ليعرف قرارها النهائي, كانت قد نسيت أو تناست الأمر وشعرت بالأمان مع كلام شقيقتها لكنها عادت للقلق من جديد عندما أبلغته رفضها وهددها أن الأمر لن يمر بسلام أبدا, كانت تجلس شاردة واجمة في مكتبها ولم تسمع اتصال (آدم) بها حتى خرج من مكتبه ووقف أمامها ينادي باسمها وهي لا ترد, لم يدر ماذا يفعل فطرق على المكتب بقوة أفزعتها وهي تتطلع إليه في رهبة, نظر لها وقال مهدئا : – ايه ايه ماتخافيش, مالك ياجمانة ؟ شكلك مش هنا ومرعوبة كده ليه؟ خرج صوتها مرتبكا قلقا وهي ترد : – لا أبدا مفيش حاجة, شوية مشاكل خاصة. نظر إليها وود أن يمتلك القدرة ليحل لها مشاكلها, كان يشعر نحوها بأبوة غريبة على الرغم من إعجابه بها كامرأة, حاول أن يشاركها مشاكلها ولكن بتردد خوفا من أن ترفض لتدخله في حياتها الخاصة فجلس أمام مكتبها وتساءل بهدوء : – خير, قولي لي يمكن أقدر أساعدك. هزت رأسها نفيا مجيبة : – ولا يهمك يا دكتور آدم, حاجة مالهاش حل, ربنا يحلها من عنده. ابتسم وقال بود : – طيب جربي يمكن تلاقي عندي حل, لو الموضوع مايضايقكيش أو خاص أوي. علت شفتيها ابتسامة باهتة وهي تشكر له اهتمامه وقالت : – هو مش خاص للدرجة, لكن مش عارفة نهايته ايه ولا ممكن يوصل لفين؟ نظرت إليه لتجده يبادلها النظر باهتمام حاثا إياها على الحديث, كانت شبه فاقدة الأمل خائفة مرتبكة فقررت أن تحكي له, أخذت نفسا عميقا وهي تقول : – هأقول لحضرتك يمكن فعلا يكون عندك حل. وانطلقت تحكي له عن مشكلتها مع أهل زوجها الراحل وطلبهم الغريب ثم تهديدهم لها ومحاولة أخذ ابنتها منها بالقوة أو الاستيلاء على ميراثها بدون وجه حق, استمع لها باهتمام وهو يفند كل موقف حتى انتهت, وختمت حديثها قائلة : – وغير ده كمان أختي اتطلقت من كم يوم, كأن الحزن مصمم يعشش في قلوبنا للأبد. شعر بالأسى على حالها وأختها فقال مواسيا : – لا حول ولا قوة إلا بالله, الله أعلم الخير فين, يمكن طلاق أختك لأن ربنا شايل لها حاجة أحسن. أومأت برأسها موافقة وهي تبتسم في حنان ثم قالت : – ونعم بالله. صمت مفكرا لدقيقتين او أكثر وهي تتطلع إليه في أمل عله يجد حلا لمشكلتها مع أهل زوجها, ثم انتعش الأمل في قلبها أكثر عندما قال فجأة : – عندي حل غير متوقع لموضوعك, بس مش واثق من موافقتك عليه. تساءلت في أمل : – حل ايه ؟ قال ببطء : – الجواز. تراجعت للخلف برهبة وتردد صدى كلمته في أذنيها بعنف, حدقت فيه بشدة وهو ينظر إليها صامتا حتى هتفت في استهجان شديد : – جواز يادكتور ؟ هو ده الحل ؟ يعني أنا رفضت اخوهم عشان اتجوز واحد غيره ؟ ده لو سبنا مبدأ أصلا إني رافضة الجواز فأنا كده باسوأ سمعتي عندهم وباديهم فرصة أكبر ياخدوا بنتي مني. ابتسم وقال بهدوء : – طيب اسمعي تفاصيل الفكرة الأول. هزت رأسها نفيا قائلة : – بداية الفكرة مرفوضة هاسمع تفاصيلها ليه ؟ هز كتفيه وأجاب : – يمكن تعجبك, كملي معايا للآخر. عقدت حاجبيها في استغراب وأنصتت إليه في أثناء قدوم (أدهم) لأخيه, سمعهما يتحدثان فلم يقاوم فضوله للاستماع لحديثهما, انتحى جانبا وأمسك هاتفه كأنه يفعل به شيئا ما ويسمع مايقولان بوضوح, أما (آدم) فقال : – شوفي ياستي, ليه طرحت فكرة الجواز, اولا هتكتبي الأرض باسم جوزك بيع وشرا مع طبعا ضمان لحقوقك, هو اللي هيبقى شريكهم ويتصرف معاهم وممكن يبيعها لهم بالسعر اللي تستحقه, ثانيا هيمنع تفكيرهم فيكي من ناحية الجواز نهائي, ثالثا جوزك هيعتبر حماية ليكي ولملك من أي تهديد وهو اللي هيتصدى لهم ويمنعهم, رابعا لما تهدأ الأمور وكل واحد ياخد حقه تقدري تاخدي أرضك تاني او لو اتباعت تاخدي تمنها, المهم تختاري انسان أمين وقوي بما فيه الكفاية عشان يسوي المسألة. هزت رأسها نافية بعنف وقالت : – يادكتور كلامك مش منطقي, مجرد جوازي هيديهم سبب ينفذوا تهديدهم وياخدوا ملك والمحكمة ممكن تحكم لهم لأني اتجوزت وبنتي تضيع مني ده غير إن العرسان مش واقفين ع الباب مستنين الاشارة وهاختار منهم الأمين القوي اللي هيحافظ لي على أملاكي. ابتسم وأجاب : – موضوع المحكمة ده تنسيه, القانون بيدي حق الحضانة في حالة زواج الأم لأمها هي وبعدها أم الزوج, يعني دورهم متأخر أوي في القايمة, وكمان السبب اللي هما عاوزين ياخدوا بنتك عشانه خلاص هيكون مفيش لأن الأرض باسم جوزك ومش هيقدروا يعملوا حاجة إلا بالقانون عشان أرضهم ترجع لهم, والعريس سهل انت انسانة تستاهلي كل خير وكتير يتمنوكي. تراجعت في مقعدها تفكر, أهذا ممكن بالفعل لكن أمرا ما قفز لذهنها فجأة فقالت : – طيب ماهي مامة حسام الله يرحمه ممكن تاخد مني ملك, أنا وعدتها إن مستحيل حد تاني يدخل حياتي بعد حسام. حملق فيها بدهشة وهتف : – وعدتيها بإيه ؟؟ ده اللي هو إزاي يعني ؟ تنهدت وقلبت كفيها في قلة حيلة فاستطرد : – والله ياجمانة ماانا عارف اقولك ايه, الحقيقة يعني ده تصرف طايش جدا, ووعد زي ده ماينفعش من الأساس لأنه فوق طاقة أي حد, وبعدين إنت مش مركزة ليه بأقولك بعدك إنت الحضانة لمامتك مش لمامته . شردت تفكر في الأمر, أهذا ممكن؟ أتزوج؟ رجلا آخر يفتح الباب الموصد وقفله الذي علاه الصدأ, هل قلبي سيستجيب؟ لم تستسغ الفكرة مطلقا فهزت رأسها بعنف وكأنها تطردها منها وقالت بلهجة قاطعة : – مستحيل يا دكتور آدم, ما أقدرش أعمل حاجة زي دي أبدا. قام من كرسيه وهو يقول : – عموما فكري في الموضوع واستشيري حد بتاع قانون يفتيكي أكتر, ولو ع العريس ياستي .. أنا موجود. قالها وضحك بشدة في حين شعرت هي بالصدمة وهي تتطلع إليه في ذهول لم يكن بأقل من الذهول المرتسم على وجه أخيه وهو يستمع للحوار الدائر بينهما, أما هو فأنهى ضحكته وقال : – مالك مزبهلة كده ليه؟ مش عاجبك؟ ده انا دكتور جامعي ومدير محترم في شركة كبيرة وأرمل وعندي ابن. ثم ضحك مرة أخرى وهي على نفس الحال من الذهول لكنه استطرد رافعا الحرج عنها : – ايه يابنتي باهزر, عملتي كده ليه ؟ وهو يتطلع إليها باستغراب فابتسمت قائلة بنوع من الخجل : – دكتور آدم بأشوف من حضرتك جانب ماكنتش متعودة عليه أيام الجامعة. ضحك مرة أخرى ثم قال في شرود كأنه يتذكر أمرا ما : – كلنا بنتغير يا جمانة, هاخد ايه من البوز والوش الخشب يعني وبعدين انت اختي الصغيرة باغلس عليكي شوية. ابتسمت وردت : – ده شرف لي والله يادكتور. تنهد وقال بسرعة : – عموما فكري في اقتراحي واسألي أختك, إنت قلت لي إنها محامية !! ولو وافقت نبتدي نسعى في الموضوع وننزل طلبك في باب أريد عريسا في أي مجلة. قالها وقهقه عاليا فابتسمت هي الأخرى, في حين كان الغضب يتجسد على وجه (أدهم) وهو يعود لمكتبه بخطوات سريعة حانقة. رواية خارج أسوار القلب. بقلم / صابرين الديب. الفصل الرابع عشر _____________ عندما عاد (أدهم) لمكتبه حانقا, كان يشعر بتوتر لا مثيل له ولا يدري له سببا مما أثار غيظه أكثر, لما يغضب بسبب ماسمع في مكتب أخيه, وحتى عرض (آدم) للزواج من (جمانة) وإن كان جادا ما الذي يسيئه فيه ؟ فما بالك به يمزح ! قرر أن يدفن رأسه في أوراقه ويعمل ليشغل ذهنه, وفي الخارج كانت (سهام) تحادث (دينا) على هاتفها قائلة : – تعالي بس معلش شوية, في صورة هنا نسيتيها من المرة الي فاتت من بتوع الحفلة تعالي خديها .. لا لا صورة من بتوعك مع الباشمهندس أدهم .. ايه يابنتي بتصرخي كده ليه ؟ .. طيب طيب تعالي مستنياكي. أغلقت الخط ومالت تفتح الدرج الذي تركت فيه الصورة وأخرجتها ووضعتها مقلوبة أمامها على المكتب لتعطيها إياها عند مجيئها, ارتفع بعدها رنين هاتف المكتب الداخلي فالتقطت سماعته في آلية وهي تقول : – أيوة يا باشمهندس ؟ جاءها صوته صارما : – هاتي لي ملف شركة النيل بسرعة. أجابت : – حاضر يافندم, دقيقة واحدة. وضعت السماعة ومالت تبحث عن الملف على المكتب حتى وجدته فالتقطته بسرعة وهي تتجه لمكتب (أدهم) لكنه أفلت من يدها بسبب العجلة وتناثرت بضع وريقات منه فجمعتها سريعا ووضعتها بداخل الملف واتجهت للمكتب, طرقت الباب ثم دخلت لتناول (أدهم) الغاضب الملف فتناوله منها بنوع من العنف أخافها ولم ينطق لكنها تراجعت بسرعة عائدة لمكتبها في انتظار مجيء (دينا) , دلفت (دينا) للمكان متعجلة وهتفت فور دخولها : – فين الصورة يا سهام ؟ مالت (سهام) تلتقط الصورة من فوق مكتبها قائلة : – أهي !! أصابتها الدهشة وهي تبحث عنها ولم تجدها في حين توترت (دينا) للغاية وكادت تصرخ وهي تسألها : – هي فين يا سهام ؟ شعرت (سهام) بالحيرة وهي تجيب وتستمر في البحث : – كانت هنا لسه مطلعاها من الدرج حالا بعد ماكلمتك, راحت فين دي ؟ حاولت (دينا) مشاركتها البحث وتساءلت وتوترها في ازدياد : – آخر مرة كانت فين ؟ أشارت (سهام) لمكتبها وردت : – هنا. قبل أن تسأل (دينا) المزيد من الأسئلة ارتفع رنين الهاتف فالتقطته وقبل أن ترد أتاها صوت (أدهم) صارخا في غضب شديد : – ابعتي لي الآنسة دينا مصطفى حالا. سقط قلبها بين قدميها وهي تتطلع لـ (دينا) التي وصلتها صرخته من خلف باب مكتبه فاتسعت عيناها في ذعر, وقالت : – انت اديتهاله ؟ هزت (سهام) رأسها نفيا بعنف وأجابت : – لا طبعا دي حاجة تخصكم انا مستحيل اديهاله, ياربي شكلها اتحطت بالغلط في الملف اللي دخلته له من شوية, أنا آسفة يا دينا عارفة إنك كنت عاوزة توريهم له بنفسك. لم تدر (دينا) بما تجيبها هل تنكر وتصرخ فيها فتفهم اللعبة أم تصمت وتتلقى اللوم من (أدهم), قررت الصمت وهي تتجه لمكتب (أدهم) في تردد, طرقت الباب في خفوت فأتاها صوته الغاضب آمرا بالدخول, فتحت الباب وأطلت منه فرفع عينيه إليها وقال في غضب شديد : – اتفضلي يا آنسة دينا. دخلت في خوف فوقف بعنف خلف مكتبه مما جعلها تتراجع للخلف بسرعة لكنه رمى الصورة في وجهها وهو يهتف في صرامة شديدة : – ممكن أفهم ايه دي ؟ قالت بارتباك : – هاشرح لك يا أدهم. صرخ : – اشرحي, فهميني وإلا قسما بالله لا أكون جرك من شعرك قدام الناس لحد ماأرميكي قدام أبوكي عشان يشوف القذارة اللي انت عاملاها دي يابنت العائلات المحترمة. شعرت بالخوف الشديد, لما هو بهذا الشكل ومنذ متى وهو همجي قاس هكذا؟ كان غضبه يبدو مضاعفا زائدا عن الحد, ازدردت ريقها في صعوبة وقالت بصوت خفيض : – أدهم إنت عارف إني بحبك, وانت مش بتشجعني أبدا, اعتبرني مراهقة وغلطت, نفسها في حاجة تجمع بينها وبين اللي تحبه وبتنام تحلم بيه ليل ونهار, مجرد حاجة أطبطب بيها على قلبي. عقد حاجبيه في غضب واقترب منها حتى وقف أمامها تماما وظهرها للحائط ثم قال في صرامة شديدة : – حب؟ انت بتضحكي على مين يادينا ؟ حب ايه ده ؟ بصي كويس للصورة ؟ القرف اللي فيها ده مش حب, ده حرام, حاجة تغضب ربنا وبس, جبتي واحد وفضلتي تتلزقي فيه طول الحفلة والله أعلم عملتوا ايه مع بعض تاني وفي الاخر تحطي صورتي بداله ؟ ايه القرف اللي انت فيه ده؟ مش مكسوفة من نفسك بالله عليكي ؟ طب حتى احترمي أهلك ووالدك الراجل المحترم وسمعته بين الناس, لبسك زبالة وأخلاقك زبالة وتصرفاتك طايشة ومالكيش لجام وجاية تكلميني عن الحب؟ تراجع للخلف ووقف أمام مكتبه وقال بحزم دون أن يعطيها فرصة للرد : – اتفضلي على مكتبك تكتبي استقالتك وتكون عندي في ظرف خمس دقايق وياريت مااشوفش وشك تاني لأن هيكون لي معاكي تصرف مش هيعجبك. أخيرا نطقت وهي تهتف في خوف : – أدهم إنت بتقول ايه؟ أنا اعتذرت لك, ليه بتعمل كده ؟ التفت إليها صارخا : – قلت استقالتك تكون قدامي في ظرف خمس دقايق, اتفضلي. ازداد خوفها فانطلقت خارجة من المكان, بكت وشعرت بالغضب والغيظ والحقد يغلي بداخلها وأقسمت ألا ينتهي الأمر بسلام أبدا. بعد خروجها علا صوت (أدهم) الغاضب صارخا عبر الباب المفتوح : – آنسة (سهام) تعالي هنا. توترت (سهام) بشدة واتجهت إليه بخطى مترددة حتى رآها فهتف فيها غاضبا : – ممكن أعرف الصورة القذرة دي جت في الملف إزاي ؟ ارتبكت (سهام) وترددت فصاح غاضبا : – ردي علي. قالت بخفوت : – دينا كانت بتفرجنا على صور الحفلة وكانت مصممة نشوفها ودول كانوا في وسطهم وشفناهم غصب عننا ودي وقعت منها وكنت لسه هارجعها لها لما حضرتك طلبت الملف واتحطت فيه بالغلط . عقد حاجبيه بشدة وتساءل : – بتفرجكوا مين ؟ ودول ايه هما كم صورة ؟ ردت بتردد : – أنا وجمانة, ومااعرفش كم صورة بس احنا شفنا 3 وفيديو. اتسعت عيناه وبدا غضبه شيطانيا وصرخ بانفعال مفرغا كل الغضب المحبوس بداخله في وجهها : – جمانة ؟ كمان ؟ وفيديو ؟ كان فيه ايه ؟ خفضت عينيها في خجل فكون صورة في ذهنه عن محتواه مما جعل غضبه يشتعل أكثر, ثم قال في صرامة مخيفة : – تاني مرة يا آنسة سهام لما أي حد يعرض عليكي الكلام في أي موضوع شخصي ترفضي, هنا مكان عمل مش النادي, ولما تشوفي حاجة ممكن تضر رئيسك تبلغيه بيها فورا مش تحتفظي بالصور عشان ترجعيها لاصحابها. تلجلجت وقالت مدافعة : – يافندم الصور فيها موضوع شخصي وحاجات مستحيل كنت اقدر اتكلم فيها مع حضرتك, يعني حضرتك متخيل إني ممكن أجيب صورة زي دي وأديهالك واقولك اتفضل دي من دينا, مستحيل طبعا. حدق فيها بدهشة كأنه يراها لأول مرة, انتبه لحمرة الخجل التي تغلف وجنتيها وعلم أنها على حق فقال بحزم وإن كان قد هدأ بعض الشيء : – خلاص يا آنسة سهام, اتفضلي إنت وموضوع زي ده مايتكررش تاني. أومأت (سهام) برأسها ثم التفتت لتخرج من المكتب بسرعة وقبل أن تصل للباب وجدت (آدم) يظهر أمامها هاتفا : – خير يا أدهم صوتك جايب آخر الممر ليه كده ؟ نظر إليه (أدهم) بنظرة غاضبة, وتساءل بداخله : أهذا وقت مناسب لتظهر فيه يا أخي العزيز ؟ لم يرد على سؤاله والتفت يتطلع للخارج من النافذة الضخمة في مكتبه وهو يزفر في حنق شديد, فاقترب منه (آدم) وربت على كتفه في رفق وسأله مرة أخرى بهدوء : – مالك يابني ؟ زعلان ليه ؟ ايه اللي حصل ؟ زفر (أدهم) مرة أخرى والتفت لأخيه هاتفا في غضب : – الآنسة دينا, عملت عملة مهببة. تساءل أخيه : – خير ؟ عملت ايه المصيبة دي ؟ التفت يتطلع للصورة الملقاة أرضا ثم أشار إليها في صمت, نظر أخيه في اتجاه إشارته ليجد الصورة, اقترب منها ثم التقطها وهو يتطلع إليها في صدمة هاتفا : – ايه ده ؟ ايه اللي انت عامله معاها ده يا أدهم ؟ وايه اللبس الزبالة ده ؟ اغتاظ (أدهم) أكثر وهو يرد : – بأقولك ايه أنا مش ناقص, بالعقل كده تفتكر إني ممكن أعمل حاجة زي دي؟ الهانم في حفلة باباها من كم يوم جابت واحد صاحبها وفضلت ترقص معاه بطريقة زفت وفي الآخر حطت صورتي بداله, والمصيبة الأكبر إنها جت هنا عشان تخلي سهام وجمانة يشوفوها. اندهش (آدم) وتساءل : – جمانة ؟ واشمعنى جمانة وايه اللي خلاها تشوفها أصلا ؟ (أدهم) بعصبية : – أنا عارف بقى, أنا هاتجنن أصلا وكان نفسي أخنقها بايدي. فكر (آدم) بهدوء لثوان, ثم قال : – طيب سهام وسكرتيرتك وطبيعي تكون في مكتبك هنا, إنما ايه جمع بينها وبين جمانة في وقت الصور ده بالذات. هز (أدهم) كتفيه وأجاب : – يمكن صدفة. رفع (آدم) حاجبيه في سخرية وقال : – صدفة مين يابني؟ أكيد الموضوع فيه إن, بس هي إيه مش عارف, غالبا الموضوع ده من يومين لما كنا هنقعد ننتاقش في التعديلات على ملف المناقصة, لما جيت لقيت جمانة مع سهام ودينا ولما شافتني ادتني الملف وهربت من قدامي بسرعة. قال (أدهم) بغيظ : – هربت ؟ المهم إن شكلي بقى زي الزفت قدام سهام وجمانة وطلعت واحد سافل ماعندوش أخلاق والله أعلم قالت لهم ايه تاني عننا, الموقف اتصلح مع سهام إنما جمانة هاقولها ايه؟ تظاهر (آدم) بعدم الفهم وهو يسأل : – وتقولها ليه أصلا, يفرق ايه تعرف حاجة عن حياتك الشخصية أو ماتعرفش؟ أدار (أدهم) وجهه للنافذة مرة أخرى وهو يقول : – ولا حاجة بس مااحبش صورتي تبقى بالشكل ده قدام أي حد. تطلع إليه (آدم) في صمت وهو يستشف شيئا من كلام أخيه لكنه أراد التأكد منه ولم يدر كيف؟ فصمت, أما (أدهم) فعاد يلتفت إليه مرة وتساءل متظاهرا بعدم الاهتمام : – عاملة ايه معاك جمانة في المكتب ؟ أجاب باقتضاب محاولا استفزازه : – هايلة . شعر بالغيظ يكتنفه مرة أخرى فأدار وجهه للنافذة مجددا وهو يزفر في حنق جعل الابتسامة تعلو شفتي أخيه, لكنه عاد يسأل دون أن يلتفت إليه : – بتساعدك زي ماكنت متوقع ولا ايه ؟ أراد (آدم) استفزازه أكثر فكسى لهجته بصبغة حالمة وقال ممتدحا : – بأقولك هايلة, من كل الجوانب, انسانة ممتازة. التفت (أدهم) يحدق فيه بدهشة ممتزجة بالغضب والذي بدا واضحا على ملامحه كما توقع (آدم) فأكمل برومانسية : – مش عارف حاسس إني خلاص ماعدتش أقدر أستغنى عنها. اتسعت عينا (أدهم) وتساءل في قلق : – قصدك ايه ؟ أجاب (آدم) وهو يهز كتفيه ببساطة : – بافكر أعرض عليها الجواز. تراجع (أدهم) للخلف بعنف, فارق كبير بين المزح والجد, هنا (آدم) لا يمزح إنه بالفعل يريد الزواج منها ؟ خفض عينيه في ألم وسأله بخفوت : – بتحبها ؟ شعر (آدم) بما يعتمل في صدر أخيه فخفف عنه قليلا وهو يجيب : – مش لازم يكون حب زي حب الرجل للست العادي, بس هي فعلا انسانة كويسة جدا. عاد الأمل يتردد في صدر (أدهم) مما جعله يسأل مرة أخرى : – بس كده ؟ مفيش حب ؟ وهتعيش معاها إزاي ؟ هز كتفيه وهو يرد : – عادي زي ناس كتير والحب ييجي بعدين. التفت للنافذة مرة أخرى مفكرا في صمت استفز (آدم) فاقترب منه وأدار وجهه إليه وهو يقول بلهجة مازحة : – يابني اعترف وريح دماغك بدل القلق ده . تساءل (أدهم) بدهشة : – أعترف بايه ؟ رفع (آدم) حاجبيه ونظر إليه في صمت جعله يخفض عينيه أرضا ويقول في خفوت : – كبر دماغك يا آدم مفيش حاجة من اللي فيها دي حصلت. (آدم) بهدوء : – بجد ؟ صمت (أدهم), هل يرد كاذبا أم ينفي ماقاله للتو ؟ شعر بالحيرة فصمت, مما جعل أخاه يتطلع إليه في حنان شاعرا بحيرته, ثم قال : – لو بتحبها انطق لأنها محتاجاك جنبها. رفع (أدهم) عينيه لأخيه في دهشة من صراحته ولم يستطع الكلام فجذبه (آدم) من يده وهو يقول : – تعالى نقعد وأحكيلك المشكلة اللي فيها والحل اللي اقترحته واللي عارف إنه هيعجبك. ثم قص عليه الأمر باختصار شارحا فكرته, بعدها فكر (أدهم) لدقيقة وهو يشبك أصابعه أمام وجهه ثم قال : – فكرتك غريبة يا آدم, تفتكر ممكن تنجح. أكد عليه قائلا : – أكيد. سأل مرة أخرى : – وايه اللي خلى فكرة عجيبة زي دي تيجي في بالك ؟ مط شفتيه وهو يجيب : – مش عارف, بس حسيتها مناسبة وهتحل المشكلة, ها قلت ايه ؟ (أدهم) بشرود : – قلت ايه في ايه ؟ نهض (آدم) من مكانه وقال : – بقى كده, طيب مع نفسك بقى, أنا راجع مكتبي لجمانة. نظر إليه في غيظ فبادله النظرة بأخرى عابثة جعلته يلف وجهه ثم ابتعد هو في صمت. ________________________ جلس (أدهم) في مكتبه يفكر في شرود, لم يدر كيف خمن أخيه ماقاله, هل يبدو عليه الحب ؟ هل يحبها فعلا ؟ أي نوع من الحب هذا الذي يجعله يسعد باستفزازها وإغضابها ؟ أي حب الذي لا يشعر به إلا عندما ينبهه أحدهم إليه ؟ وتلك الفكرة التي اقترحها (آدم), فكرة مجنونة جعلت أخرى أكثر جنونا تقفز إلى عقله تثيره أكثر وتجبره على تنفيذها , قطع شروده رنين هاتف المكتب المتصل بالاستقبال فنظر إليه في دهشة ثم رفع سماعته قائلا : – أيوة يا حسن خير ؟ أتاه صوت موظف الاستقبال قائلا في عجلة : – أيوة يافندم, في واحد هنا مصمم يدخل الشركة بأي شكل ومتعصب جدا, عاوز يطلع الحسابات عشان يقابل أستاذة جمانة أبو الفتوح. يا إلهي ! ألن ينتهي هذا الأمر ؟ هكذا فكر (أدهم) , كل دقيقة يحدث شئ يتعلق بها حتى كاد يفقد صوابه, طال صمته فأتاه صوت (حسن) مرة أخرى متسائلا : – يافندم! أعمل ايه أطلعه ؟ أفاق من شروده على السؤال الذي استفزه أكثر فرد في عصبية : – تطلعه فين ياحسن ؟ هو نادي ؟ عاوز ايه ده كمان ؟ رد (حسن) بلا اهتمام : – مش عارف يافندم. هنا علا صوت غاضب بجواره يهتف : – انتو بتستهبلوا, بأقولكم عاوز أقابلها هو في ايه ؟ داخل منطقة عسكرية أنا هنا يعني ؟ عقد (أدهم) حاجبيه في غضب بعدما سمع تلك الجملة وقال : – طلعه على مكتبي ياحسن أما نشوف آخرتها. ثم أغلق الخط وهتف في حنق : – ده ايه البلاوي دي ياربي ؟ بعد دقائق لم تطول طُرِق باب مكتبه, فقال في حزم : – ادخل. دلف للمكان شاب متوسط الطول خبيث النظرات, بدا كأنه لم ينم منذ فترة شديد العصبية والغضب وبصحبته أحد أفراد أمن الشركة, سأله (أدهم) بهدوء : – مين حضرتك ؟ أجاب الشاب في عصبية : – أنا دكتور هشام عبدالله, كنت مدير صيدلية جوز جمانة. شعر (أدهم) بغضبه يزداد من طريقة حديث الرجل وذكره لاسمها مجردا هكذا فسأله : – طيب وعاوز ايه حضرتك ؟ دي شركة ومكان عمل وبس مش نادي تتقابلوا فيه . علا صوت (هشام) وهو يقول في عصبية : – ما أنا مش عارف أوصلها, الهانم بتستهبل, بعد ماشلت الصيدلية على كتافي وتعبت فيها وكبرتها جابت واحد ركبته علي ودلدل رجليه وفي الآخر ألشوني منها هما الاتنين عشان يفضى لهم الجو مع بعض. تماسك (أدهم) قدر استطاعته وضم قبضتيه بقوة أسفل المكتب, كان يريد الانقضاض عليه وتحطيم أسنانه بسبب ماقاله والطريقة التي قاله بها, وبسبب ما لمح إليه, بالتأكيد يقصد (حسام) الذي صدم ابنتها بسيارته ثم ملكته مالها بعدها تلك المجنونة, انتابه الغضب أكثر لأنه شعر بالغيرة تجتاح قلبه وتشعل فيه نيرانها لكنه اكتفى بأن يهتف به في غضب : – أيه الكلام الزبالة ده ياحضرت, مش عيب دكتور محترم يتكلم بالطريقة دي على واحدة ست في غيابها, عاوز تتفاهم معاها يبقى بعيد عن الشركة وبمنظرك ده يفضل ماتقربش منها أحسنلك. ثم أشار لرجل الأمن هاتفا في حزم غاضب : – طلعوه بره الشركة وممنوع بعد كده حد يدخل وخصوصا البني آدم ده. ظهرت شرارة الغضب والشر في عيني (هشام) ثم قال بصوت عال : – آآآه , قول كده بقى ؟ الهانم دايرة على حل شعرها وموقعة الرجالة في دباديبها, بتطردني عشانها بدل ماتجيبلي حقي منها, ماشية معاك إنت كمان ؟ لم يشعر (أدهم) بنفسه إلا وهو ينقض عليه ويكيل له لكمة عنيفة في فكه أسقطته أرضا والدماء تنزف من فمه بغزارة ثم انحنى يقبض بعنف على ياقة قميصه وقال في صرامة شديدة وهو ينظر في عينيه : – الحيوان الزبالة اللي زيك مايستاهلش غير كده, واللي بتتكلم عليها دي أشرف منك ومن كل اللي تعرفهم مليون مرة, وقسما بالله لو اتعرضت لها لا تكون فيها نهايتك ؟ فاهم ؟ قالها وهو يحدق في عينيه بصرامة وغضب شديدين أثار الرعب في أوصاله واستشعره (أدهم) فشعر بالتقزز منه, ألقاه أرضا بعنف وهتف في رجل الأمن : – طلعوا الزبالة ده بره. أمسكه رجل الأمن بقوة وهو يصرخ في عصبية محاولا الإفلات منه حين دنا منهما رجل أمن آخر لمساعدة زميله وقاما بجره جرا خارج الشركة وهو يصرخ ويتوعد, كانت (دينا) واقفة قرب بوابة الشركة بعد أن كتبت استقالتها وأرسلتها لمكتب (أدهم) وفي طريقها لمغادرة الشركة مهزومة مدحورة, وقفت تتابع ما يحدث في اهتمام ولفت نظرها صراخه باسم (جمانة), شعرت أن القدر قد ألقى في طريقها بالحبل الذي ستلفه حول عنق (جمانة) حتى يخرج آخر نفس في صدرها, انتظرت حتى أخرجوه من الشركة تماما ثم تبعته بسرعة ولاحظت أنه يتأوه ويمسك بمنديل يمسح به الدماء من فمه, ابتعدا قليلا عن الشركة وما إن اقترب من سيارته حتى نادته هاتفة بأرق نبرة استطاعت أن تضفيها على صوتها : – يا أستاذ لو سمحت. التفت لصاحبة الصوت بعينين ناريتين وما إن رآها بملابسها الفاضحة وجمالها الواضح حتى تبدلت ملامحه وتدلى فكه السفلي في انبهار واشتهاء واضح أثار غرورها فاقتربت منه قائلة في هدوء وهي تمد يدها إليه : – أنا دينا باشتغل مع جمانة في الشركة. تطلع إلى يدها الممدودة لحظة ثم تناولها في لهفة وهو يهتف : – أهلا وسهلا. تركت يدها في يده عمدا وهي تراقب تأثير ذلك عليه ثم قالت في نعومة : – ماعرفتنيش بنفسك طيب ؟ رد مرتبكا وهو يرفع عينيه إليها : – ها .. آه .. اسمي هشام, دكتور صيدلي. قالت في دلال : – طيب يادكتور هشام تسمح لي أعزمك على الغدا ونتكلم شوية في موضوعك مع جمانة وتشرح لي اللي حصل يمكن أقدر أساعدك. كان شَرِهاً للغاية, شرها لها ولأنوثتها الطاغية ولفكرة أن تدفع هي ثمن طعامه فوافق على الفور واتجها إلى سيارتها الفخمة فتطلع إليها في بلاهة ممتزجة بجشع ونهم مما جعلها تدرك أنها بالفعل أمسكت بطرف الخيط الذي ستشده حتى يخنق غريمتها . الفصل الخامس عشر ______________ من أكثر الأيام إرهاقا كان هذا اليوم, توالت فيه الأحداث والصدمات خاصة بعدما علمت أن (هشام) حاول مقابلتها في الشركة لكنه قابل مديرها وعنفه بل وضر,به أيضا, كان الموضوع حديث الشركة كلها مما أشعرها بالخجل, ترى ما الذي حدث والذي يجبره على ض,به وطرده بهذا الشكل؟ وما الذي يهمه من أمرها لكي يتصرف هكذا؟ عادت لمنزلها لتستقبلها صغيرتها بلهفة فانحنت تحملها وتقبل وجنتيها بشغف هاتفة : – ملوكة حبيبة ماما وحشتيني. ضحكت الصغيرة في سعادة ثم بادلت والدتها القبلة وتعلقت برقبتها وهي تتجه للمطبخ, دلفت إليه لتجد والدتها تطهو الطعام وشقيقتها جالسة تطالع بعض الأوراق في اهتمام وتحتسي كوبا كبيرا من النسكافيه, رفعت رأسها إليها وعلت شفتيها ابتسامة باهتة بها الكثير من الانكسار, كم تشعر بالأسى من أجل شقيقتها, تلك التي تراها أما ثانية وملاكا حارسا لها تصبح بهذا الضعف, هي امرأة كغيرها تحتاج للحب والوفاء, لكنها افتقدت كلاهما, بادلت شقيقتها الابتسام وهي تقترب منها وتنحني لتقبل رأسها قائلة : – إزيك يالولو ؟ عاملة ايه النهاردة ؟ نزلتي المحكمة ولا ايه ؟ أجابتها شقيقتها بنفس الابتسامة في خفوت : – أيوة نزلت, كان عندي شوية حاجات ضروري اخلصها وكان لازم أنزل. ربتت على كتفها في حنان ثم أجلست طفلتها على الكرسي المقابل لخالتها واتجهت لوالدتها متسائلة : – ها يا ست الكل, هناكل ايه من ايديك الحلوة النهاردة ؟ ابتسمت الأم وهي تجيب : – عاملالك صينية الفراخ اللي بتحبيها إنت وأختك, غيري يلا وتعالي ساعديني الكلام الحلو مابيغسلش المواعين. ضحكت (جمانة) واتسعت ابتسامة (لمياء) قليلا, ثم قالت (جمانة) وهي متجهة لغرفتها : – بس كده, اؤمريني ياقمر إنتي. دخلت غرفتها وأغلقت الباب خلفها وهي تتنهد في حزن ثم قالت من أعماق قلبها : – يارب اسعد لميا وارزقها بالزوج الصالح والذرية الصالحة, إنت عارف هي طيبة وحنينة قد ايه, اجبر قلبها يارب وفرحها. ثم أبدلت ملابسها وغسلت وجهها وتوضأت ثم عادت لغرفتها لتصلي العصر بعدها اتجهت عائدة للمطبخ, وجدت والدتها جالسة في مقابلة شقيقتها وتحمل الصغيرة على قدميها, حاولت كسر الصمت المخيم على المكان فقالت بمرح : – عرفتوا آخر خبر ؟ رفعت (لمياء) رأسها وتطلعت إليها متسائلة وترجمت الأم السؤال لصوت مسموع قائلة : – خير ياجوجو ؟ هزت كتفيها وهي ترد في مرح : – دكتور آدم مديري اللي كان أستاذي في الجامعة, طلع لي بحل جهنمي لمشكلة ملك . شعرت الأم بالأمل واستمرت (لمياء) في النظر إليها باهتمام, كان حديث (جمانة) يدل على أنها تسخر من الفكرة ولا تقبلها حين أجابت : – بيقولي اتجوزي. عقدت (لمياء) حاجبيها في دهشة ثم صمتت في تفكير عندما هتفت الأم : – اتجوزي ؟؟ هو ده الحل ؟ إزاي يعني ؟ جوازك في الوقت الحالي نقطة ضعف هيمسكوا فيها عشان ياخدوا البنت. أومأت (جمانة) برأسها موافقة وردت : – أيوة ما أنا قلت له كده. قالت الأم باستغراب : – حل مش منطقي أبدا. هنا علا صوت (لمياء) وهي تقول بهدوء : – ليه مش منطقي يا ماما ؟ بالعكس الفكرة عجبتني جدا, جواز جمانة حاليا هيعتبر خط دفاع وهجوم في نفس الوقت, لو باعت الأرض لجوزها حتى لو بعقد صوري كده مشكلة الأرض اتنقلت لعهدته وهو يتصرف فيها, وبالتالي الحاجة اللي عاملة أزمة من الأول مش هتبقى متعلقة بجمانة إنما بشخص تاني يقدر يتصرف معاهم ويجيب حقها, ودي نقطة هجوم وفي نفس الوقت يحميها منهم ودي نقطة دفاع ده غير إنه حتى في حالة جوازها الحضانة مش من حقهم. تطلعت إليها شقيقتها في دهشة وصمتت الأم مفكرة, استغربت (جمانة) للغاية فما قالته (لمياء) كان هو ما طرحه (آدم) بالضبط لكنها نسقته بشكل أكثر منطقية وجعلته أكثر قابلية لإقناعها, قد تتزوج زواجا صوريا من شخص ما حتى لو دفعت له مالا ليقوم بالمهمة, لا يشترط ان يكون الزواج تاما وترتبط بشخص لا تحبه او تريده خاصة مع حالة قفل قلبها الذي علاه الصدأ حتى التحم ببعضه البعض ولم يعد من الممكن فتحه, قالت بعد صمت : – ده نفس كلام دكتور آدم, بس إنت رتبتيه صح. هزت (لمياء) كتفيها وقالت : – الفكرة فعلا معقولة جدا. ردت الأم : – مش عارفة يابنات مش مطمنة. ضحكت (جمانة) وهتفت : – ياماما ماتقلقيش, يعني حتى لو قلت هانفذ الفكرة خلاص الشخص الهايل السوبر اللي هيحميني منهم واقف ع الباب. قالت (لمياء) بهدوء : – لازم يكون بيحبك عشان يدافع عنك. تطلعت إليها في دهشة, ها هو عائق آخر أمام تنفيذ الخطة, من الذي يحبها ؟ ولو وجد فهل سيقبل زواجا صوريا, كما يقولون مجرد حبر على ورق يجبر بعده على الوقوف في وجه المدفع ؟ قاطع أفكارها صوت والدتها وهي تقول : – ايه رأيكم في دكتور حسام؟ رفعت عينيها فيما يشبه الصدمة لوالدتها في حين هزت (لمياء) كتفيها في صمت, استطردت الأم : – إنسان هايل وأخلاقه عالية وشهم, ومعجب بيكي. اتسعت عيناها وهي تهتف : – معجب بيا ؟ أومأت الأم برأسها في صمت فسألتها : – وإنت عرفتي ازاي يا ماما ؟ ابتسمت لسذاجة ابنتها وردت : – واضح عليه ياجمانة, إنت بس اللي قافلة قلبك وعقلك وعنيكي ومش عاوزة تشوفي حاجة. شعرت بالغضب لكلام والدتها فقالت في عصبية : – وحتى لو معجب بيا ياماما مش هاقوله تعالى اتجوزني ودافع عني قدام أهل جوزي اللي مات وحط نفسك في وش المدفع عشان تتعرض للخطر بدالي. ردت الأم بصبر : – اللي بيحب حد مش محتاج إنه يطلب منه يحميه عشان هو هيحميه فعلا من نفسه. هزت (جمانة) رأسها في عنف وقالت رافضة : – مستحيل, أنا مش فاهمة بتفكروا إزاي ؟ أتجوز بعد حسام ؟ وعشان ايه فلوس وأرض ؟ ماتغور ؟ قالت (لمياء) بشئ من الحزم : – إنت بتهرجي يا جمانة ! هي مسألة فلوس وبس ؟ دي أرض بنتك وعشان إنت وصية عليها فإنت مسئولة قدام ربنا عن مالها وبتساعديهم ياكلوا مال اليتيم ودي تعتبر شراكة في الذنب. صمتت (جمانة) وشعرت بالقلق من كلام أختها, لم تفكر في هذا الجانب من قبل, لكنها ردت بعدها بعناد : – ربنا عالم بالحال يا لميا وعارف إني مضطرة عشان احافظ على بنتي نفسها. ردت (لمياء) بحزم أكبر : – بس كان قدامك حل ورفضتيه وضيعتي حقها وخلاص, ده غير إن مفيش أي محكمة هتديكي الإذن إنك تبيعي الأرض بسعر بخس .. شعرت بالغيظ من منطق أختها, هاهي تقنعها وببساطة مرة اخرى, تذكرت وعدها لوالدة زوجها, كيف تخلفه, لما يتحدثون عن زواجها وكأنه أمر طبيعي مسلم به, كأن زواجها يمكن أن يحدث في الغد وأن الرجل متاح فورا للزواج ؟ من هو هذا الرجل ؟ كيف ستتقبل أمرا كهذا ؟ رجل آخر في قلبها, لا .. في حياتها مع صغيرتها, هل هذا ممكن؟ بعد صمت دام طويلا قالت في شرود : – طيب ووعدي؟ عقدت الأم حاجبيها في غيظ وقد فهمت ماتقصده ابنتها في حين تساءلت (لمياء) في دهشة : – وعد ايه ؟ نظرت إليها بحزن, كانت تعلم أن الأمر سيغضب شقيقتها للغاية لكن ما باليد حيلة لذلك قالت بتردد : – وعدي لماما راضية إني مستحيل أتجوز بعد حسام الله يرحمه. اتسعت عينا شقيقتها في صدمة, لم تجد ما تقوله وارتج عليها لثوان صرخت بعدها : – نعم ؟ انت اتجننتي يا جمانة ؟ إزاي تدي وعد زي ده ؟ ده حتى مش عشانك لا عشانها ؟ انت فاكرة وعدك ليها صح ؟ تفتكري لو خلفتي وعدك هي هيكون شعورها ؟ هتحس بخيانة ؟ بقهر ؟ بمو*ت ابنها وضياعه منها للمرة التانية لما تضيعي منها إنت كمان ؟ صمتت لحظة لتلتقط انفاسها ثم عادت تقول بصوت أهدأ : – جمانة مش من حقك توعدي إنك توقفي حياتك على شخص, حتى لو إنت عاوزة ده, ممكن تاخديه قرار براحتك بس في أي وقت ممكن يتلغي لأي سبب, إنما الوعد .. خلف الوعد ده حاجة مش بسيطة, لازم تروحي لطنط راضية وتتكلمي معاها وتشرحي لها المشكلة عشان تحلك من وعدك ده. ردت (جمانة) بعصبية : – ازاي يعني يا لميا عاوزاني أروح اقولها معلش مش هاقدر احافظ على وعدي وبادور على عريس. زفرت (لمياء) في حنق وقالت : – انت بتستهبلي يعني, هو في حد يقول كده ؟ هتشرحي لها الموقف وتفهميها إنك خايفة وانك اتعرض عليكي حل كذا وكذا وانت مش عارفة تعملي ايه, وبعدين شوفي رأيها, وحاولي تختاري كلامك صح عشان ماتفهمكيش غلط, واوعي تديها وعد بحاجة مجنونة تانية, سيبي الأيام تمشي زي ماهي. عقدت (جمانة) حاجبيها في تفكير ووالدتها تتطلع إليها في صمت وعادت شقيقتها تدفن رأسها في اوراقها, ثم زفرت في ضيق وقالت : – هاشوف, أنا مش عارفة هاواجهها إزاي؟ بس ده مش معناه إني موافقة على فكرة الجواز أصلا, ده غير إن فعلا مفيش حد يصلح اروح اطلب ايده. هزت شقيقتها رأسها في غيظ ولم ترق لها الدعابة في حين قالت الأم : – سيبيها على الله ياجمانة, المهم تكلمي راضية في الموضوع يمكن ع الاقل تكلم ولاد جوزها يبعدوا عننا ولو إني عارفة إنهم مالهمش علاقة ببعض للدرجة. أومأت برأسها في صمت وجلست تفكر فيما ستقول لها عندما تزورها و إلى أي مدى سيؤلمها الأمر ! . ____________________________ في ذلك اليوم قررت (جمانة) الذهاب لوالدة زوجها الراحل, لن تصطحب صغيرتها معها فهي تريد الكلام بحرية ولا تريد لابنتها ان تشاهد جدتها حزينة باكية والسبب أمها, صلت المغرب وارتدت ملابسها على عجالة وتركت الصغيرة مع خالتها التي نظرت لها نظرة طويلة بادلتها إياها وكأن حديثا مطولا دار بين أعينهما خفضت بعده (جمانة) عينيها في صمت وهي تطبع قبلة على رأس ابنتها وتغادر المكان, قادت سيارتها في شرود شديد حتى كادت تصطدم بأخرى في إحدى الإشارات لكنها توقفت في آخر لحظة وهي تتنهد بعمق وارتباك, التقطت هاتفها تتطلع للساعة بدون سبب ثم عادت تقودها مرة أخرى حتى وصلت لوجهتها, بعد الترحاب والسؤال عن الأحوال والصغيرة التي حزنت جدتها أنها لم تأت قصت (جمانة) الأمر كله من بدايته على السيدة, حكت لها كم تتألم وكم تخاف, قالت لها عن التهديدات التي هددها بها أخا زوجها وأنه سيأخذ صغيرتها منها مهما حدث ومهما فعل لتصبح الأرض كلها ملكهم للأبد, بكت بشدة عندما تذكرت وشعرت بالخوف يغزو قلبها مهشما ضلوعها طاعنا إياه, واستها السيدة كثيرا وشعرت بالحيرة هي الأخرى, فلم تكن تملك من الأمر شيئا, ماذا لو أساؤوا لسمعة والدتها ليأخذوها منها, ألم يفعلوا هذا معها بعدما تزوجت والدهم, والدهم الحنون الطيب الذي لم يصدق الأمر ونزح بها للقاهرة لتستقر هناك هي وصغيرها (حسام), (حسام) الذي شعر أخويه دوما بالغيرة منه والحقد عليه خاصة بعد تخرجه من كلية الصيدلة وتملكه لصيدلية خاصة كهدية من والده, (حسام) الذي كان قرة عين أبيه والمدلل عنده والذي كان دوما يلبي له طلباته ويفخر به في كل مكان, (حسام) الذي لم يختلف مع والده في أمر سوى زواجه من (جمانة) التي أحبها ورفضها والده آمرا ولده بالزواج من ابنة شقيقه حتى وافق على فراش المو*ت كي لا يكسر قلب صغيره, الصغير الذي لم يعترف به أخويه ولولا بقية من صلة دم وقانون لما سمحوا له بأن يرث والده, طفلها هي الذي ضاع منها وفطر قلبها عليه والآن يأتي اخويه ليأخذوا منهما ما تبقى منه, أي قسوة تلك ؟ أفاقت من ذكرياتها على مرأى دموع (جمانة) التي أغرقت وجهها, الفتاة القوية التي أحبت ابنها وعشقها هو حتى النخاع, ترى كم تؤلمه دموعها الآن ؟ ما الحل يارب, ربتت على كتفها في رفق واقتربت منها تضمها لصدرها فاستكانت (جمانة) بين ذراعيها, همست الحماة بحنان : – ماتخافيش ياجمانة, ربنا معانا أكيد, أنا عارفة هما ممكن يعملوا ايه, لكن إن شاء الله مش هيقدروا, خلي عندك أمل في ربنا كبير. ابتسمت (جمانة) وهي تشعر بحنان السيدة وشعرت بالأسى هل تخبرها بالحل المطروح عليها ؟ هل سيؤلمها كثيرا ؟ ماذا تفعل ؟ لما لا تبيع الأرض وتنهي الأمر ؟ ولكن لمن ومن سيحميها منهم إن فعلت ؟ قالت بعد صمت طال : – ماما, لميا قالت لي قانونا مايقدروش ياخدوها مني وإن الأحق بكده هو أمي بعدها إنتي لو هيلجأوا للقانون. ابتسمت السيدة في حزن وهي تقول : – قانون ايه يابنتي؟ دول يهمهم الأرض وأملاكهم وبس حتى لو عملوا ايه . أكملت (جمانة) وكأنها لم تسمع ماقالته : – اتعرض علي حل للمشكلة يا ماما بس أنا مش عاوزاه, حاجة ماكنتش اتصور إني أبقى مضطرة أعملها في يوم من الأيام عشان أحافظ على بنتي وأرضها. أبعدتها السيدة عن صدرها وتطلعت إليها بقلق وهي تتساءل : – حل ايه يا حبيبتي ؟ أخذت (جمانة) نفسا عميقا وأجابت : – الجواز. قالتها وصمتت لترى وقع الكلمة على حماتها, أما السيدة فقد اتسعت عيناها في نوع من الذعر وارتدت مبتعدة عنها بشيء من العنف وهي تنظر إليها في صدمة عارمة, أهذا هو ما توصلت إليها يا زوجة الغالي ؟ تُمَلٌكين رجلا آخر من نفسك التي كانت ملكا لصغيري ؟ هل فتح قلبك لغيره ولم تستطيعي الصبر؟ قلقت (جمانة) للغاية من رد فعلها, نعم ستفهمها بطريقة خاطئة وتحزن وربما تكرهها وتأخذ هي صغيرتها منها, ظلتا صامتتين تتطلع كل منهما للأخرى , اجتعمت العيون على الخوف والقلق والحزن, أخيرا نطقت السيدة : – جواز يا جمانة ؟ وهان عليك تقوليها لي كده ؟ هان عليك حسام ؟ بكت (جمانة) مرة أخرى وردت ودموعها تغرق حروفها : – لا طبعا يا ماما, أنا كده تبقى هانت علي نفسي, نفسي اللي هي لحسام وبس, قلبي اللي ماحبش حد غيره ولا اتعلق إلا بيه, أنا قلت لك إنه حل مطروح ماقلتش إني هانفذه, أنا لا عاوزاه ولا حتى اعرف حد ممكن ينفع يتحمل مسئولية زي دي. لم تفهم السيدة ما قالت فتطلعت إليها بتساؤل لم يخلو من التأنيب جعلها تكمل : – الحل كان اتجوز واحد ابيع له الارض لو حتى بعقد صوري مع ضمان حقي أنا وبنتي, وهو يتفاهم معاهم بخصوص بيعها ليهم أو الشراكة وفي نفس الوقت يحميني منهم لو حاولوا يعملوا أي حاجة ممكن تأذيني. رنت كلمات شقيقتها في أذنيها ” واوعي تديها وعد بحاجة مجنونة تانية, سيبي الأيام تمشي زي ماهي” , وعلى الرغم منها لم تستطع تنفيذ كلامها فقالت : – مش لازم الجواز يكون حقيقي يا ماما, ممكن يكون الموضوع برده صوري, ع الأقل لحد ماالمشكلة تتحل والأمور تهدى. نظرت إليها السيدة في صمت, تساءلت بداخلها : أهذا ممكن ؟ ومن الذي يقبل بأمر كهذا وما النفع الذي سيعود عليه منه ؟ شعرت (جمانة) بها فقالت : – ممكن ادفع لأي حد مبلغ مناسب عشان يقوم بالمهمة دي. قالت المرأة بسرعة : – ماينفعش أي حد يا جمانة, إزاي هتأمني أي حد على أملاكك إنت وبنتك ؟ فجأة قفز لذهنها نفس الجملة عندما نطق بها مديرها (أدهم) يقصد بها دكتور (حسام) عندما علم بعمله في صيدلية زوجها, هل يمكن أن يوافق (حسام) على أمر كهذا ؟ أمها تؤكد إعجابه بها, فهل يمكن أن يكون هذا دافعا لوقوفه بجانبها, هل سيرضى بالمال فقط كمقابل أم يطالب بها هي ؟ لم تكن ترغب في التفكير في الأمر فردت : – أكيد هيكون في ضمانات يا ماما, أنا لسه ماوافقتش ع الفكرة أصلا وبأدور على حل تاني لحد ما الصداع بقى ملازمني 24 ساعة, وحتى لو الفكرة دي استقريت عليها مش عارفة مين ممكن يصلح وإزاي هاعرض عليه حاجة زي دي ! لم تدر السيدة بما تجيبها, فقد كان قلبها يبكي في صمت, تحجرت الدموع في مقلتيها وماتت الكلمات على شفتيها ولم تستطع تحريك لسانها ولو بحرف, لا تستطيع مواساتها ومحو خوفها وهي تشاركها إياه, ولا يمكنها موافقتها على فكرتها وأيضا لا تستطيع ترك الأمر للظروف لتضيع منهما الصغيرة بأي شكل ولا تمتلك حلاً آخر لتطرحه عليها, اكتنفتها الحيرة وغرقت في الحزن أكثر, شعرت بقلبها يشيخ فجأة وبمو*ت ابنها يتكرر أمام عينيها وهي أضعف من أن تقوم بشيء ما, صمتت معلنة بصمتها موافقتها واستسلامها للظروف التي أجبرت على المرور بها واستقبلت (جمانة) رسالتها الصامتة في حزن اكتفت بعده بأن تبقى بين ذراعيها لأطول فترة تستشعر فيها رائحة حبيبها الراحل تحيط بها. ____________________________ عادت (جمانة) لمنزلها مرهقة جسديا ونفسيا, كانت تشعر أن روحها محبوسة داخل قفص خالي من الأكسجين, وشعرت بفقدانها القدرة على التنفس, وجدت والدتها وشقيقتها في انتظارها, جلست أمامهما بصمت وهما تتطلعان إليها بقلق وتساؤل أجبت عنه بخفوت : – حسيت إني بأنقلها خبر مو*ت حسام للمرة التانية, قلبي وجعني عليها أوي وعلى الرغم من كده لقيتها أحن مني على نفسي. ابتسمت أمها في حزن وحنان في حين قالت (لمياء) بنوع من القسوة : – قلت لك ياجمانة, بطلي الطيش ده بقى واعقلي وفكري في كل كلمة قبل ماتنطقيها. نظرت لشقيقتها في دهشة, منذ متى تعاملها هكذا, لكنها لم تعلق وتقبلت منها ماقالت, هي على حق وهي أيضا تتألم, فلما لا تقبل, قالت في هدوء : – عموما ربنا يسهل, لو الموضوع موافقين عليه مبدأيا انا مش عارفة أعرضه إزاي على دكتور حسام ؟ قالت الأم : – يعني خلاص وافقتي على حسام؟ ردت بحيرة : – وهو في غيره ؟ ده غير إنه فعلا أمين ووقف جنبنا كتير. ابتسمت الأم في نوع من السعادة وكادت تفرح فعلا بحدوث تلك المشكلة التي اضطرت ابنتها للموافقة على الزواج مرة ثانية, لكنها قالت : – وحتى لو في غيره الدكتور حسام إنسان ممتاز وهيخلي باله منك ومن ملك ده غير إنه بيحبها وعمره ما هيفكر إنها تبعد عنك حتى لو جبتوا ولاد غيرها, وانت مش محتاجة تعرضيه عليه, هو في أول فرصة هيطلب منك الجواز لو حس إنك ممكن توافقي. تطلعت لها (جمانة) في صمت, آه يا أمي كم تحلمين ؟ هل تظنينه زواجا حقيقيا ستحملين منه أحفاداً آخرين ؟ أما (لمياء) فنظرت لها في عمق وفهمت ما تفكر فيه وكم أزعجها هذا, لم تعلق وقامت من مقعدها قائلة : – هأنام انا بقى, تصبحوا على خير. ثم اتجهت لغرفة والدتها التي تشاركها إياها تتابعها عيني الأم والأخت في حزن. ____________________ في اليوم التالي اتجهت (جمانة) لعملها, كانت شاردة طوال الوقت, وبدت نظرة حزينة مرتسمة في عينيها, في منتصف اليوم طلب منها (آدم) أن تأتي لمكتبه لمراجعة ملف هام لمناقصة جديدة, اتجهت لمكتبه في خطوات سريعة ثم طرقت الباب ودخلت تاركة خلفها الباب مفتوحا كالمعتاد, رفع رأسه إليها وقال بابتسامة هادئة : – تعالي يا جمانة, اقعدي عاوزين نخلص الملف ده ونشتغل عليه بجد عشان لو رسيت علينا المناقصة دي هتنقل الشركة نقلة تانية خالص. كانت ابتسامتها باهتة شاردة وهي ترد : – مع حضرتك يادكتور. نظر إليها ليلمح الشرود يرسم ملامح وجهها فسألها: – مالك ؟؟ في مشكلة حصلت تاني مع أهل حسام ؟ هزت رأسها نفيا وهي تجيب : – لا لسه ماعملوش حاجة لحد دلوقتي, والصمت ده هو اللي هيجنني ومخوفني. قال في هدوء : – معاك حق طبعا, الانتظار صعب, فكرت في الحل اللي قلت لك عليه ؟ شردت مرة أخرى وأجابت بخفوت : – أيوة. سألها : – ها وايه رأيك فيه ؟ ابتلعت ريقها في صعوبة وردت : – مش عارفة يادكتور, لميا أختي عجبتها الفكرة جدا بس أنا قلقانة ساعات أقول مفيش قدامي غيرها وساعات أفكر إزاي ممكن أعمل حاجة زي دي وأتجوز بعد حسام الله يرحمه. قال لها بابتسامة أبوية : – جمانة, إنت لسه صغيرة, غيرك كتير وأكبر منك كمان لسه مااتجوزوش أصلا, ليه ماتديش لنفسك ولقلبك فرصة يعيش الحياة من تاني بدل ماانت قافلة عليه كده وبتعذبيه في ذكريات الماضي اللي عمره ما هيرجع تاني ؟ لم ترد, ها هو قلبها يصفعها ويتمسك بتلابيب تلك الذكرى رافضا العبور للغد مع آخر, إنه هو وليس هي, عقلها في جهة وقلبها سلك الجهة المعاكسة تماما, يا إلهي ماذا تفعل ؟ شعر هو بما يعتمل بداخلها فهو نفسه يتملكه ذات الشعور كلما فكر في أنثى أخرى تحل محل زوجته وأم طفله, لم يرغب في المزيد من الذكريات المؤلمة فقال في حزم : – خلينا في المناقصة دلوقتي وربنا يحلها من عنده, بس عاوزك تركزي معايا المناقصة دي اهم من اللي قبلها وعاوز عقلك كله عشان نوصل لأفضل عرض تخليها بتاعتنا زي اللي قبلها. نفضت الذكريات عن رأسها وابتسمت معلنة أن العمل هو الحل بالفعل واندمجت معه في الملف حتى أنهيا جزءا كبيرا منه, وكانت كعادتها مبدعة في أفكارها على النقاط التي تناولتها وعدلتها ليصبح العرض أفضل, شعر هو بإرهاقها يرتسم على وجهها فأغلق المف أمامه وقال : – كفاية كده النهاردة, بكرة نكمل شغل ع الملف عشان نبقى مركزين أكتر. وافقته بإيماءة صامتة ثم وقفت قائلة : – تمام يادكتور هاروح مكتبي بقى عشان عندي شوية حسابات محتاجة أراجعها. أشار لها بأن تذهب وعاد هو لمراجعة الأوراق أمامه مرة ثانية, اتجهت بخطوات متثاقلة عائدة لمكتبها ثم جلست خلفه مغمضة عينيها لدقيقتين أو يزيد, كان الإرهاق يتمكن من كل جزء فيها, من جسدها حتى أناملها ومن قلبها وعقلها وحتى من كل عصب فيها وكل شريان, شعرت بحركة خافتة أمامها ففتحت عينيها في تساؤل لم يلبث أن تحول لشهقة وهي تراه يقف أمامها في صمت متطلعا لوجهها بحنان ارتسم على كل تفصيلة من ملامح وجهه, شعرت بالتوتر فاعتدلت بسرعة متسائلة : – خير حضرتك ؟!! ظل ينظر إليها بنفس النظرة لثوان أخرى مما جعلها تخفض عينيها خجلا لكنه قال بنبرة خشنة بدا فيها وكأنه يكبح جماح مشاعره بصعوبة : – “تتجوزيني”الفصل السادس عشر _____________ كانت الصدمة هي المسيطرة على كل خلية في (جمانة), لم تتوقع مطلقا أن يقدم لها عرضا كهذا, هل هو جاد بالفعل ؟ هل ستحل مشكلتها الآن وبهذه البساطة ؟ مالذي أصابه جعله يتصرف بهذا الجنون ؟ ومالذي أصابها لينتفض قلبها بين ضلوعها بهذا الشكل ؟ شعرت بالخجل يكتنفها وبالصمت يخيم على المكان, لم ينبس هو ببنت شفة, ولم تعلق هي بحرف, صمت مطلق لم يظهر فيه سوى صوت أنفاسهما المضطربة, أخيرا رفعت عينيها إليه فقرأ فيهما الكثير, التردد, الخوف, القلق, الدهشة, وشيء غامض لم يتبينه, لم يفهم من عينيها ردها على طلبه فاستمر صامتا منتظرا جوابها, جوابها الذي عندما أتى لم يكن يتوقعه مطلقا : – ليه ؟ شعر بالتوتر, هل يجيبها بأنه يحبها ؟ بأنها تثير جنونه وأنه عندما يكون حولها يفقد قدرته على التفكير المنطقي السليم ويتصرف بكل عفوية وجموح لم يعهدهما في نفسه قط, بما يجيب حقا ؟ بأنه يغار عليها بشدة تكاد تفجر عقله وتجعله يقت*ل من يقترب منها ؟ بأن استفزازها ورؤيتها غاضبة كطفلة صغيرة يسعده للغاية ؟ بأنه يريد ضمها لصدره وتقبيل دموعها ومحو أحزانها ؟ أنه يريد أن يكون هو رجلها وحاميها وسندها وأن يسكنها بين ضلوعه ؟ طال صمته ففسرته هي بطريقة خاطئة عندما قالت مرة أخرى : – مش لاقي إجابة, السؤال صعب اوي كده ؟ جلس أمامها على الكرسي المقابل للمكتب وقال : – مش عارف ليه, فجأة لقيت حاجة بتقولي لازم تطلب منها الجواز حالا. اندهشت وقالت : – حاجة ؟ لمعت عينيه وأجاب : – أيوة, حاجة مش فاهمها ولا عارفها, حاجة بتخليني مجنون وخلاص. لم تفهم للمرة الثانية فصمتت مرة أخرى, هاهو عرض زواج من رجل تعلم جيدا أن مخيف صارم قادر على حمايتها, لكن هل يمكنها أن تطلب منه أن يكون زوجها على الورق فقط ؟ ماذا سيكون رد فعل ذلك المخيف ؟ هل سيقبل ؟ شعرت بأنه سيتزوجها عنوة إن أراد, وكم دغدغ ذلك أنوثتها وداعب مشاعرها المدفونة, اجتاحها الحزن والقلق مرة أخرى بسبب ما تذكرته فسألته : – طيب ودينا ؟ عقد حاجبيه في تساؤل ودهشة : – دينا مين ؟ رفعت حاجبيها في نوع من الاستنكار والاستهجان ففهم قصدها, وتذكر الموقف السخيف الذي وضعته (دينا) فيه ومعها هي بالذات وكأنها كانت تقصدها بالفعل, فأخذ نفسا عميقا وأجاب : – لو قلت لك هتصدقيني ولا هتصدقي بس اللي شفتيه ؟ ردت بحزم : – لو منطقي أصدقه مش كل حاجة في الزمن ده نشوفها تبقى حقيقة. علت ابتسامة فَرِحة شفتيه وشرح لها الأمر برمته خاتما حديثه وهو يقول : – أنا مستحيل أعمل حاجة زي دي حتى لو مع اللي بأحبها مادام مفيش بيننا رباط شرعي, واللي باحبها مستحيل تكون بشكل دينا او بطريقتها, أكيد هتكون مختلفة وعلى النقيض تماما, هتكون محل ثقتي وفخري بيها قدام الناس كلها. شعرت بنوع من السعادة يداعب قلبها في رفق وهدوء, أعقبها دهشة ملأتها حتى النخاع, لما تشعر بالسعادة ؟ هل هو بالفعل من كانت تتمناه ؟ هل تثق بحمايته ؟ هل تعلم أنه سيكون حارسها الأمين ؟ ولكن كيف ستخبره أن الزواج لن يكون فعليا ؟ مهلا لحظة ! هي تفكر في الأمر وكأنه يعلم بمشكلتها ويعرض عليها الزواج ليكون بجانبها, ماذا لو أنه يعرض عليها زواجا حقيقيا دائما لا ينتهي ؟ رفعت رأسها إليه وقالت في تردد : – انا عندي مشكلة, وكان حلها الجواز, وحتى لو وافقت فأنا … صمتت ولم تستطع أن تكمل حديثها شاعرة بالخجل فحثها قائلا : – المشكلة عارفها وعندي استعداد أحلها من بكرة لو وافقتي, إنما اللي بعد حتى ايه بالظبط ؟ ترددت مرة أخرى ثم حسمت أمرها فجأة وقالت بسرعة : – الجواز هيكون صوري لأني مستحيل أتجوز بعد حسام الله يرحمه, وهيكون لمدة معينة لما تتحل مشكلتي ينتهي. شعر بالصدمة, صمت وطال صمته كثيرا, طال حتى أنها اعتقدت انه يراجع نفسه وسيتراجع عن طلبه وحزنت لذلك وأصابها حزنها بغضب شديد, لما يهمها الأمر إن كان هو لا يعنيها في شيء, قطع تفكيرها صوته الحازم وهو يقول : – ماعنديش مانع, بس بشرط. حملت عينيها تساؤلا أجاب عنه بنفس الحزم : – الجواز هيكون عادي, هأنفذ لك طلبك في موضوع الصوري ده, إنما حكاية النهاية دي سيبيها لوقتها, مفيش حاجة اسمها مدة معينة بعدها ينتهي الجواز. سألته : – ليه ؟ نهض واقفا وهو يرد : – من غير ليه, هو كده وده اللي عندي. ثم صمت لحظة يتطلع إليها فأطرقت برأسها خجلا استطرد بعدها وهو يميل نحوها قليلا : – هأسيبلك وقت تفكري براحتك ومنتظر موافقتك, ولو مش موافقة هاتجوزك غصب عنك. تطلعت إليه في دهشة, وشعرت بتلك الدغدغة في مشاعرها مرة أخرى لكنه عاد يعتدل ثم التفت عائدا لمكتبه فسألته بسرعة عن أمر نسيته في وسط حديثهما : – عرفت مشكلتي منين ؟ التفت إليها مرة أخرى ثم نظر لمكتب (آدم) المغلق وقال بهدوء : – من آدم. سألته بسرعة على الرغم من دهشتها : – وليه قالك عليها ؟ أجاب وهو ينظر في عينيها : – عشان شاف حاجة انا ماكنتش شايفها. لم تفهم وهو لم يعطها فرصة لمزيد من الأسئلة بل استدار مغادرا المكان بسرعة. ________________________________ ظلت (جمانة) بعد مغادرته محدقة في الباب, لم تكن تعي ماحولها جيدا, رن هاتف المكتب الداخلي فلم تشعر به, فتح باب مكتب (آدم) وأطل منه في قلق فوجدها تجلس صامتة تحدق في باب المكتب الخارجي, نظر إليه في عدم فهم ثم ناداها فلم تجبه, وبدا أنها لم تسمعه مطلقا, ناداها بصوت أعلى وهو يقترب منها فانتفضت في مكانها والتفتت تنظر إليه وعيناها لا زالت تحمل صورة (أدهم) فأغمضتهما لحظة ثم فتحتهما لتجد (آدم) يقف أمامها ويبدو عليه القلق, سألها : – مالك يا جمانة؟ سرحانة في ايه أوي كده ؟ في حاجة حصلت؟ أومأت برأسها في صمت فعاد يسأل في قلق : – خير ؟ حصل ايه ؟ أشارت للباب وقالت : – باشمهندس أدهم. تطلع إلى حيث تشير فلم يجد أحدا فعاد يلتفت إليها قائلا : – ماله ؟ كان هنا ؟ أومأت برأسها إيجابا فسأل : – ومادخلش ليه ؟ أجابت : – كان جاي عشاني. شعر بالدهشة وعاد يسأل : – عشانك ؟ كان عاوز ايه ؟ نظرت إليه في خجل ثم خفضت عينيها أرضا وهي تجيب في خفوت : – عرض علي الجواز! ارتفع حاجبا (آدم) بشدة وهو يشعر بدهشة لاحد لها ثم هتف ضاحكا : – بجد ؟ يا ابن الإيه يامجنون . تطلعت إليه في دهشة وهو يستطرد : – طيب وإنت رأيك ايه ؟ هزت كتفيها في حيرة وردت : – مش عارفة! سألها : – مش عارفة ليه ؟ إنت شايفة إن أدهم كويس ويصلح زوج ليكي ولا لا ؟ أجابت بعفوية : – المشكلة مش في كده, المشكلة هل هيقدر يحل المشكلة فعلا ويقف لأهل حسام, ولو قدر هو بيعمل كده ليه ؟ سأل في استغراب : – هو ماقالكيش هو عرض عليكي الجواز ليه ؟ هزت رأسها نافية وهي تجيب : – لا, سألته قالي مش عارف وحاجة مجنونة بتخليه يعمل كده, مافهمتش. ابتسم في حنان ولم يعلق في حين انتبهت هي لأمر كانت قد نسيته فسألته بسرعة : – دكتور آدم هو حضرتك حكيت له على مشكلتي ليه ؟ صمت قليلا ثم أجاب وهو ينتقي كلماته بعناية : – مادام هو ما شرحش ليه عرض عليكي الجواز ماأقدرش أقولك ليه قلت له على مشكلتك, خليه هو يقولك بنفسه لو ربنا أراد واتجوزتوا. شعرت بالدهشة فقالت بإلحاح : – دكتور آدم من فضلك قول لي, مخي تعبان من التفكير أصلا وكده الضغط بيزيد عليه. ضحك وهو يرد معاندا : – لا , مش من حقي. ثم اتجه عائدا لمكتبه في بطء وكأنما يريد إثارة غيظها أكثر , وعندما وصل لبابه التفت إليها قائلا : – يلا نسينا نقطة مهمة في الملف لازم نخلصها النهاردة, بس عاوزك تصحصحي معايا. تطلعت إليه والدهشة تغمرها والحنق يتمكن منها, كادت تضر,ب بقدميها في الأرض كطفلة عنيدة, ثم تذكرت أين هي فقامت متجهة لمكتبه باستسلام. _____________________________ كانت (جمانة) وهي عائدة لمنزلها تشعر كأنها تحلق بين السحب القطنية, تنساب من أعلى كقطرة ندى في الفجر تنحني لها الزهور, لم تعلم لما تجتاحها تلك المشاعر كالمراهقات لكنها كانت سعيدة وهذا يكفيها, شاعرة بنوع من الأمان وهذا يسعدها أكثر, دلفت للمنزل بهدوء وملامحها تحمل شرودا واضحا, وجدت شقيقتها وأمها وطفلتها جالسات في غرفة المعيشة في انتظارها لتناول الغذاء سويا, ألقت السلام ثم جلست ملقية بجسدها على إحدى الأرائك وأسندت رأسها للخلف مغمضة عينيها في سلام, تبادلت الأم والأخت نظرة تساؤل في حين اقتربت منها (ملك) وجلست فوق ساقيها ونادتها : – ماما ؟ فتحت عينيها ومالت تتطلع للصغيرة بحب وسألتها : – أيوة ياحبيبة ماما ! رمت (ملك) بنفسها في حضن أمها ولم تتكلم عندما سألتها شقيقتها : – مالك يابنتي شكلك غريب كده ليه ؟ ردت في هدوء : – مفيش جالي عريس. اندهشت المرأتان بشدة وأمها تهتف : – عريس ؟ بجد ياجمانة ؟ دكتور حسام كلمك ؟ هزت رأسها نفيا وقالت : – لا يا ماما مش دكتور حسام. سألتها شقيقتها بانعدام صبر : – أمال مين يابنتي ما تتكلمي . أجابت بخفوت : – مديري في الشركة. هتفت (لمياء) : – دكتور آدم ؟ نفت مرة أخرى وهي تجيب : – لا أخوه. ابتسمت الأم وهي تتذكره وسألت : – مش ده اللي كان بيزور ملك بعد الحادثة ؟ هزت رأسها موافقة وقالت : – أيوة يا ماما هو. سألتها (لمياء) : – وعرض عليكي الجواز إزاي فجأة كده ؟ هزت كتفيها بعدم فهم وهي تجيب : – مش عارفة, كنت في مكتبي لقيته فجأة واقف قدامي بيقولي تتجوزيني. اندهشت (لمياء) بشدة في حين ابتسمت الأم بحنان, ثم قالت شقيقتها : – فجأة كده ؟ ده مجنون ولا ايه ؟ ضحكت (جمانة) وهي ترد : – تقريبا. (لمياء) باهتمام : – طيب و قلتي له ايه ؟ (جمانة) : – ولا حاجة, ماعرفتش أرد. (لمياء) : – وهو سكت ؟ (جمانة) بابتسامة : – لا قال لي منتظر موافقتك ولو ما وافقتيش هاتجوزك غصب عنك. رفعت (لمياء) حاجبيها ثم ضحكت بشدة صاحبتها ابتسامة الأم وقالت : -لا ده مجنون رسمي, طيب عرف بموضوعك ؟ أجابت : – أيوة بيقولي دكتور آدم قال له. مطت (لمياء) شفتيها في استغراب وتساءلت : – طيب وقال له ليه؟ هزت كتفيها مجددا وأجابت : – مش عارفة بيقولي شاف حاجة أنا ماكنتش شايفها. ابتسمت (لمياء) في فهم وتبادلت نظرة حنان مع الأم و(جمانة) تتطلع إليهما بنوع من الغباء ثم سألتها : – بتبتسموا ليه ؟ قالت (لمياء) بلهجة عابثة : – أبدا أصلك كالعادة هبلة وهو باين عليه متيم. حدقت فيها بدهشة, ثم ضحكت من أعماق قلبها وقالت بسخرية : – متيم مين يابنتي ! ده مرعب مخيف دراكيولا إنما حب وكلام رومانسي وفاضي من ده مالوش فيه. (لمياء) بذكاء : – طيب ماسألتيهوش عاوز يتجوزك ليه ؟ ردت : – سألته طبعا قال لي حاجة مجنونة خلته يعمل كده . قالت بحنكة : – مش بأقولك متيم ومجنون كمان, مزيج هايل مبروك عليكي يابنتي, هههههههههه ضحكت هي الأخرى ثم قالت : – مش معقول يا لميا, أكيد هو بس حابب يساعدني. هزت (لمياء) كتفيها ثم سألتها : – طيب ورأيك ايه ؟ أجابت في حيرة : – مش عارفة. هنا قالت الأم التي كانت تتابع حديثهما في صمت : – الحقيقة أنا شايفاه مناسب, من ساعة ماشفته في المستشفى حسيت إنه شديد وكلمته واحدة, حاسة إنه هيقدر يقف قدامهم ويجيب لك حقك ياجمانة. ردت (لمياء) : – لو زي مابتقولوا كده مرعب وشديد يبقى قدامك حاجة واحدة تعمليها يا جوجو . نظرت لها شقيقتها في تساؤل فأكلمت : – صلي استخارة وسيبيها على الله, لو الموضوع اتيسر يبقى هو نصيبك. أومأت (جمانة) برأسها مجيبة : – معاكي حق, ربنا يعمل اللي فيه الخير. قالتها ثم سرحت بخيالها بعيدا فيما قالته أختها, استعادت الكلمة “متيم” أهو حقا يحبها ؟ وإن كان يحبها لما وافق على الزواج الصوري بينهما, هل ينوي خلف وعده لها بعد ذلك ؟ أم أنه يحبها لدرجة الموافقة على أمر كهذا ؟ شعرت بالحيرة تجتاحها حتى أصابها الصداع وكاد رأسها ينفجر من التفكير. __________________________ في اليوم التالي عرض (أدهم) على والديه الأمر بدون انتظار لردها على طلبه, وأبلغهما أنه طلبها للزواج, كانت الصدمة شديدة بالنسبة إليهما, سكت والده ولم يجد ما يمكنه التعليق به أما أمه فقد صرخت في وجهه : – إنت بتقول ايه يا أدهم ؟ إنت أكيد اتجننت. كان صامدا في وجه صراخها فرد بهدوء : – اتجننت ليه يا أمي مش ده اللي نفسك فيه من زمان, اتجوز؟ ظلت تصرخ قائلة : – تتجوز مين يا أدهم؟ واحدة أرملة ؟ لا هي من مستواك ولا من بيئتك ولا تصلح لك بالمرة. قال في حدة : – ليه ماتصحلش يا أمي ؟ هي كل حاجة فلوس وخلاص وعلى فكرة بقى هي غنية, غنية بحاجات كتير مش عند اللي كنت عاوزة تجوزيهم لي لمجرد الفلل والقصور والسفريات لأوروبا وأمريكا, مش ده اللي هاعيش فيه مبسوط. ردت بعصبية شديدة : – امال هتبقى مبسوط مع الأرملة وبنتها ؟ هتتجوز عشان تربي بنت غيرك ؟ هي دي الفرحة اللي كنت مستنياها ليك يا أدهم ؟ تكسر قلبي وتقولي اتجوز دي ؟ عملت لك ايه ؟ فيها ايه زيادة عن أي واحدة تانية, عن دينا بنت العيلة المحترمة الغنية الجميلة اللي هتكون إنت أول راجل في حياتها وولادها منك بس ؟ ابتسم في سخرية وقال : – ع الاقل يا أمي لما تحبي تعملي مقارنة بين جمانة وواحدة تانية بلاش دينا بالذات عشان المقارنة بينهم مش عادلة نهائي, بالنسبة لدينا. صرخت مرة أخرى : – انت بتستهبل يا أدهم, مهما كبرت هتفضل ما بتفهمش حاجة ومندفع, قولي فيها ايه زيادة ؟ قولي ! رد بحزم : – فيها حاجات كتير زيادة يا فريدة هانم, فيها حب وحنان فيها جنون, فيها براءة طفلة, فيها التزامها , فيها إني هاقدر انزل من البيت وأنا مطمن وواثق فيها وفي أخلاقها ودينها, فيها واحدة حبيتها, فيها حاجة تخليني عاوز أحميها وفي نفس الوقت أكسر رقبتها, فيها حاجة بتخليني مجنون, مطلوب حاجة زيادة يا .. أمي ؟ تطلع إليه والده في صمت وذهول وهو كرجل يفهم ما قاله ابنه حرفا حرفا, في حين ضحكت هي بسخرية جعلته يتطلع إليها في غضب ثم قالت : – كل ده فيها ؟ واحدة لوكال باباك شغلها في الشركة وعرفت توقعك في حبها يا باشمهندس يا كبير, بس والله حاجة زي دي مش ممكن تحصل أبدا وأنا موجودة. رد بعناد : – هتحصل يا أمي, هتحصل لأني عاوزها ومستحيل أتجوز واحدة على ذوقك او مزاجك, زوجتي هتكون من اختياري أنا ولأسباب مستحيل تكون في حساباتك أنت. استمرت في الصراخ : – ماله ذوقي يا أدهم ؟ مش عاجبك في ايه ؟ مالها دينا اللي بتحبك من زمان ولسه عاوزاك على الرغم من طريقتك الزبالة في معاملتها ؟ ابتسم في سخرية ولم يدر بنفسه إلا وهو يخرج الصورة المزيفة له مع (دينا) من جيبه ثم يلقي بها عند قدمي والدته لتنظر إليها في دهشة وهو يقول : – هي دي اللي عاوزاني اتجوزها ؟ هي دي الأخلاق اللي ترضيكي يا أمي وهتبقي مطمنة على ابنك معاها ؟ تطلعت للصورة في ذهول أما والده فقد مال يلتقطها متطلعا إليها فيما يشبه الصدمة, وظل ينقل بصره بينها وبين ابنه عندما سألته أمه في غضب : – ايه دي ؟ وهي ذنبها ايه وهي بتحبك وما صدقت تكون قريب منها فسابتك تحضنها ؟ الغلطة في الصورة مش منها , منك إنت يا باشمهندس. أطلق (أدهم) ضحكة ساخرة عالية ثم هتف بسخرية أكبر : – ايه يا أمي انت مصدقة فعلا الكلام اللي بتقوليه ؟ ليه مش عارفة ابنك ولا عاوزة تلبسي لي الموضوع وخلاص ؟ ولا يمكن ماكنتيش في الحفلة دي وعارفة هي كانت بترقص مع مين فعلا بالشكل الزبالة ده ؟ يعني واحدة لابسة حاجة كده مكانها أوضة النوم وماشية بيها قدام الناس عادي ورايحة ترقص مع واحد صاحبها وسايباه يعمل في جسمها اللي هو عاوزه وزيادة عن الصورة دي حاجات ما شفتهاش وجاية تقولي لي أنا اللي معاها, ليه ماشفتيهاش بنفسك يومها ؟ دي أقذر مخلوقة قابلتها في حياتي ولو هي آخر واحدة في الدنيا مستحيل أفكر فيها أصلا. تنهد في غضب مكتوم ثم أكمل : – هي دي اللي بتقولي لي أحسن ؟ وعشان ايه ؟ فلوس ولا صداقتك مع مامتها ؟ الصورة دي هي عملتها وعملت غيرها كذا واحدة وباسم الحب .. ها , حب ايه مش فاهم. سألته بحذر : – وإيه وصل الصورة دي ليك ؟ وعملت معاها ايه ؟ رفع حاجبه بسخرية وهو يتساءل بداخله عن كنه الأم التي تهتم بفتاة لا خلاق لها عوضا عن الاهتمام بابنها وبمن اختارها لنفسه, رد بعد صمت : – الصورة وصلت لي غلط في ملف شركة باشتغل عليه واللي وصلها للملف الهانم لما راحت تعرض الصور على سكرتيرتي ووقعت منها واحدة هناك بالغلط, ربنا أراد إن كذبها ينكشف, وهاكون عملت ايه يعني, طردتها من الشركة طبعا وكويس أوي إن مابعتش الصورة لباباها وده بس احتراما له وخوف على مشاعره مش عشانها. صرخت مرة أخرى : – ايه طردتها ؟ إنت أكيد اتجننت ؟ هو أي حد بيغلط عندك بتطرده ؟ ليها ماعاقبتهاش ونهيت الموضوع بهدوء ؟ قال في غضب : – وهي دي غلطة عادية, في ايه يا أمي ؟ هو أنا ابنك ولا هي ؟ هي سمعتي والطعن في أخلاقي ما تهمكيش ؟ توترت لثوان لكنها عادت تصيح بغضب : – كل ده عشان الست اللوكال اللي عاوز تتجوزها ؟ قال في حزم غاضب : – اللي بتتكلمي عليها هتكون مراتي إن شاء الله ومراتي مش مسموح لأي حد أيا كان يغلط فيها. هتفت بدهشة : – هي دي آخرتها يا أدهم ؟ تعلي صوتك على مامتك وتهددها عشان خاطرها ؟ تنهد في استياء ثم قال : – انت اللي استفزيتيني يا أمي. التفتت صارخة في وجه زوجها : – وأنت ساكت ليه يا جلال, انت موافق ابنك على الجنون ده ؟ هيخلي سمعتنا في الارض بواحدة مانعرفش عنها حاجة وكانت متجوزة ومخلفة, طمعانة في فلوسه وخلاص. اجتاح (أدهم) غضب شديد وقبل أن يرد قال والده : – عاوزاني أقول ايه يافريدة ؟ أنا مصدوم, مصدوم في ابني وطريقة تفكيره واندفاعه, مصدوم في اللي كنت فاكره عاقل وفاهم ورافض دينا لسبب وجيه ألاقيه عشان واحدة بتشتغل عنده وأرملة ومخلفة كمان, أقول ايه يافريدة ؟ مفيش حاجة عارف أقولها. ثم التفت لابنه مستطردا : – هي دي آخرتها يا أدهم ؟ يا عاقل يا مدير الشركة, عاوز تتجوز حتة موظفة عندك سبق لها الجواز وعندها طفلة هتربيها إنت, هيبقى احساسك ايه وانت مش أول واحد في حياتها ؟ وانت بتدلع بنت مش منك ؟ لما يجيلك أولاد منها هتعامل بنتها برده زيهم ولا ميزانك هيميل, فكر كويس يا أدهم قبل ماتظلمها وتظلم نفسك, فكر كويس قبل ما تتحدى أهلك عشانها, مش هأقولك عشان دينا لأنها ماتستاهلش واحد زيك ولا إنت تستاهل واحدة بالأخلاق دي, لكن عشان نفسك وأهلك وعشانها هي كمان لو بتحبها. هتفت (فريدة) في حنق : – ومالها دينا يا جلال إنت كمان ؟ البنت بتحبه وطايشة شوية فيها ايه لو هو علمها وقربها منها ورباها على طباعه ؟ ابتسم (أدهم) في سخرية شديدة ولم يعلق في حين قال والده : – مش دي اللي أتمناها لابني يافريدة مهما كانت غنية ومهما كانت شراكتنا هتفيدني. ثم التفت لابنه قائلا في هدوء مفتعل : – اطلع اوضتك يا أدهم وفكر مليون مرة قبل ما تاخد قرار تندم عليه, قرار يخسرك أهلك ومكانتك في المجتمع. شعر (أدهم) بالحنق الشديد, فهاهم يضعون أنفسهم في كفة مقابلة لكفتها ولو ترك الميزان لرجحت هي لكنه لا يستطيع, ومرة أخرى يُعَوِّل والده على أمور مادية ومظاهر لا تسمن ولا تغني من جوع, ماكان منه بعدها إلا أن قال : – أنا فعلا هافكر يا بابا وقبلها هأستخير ربنا لأنه هو بس اللي عارف الخير لي فين ومع مين, أنا خارج عشان حاسس إني مخنوق هنا, بعد إذنكم. الفصل السابع عشر _____________ بعد خروج (أدهم) من الفيلا نزلت (سارة) لوالديها بينما كانت والدته ترمي بجسدها على أحد الكراسي وتهتف متباكية : – شفت يا جلال ؟ آدي آخرة دلعك فيه وتربيتك اللي بتقولي خليه يعتمد على نفسه وهو حر في قراراته, كان زمانه دلوقتي متجوز ومخلف من زمان, وآدي آخرة خدمات صحابك حطتنا في مصيبة والبنت ضحكت على ابنك وخلته يحبها ويقف قصادنا اللي عمره ماعملها, آه أعمل ايه ؟ كانت (سارة) قد وصلت إليهما فقالت بتردد : – مادام بيحبها يا بابا ليه لا ؟ أدهم عمره ما حب ولا كان له علاقات زي الشباب غيره ودايما كان واقف جنبك وجنبنا كلنا وهو اللي بنعتمد عليه, ليه لما جه يختار حاجة في حياته وقفنا كلنا قصاده وبنقوله في دي كمان لا, لازم تختار اللي احنا عاوزينه إنت مش من حقك تحب وتختار تعيش مع اللي بتحبها. صرخت فيها والدتها : – بنت اخرسي, انت اتجننتي انت كمان. أما والدها فقد صمت مفكرا في كلمات ابنته وهو يتطلع إليها وكأنما انتبه لأول مرة أنها كبرت ونضجت, (سارة) ذات العشرون ربيعا لم تعد طفلة بل أصبحت أنثى تناقشهم وتتكلم في الحب ولغة القلوب معهم, وهاهي تدافع عن شقيقها, لم يرد أن يخسر تأييدها لموقفهم فرد بهدوء مشيرا لزوجته بالصمت : – يا سارة احنا ماقلناش مش من حقه يختار, كل واحد من حقه يختار اللي يكمل حياته معاها لكن يابنتي لما نلاقي اختياره غلط يبقى نتكلم لو سكتنا يبقى بنقصر في حقه, لازم ننصحه ونوضح له اللي هو بسبب الحب مش شايف إنه غلط. شجعتها كلمات والدها على محاورته فعادت تقول : – أيوة يا بابا بس أدهم مش صغير, كلامه عنها بيدل هي قد ايه حد كويس وقد ايه هو حاسس إنه هيرتاح معاها, مش معقول هتكون قدرت تضحك عليه ودينا بقى لها سنين بتحاول تقربه منها ومش قادرة, أدهم أكتر حد باحس انه فاهم وقد المسئولية مش طفل صغير اتعلق بأي حاجة وعاوزها وخلاص, ليه مانسيبوش يخوض التجربة ولو نجحت يبقى ما خسرناهوش وفضل معانا وعاش مع اللي قلبه اختارها ولو فشلت يبقى اتعلم درس وبرده مش هنخسره وهيرجع لنا من تاني. كادت والدتها تصيح في وجهها مرة أخرى بغضب لولا أن أشار لها (جلال) وقال : – استني يافريدة. ثم صمت, كان يفكر في كلام ابنته, لقد كبرت بالفعل, كبرت وتناقشه بل وتحاول إقناعه وتفند براهينه وأدلته, سُعِد بها للغاية لكن أقلقه أنها تساند شقيقها وفقط, ربما لديها وجهة نظر تستحق التوقف عندها, لكن تبقى فوارق كثيرة تمنع هذه الزيجة, قاطع تفكيره صوت زوجته تقول في عصبية : – بتفكر في ايه يا جلال ؟ عاوز توافق إنت كمان ؟ هي دي اللي ابنك صبر السنين دي كلها عشان يتجوزها ؟ ثم قامت من كرسيها بعنف وأكملت : – انا طالعة فوق أستريح, ماعدتش قادرة استحمل خلاص. ثم تركتهم صاعدة لغرفتها, واستمر هو صامتا يفكر في كلام طفلته التي مر العمر وهو لم يشعر بها تكبر أمام ناظريه. وفي الأعلى دلفت (فريدة) إلى غرفتها ثم أمسكت هاتفها واتصلت بأحد الأرقام وأثناء الرنين كانت تحدث نفسها بعصبية قائلة : – بقى كده يا أدهم, بتتحداني ورايح جايب لنا واحدة من الشارع تتجوزها والمصيبة إنها أرملة وعندها بنت, طيب يا أدهم إن ما …. قطع حديثها الغاضب صوت يرد على الهاتف : – ألو, أيوة يافريدة, عاوزة ايه تاني بعد اللي ابنك عمله مع دينا ؟ هتفت في عصبية : – ناريمان أنا مااعرفش حاجة عن الموضوع ده إلا دلوقتي المشكلة مش في كده المشكلة إن أدهم عاوز يتجوز واحدة أرملة بتشتغل عنده في الشركة ومصمم على كده وانا وجلال مش قادرين نقنعه, لازم نتصرف ونعمل أي حاجة تمنع الجوازة دي. سمعت شهقة صديقتها ثم قالت : – ابنك اتجنن يا فيري, يعني كلام دينا صح واللي عملته كان معاها حق فيه. تساءلت (فريدة) في دهشة : – كلام ايه ودينا عملت ايه ؟ حكت لها (ناريمان) ما قصته عليها ابنتها سابقا وعن الخطة التي اتبعتها لتوقع بينهما حتى أدت لوقوع الصورة في يد (أدهم) وطرده لابنتها من الشركة, قالت (فريدة) وهي مندهشة مما تسمع : – يعني فعلا في حاجة بينهم مش بس بيحبها ؟ أكدت (ناريمان) : – دينا متأكدة من كده. صمتت (فريدة), لا يمكن, (أدهم) ليس أبدا من ذلك النوع ولو كان على علاقة بها فلما يكلف نفسه عناء الزواج بها إذن؟ هل (دينا) تكذب ؟ لكن لماذا ؟ كاد عقلها ينفجر من التفكير والحيرة, سمعت صوت صديقتها يقول : – الكلام في التليفون مش هينفع يا فيري, تعالي نقعد نتكلم انا وإنت ودينا ونشوف هنعمل ايه في الكارثة دي. أجابتها بالموافقة واتفقتا على اللقاء في اليوم التالي ليرين ما ستفعلن في أمر هذه الزيجة وتبحثن عن طريقة لمنعها. ______________________________ خرج (أدهم) من الفيلا غاضبا حانقا والأهم حزينا, كان يشعر بحزن عميق لرد فعل والديه, هاهي والدته ترفض بعنف وتصرخ في وجهه ووالده يتخاذل في نصرته أمامها كما فعل مع أخيه من قبل, أخيه الذي يعلم تماما أنه يسانده ويقف إلى جانبه دوما, أخيه الذي هاجر وترك بلده وأهله بسبب والدته هو, لم يدر إلا وهو يزفر في حنق شديد ويلتقط هاتفه ويطلب رقمه, استمع للرنين على الجانب الآخر لثوان ثم فتح الخط ليسمع صوت أخيه يقول في مرح : – أدهم المجنون, فينك يابني, ايه المصيبة اللي عملتها النهاردة دي ؟ تنهد (أدهم) وقال في ضيق : – مش فايق للهزار يا آدم إنت فين ؟ شعر (آدم) بلهيب تنهيدته ومدى الضيق المحتشد فيها فسأله في قلق : – مالك يا أدهم خير ؟ رد (أدهم) في عصبية : – يابني رد علي إنت فين عاوز أشوفك. قال بسرعة : – انا في البيت تعالى. أجاب (أدهم) بزفرة أخرى : – لا عاوز أقعد في مكان مفتوح انزل قابلني. شعر (آدم) بالحيرة وهو يقول : – مش هينفع يا أدهم يوسف لوحده, طيب تعالى ونقعد في البلكونة نتكلم. زفر (أدهم) في ضيق مرة أخرى ثم قال في استسلام : – طيب أنا جاي. جلس (آدم) منتظرا أخيه في قلق شديد, لم يسمع صوته بهذا الشكل من قبل, كان كم الضيق فيه ونبرة الحزن التي تخالطه كبيرا جدا, رن جرس منزله فقام لفتح الباب بسرعة ليجد (أدهم) يقف مستندا للجدار المجاور للباب ويبدو عليه الإرهاق والغضب واليأس فمد يده يجذبه للداخل هاتفا : – تعالى يا أدهم, مالك ايه اللي حصل وشكلك عامل كده ليه ؟ دخل (أدهم) مع أخيه ليرمي جسده في تهالك على أقرب مقعد وجده في طريقه ويتنهد بعمق ثم أسند رأسه لمسند المقعد وأسبل عينيه, جلس (آدم) على مقعد مجاور وربت على كفه متسائلا في حنان : – حصل ايه يا أدهم طمني, مالك ؟ فتح عينيه وغمغم في حزن : – مش موافقين يا آدم. لم يفهم أخاه في البداية لكن فجأة علم ما يتحدث عنه (أدهم) فقال : – انت قلت لهم ؟ طيب مش كنت تستنى رأيها ؟ زفر في حنق وقال في عصبية : – يابني باقولك مش موافقين, يعني رأيها لحد دلوقتي مش فارق معاهم المهم اللي هما عاوزينه وبس. سأله بتردد محاولا عدم إغضابه : – طيب افرض هي ماوافقتش ؟ يبقى انك تفاتحهم في الموضوع مالوش لازمة, كنت استنى رأيها بدل ما تعمل مشكلة. نظر إليه في استياء وقال : – خلاص اللي حصل حصل يا آدم, مش ناقص بقى. تنهد (آدم) وسأل : – قالوا لك ايه ؟ قص عليه (أدهم) تفاصيل الموقف وأنهى كلامه قائلا : – كل اللي هاممهم الفلوس والمركز الاجتماعي وصحابنا يقولوا ايه, وأمي كل اللي في بالها إني اتجوز دينا بنت صاحبتها وخلاص بغض النظر عن إنها تناسبني او لا, بحبها ولا لا. شعر (آدم) بالضيق من أجل أخيه, هاهو موقف آخر يتكرر يخذل فيه الأب ابنه أمام زوجته, وهذه المرة كان الابن ابنها أيضا, لكنها تريد فقط السيطرة وتملك ما تستطيع من الدنيا حتى وإن كان على حساب ابنها, في النهاية قال له : – إنت بتحبها يا أدهم ؟ تطلع إليه في دهشة, أهذا هو الوقت المناسب لمثل هذا السؤال ؟ كرر (آدم) : – رد علي بتحبها ؟ خفض (أدهم) عينيه أرضا وخرجت من صدره تنهيدة حارة تعبر عن اللهيب الذي يشتعل بداخله ويقت*له احتراقا, صمت محاولا إيجاد كلمات تعبر عما يشعر فلم يجد, قال بعد صمت : – مش عارف اللي حاسس بيه أسميه ايه يا آدم ! أقولك إني أول ما شفتها حسيت بحاجة غريبة كأني لأول مرة بأشوف واحدة ست ؟ أقولك إني اتخانقت معاها أول مااشتغلت ومن ساعتها وأنا نفسي أقولها آسف في وشها بس مش قادر, إني لما بأكون في نفس المكان اللي هي فيه بأرتبك واتلخبط وفي نفس الوقت باحس إني قوي وعنيف وقاسي وعصبي زي اللي عنده اسكيزوفرينيا, إني ابحب استفزها واشوفها متعصبة ووشها أحمر من الغضب والخجل, إن نفسي تكون لي وأخبيها جوايا وماحدش يلمسها او يشوفها أو حتى يفكر فيها, مش عارف أقول ايه, مااعتقدش إن ده حب, دي حالة غريبة بقت بتجيلي بسببها ومش عارف أتخلص منها. ابتسم (آدم) في حنان شديد وقال : – إنت تخطيت مرحلة الحب بكتير, يعني إنت عرضت عليها الجواز للأسباب دي كلها مش مسألة بس إنها محتاجة حد يحل لها مشكلتها ؟ أومأ برأسه إيجابا في صمت ثم قال بصوت متحشرج مخنوق : – مشكلتها كانت بس الدافع اللي خلاني أفتح عيني على مشاعري وأجبرني أعترف بيها, مجرد تفكيري إنها ممكن تقتنع بالحل اللي انت اقترحته عليها وتفكر فيه وتقبله وإن ممكن حد تاني انا عارف انه في ثواني ممكن ياخدها مني خلتني زي المسعورٍ اللي ممكن يرتكب جريمة عشان تفضل ليا أنا وبس, كان لازم أعترف قدام نفسي وكان لازم أحبسها وأسلسلها حتى لو غصب عنها, هتكون ليا يعني هتكون ليا, كابرت كتير واستغربت أحيانا الضيق والغيرة اللي كنت باحس بيهم لكن وقت الجد جه وما ينفعش أكابر أكتر من كده, كنت زي المجنون ماحسيتش بنفسي غير وأنا واقف قدامها وهي قاعدة على كرسي مكتبها وكمية إرهاق غير عادية على ملامحها, حسيت بيه إرهاق نفسي أكتر منه جسدي, كان نفسي أحضنها وأحاول أمحي الحزن اللي عايش جواها ومستعمر قلبها, كل اللي طلع مني لما لاقيتها بتبص لي بخوف وقلق وتنزل عينيها في الأرض من نظرتي ليها هو كلمة واحدة, طلبت منها الجواز, لما سألتني ليه …. صمت ثانية ثم ابتسم في حنان وهو يكمل : – ماقدرتش أقاوم إني أستفزها تاني وأقولها مش عارف, يمكن غلاسة يمكن شوية كبرياء إني برده مش عاوز أعترف لها, بس قلت لها إني هاتجوزها حتى لو ماوافقتش, أعمل ايه يا آدم ؟ الوحيدة اللي قلبي اختارها وقفل على نفسه عشانها طول السنين دي مش قادر يوصلها وكأن الدنيا كلها واقفة قصاده. سأله (آدم) : – تحب اتكلم مع بابا ؟ رفع (أدهم) عينيه إليه في أمل وهتف : – بجد يا آدم هتكلمه ؟ هز كتفيه وقال بابتسامة : – هاحاول يمكن كلامي يفرق معاه. ابتسم (أدهم) وقال في حماس : – أكيد هيفرق, بابا بيحبك جدا وبعد الغياب اللي غبته بيتمنى منك تطلب منه أي حاجة. طمأنه (آدم) : – خلاص هاحاول, تفتكر أقابله فين ؟ تراجع (أدهم) وفتر حماسه فجأة وهو يجيب : – بابا اليومين دول مش بيخرج من البيت زي ماانت عارف, كان تعبان شوية ومش بيقدر يخرج. فكر (آدم) لدقيقة أو يزيد واحترم (أدهم) صمته, كان يأمل أن يذهب إليه ولو لدقائق من أجل خاطره, رفع (آدم) رأسه وقال بحزم : – خلاص يا أدهم بلغه إني هازوره بكرة وربنا يحلها من عنده. شعر (أدهم) بالسعادة, هاهو الأقرب إليه يثبت دوما أن يستحق تلك المكانة في القرب منه, ابتسم ابتسامة واسعة وقال : – ربنا يخليك ليا يا آدوم, مش عارف من غيرك كنت عملت ايه, إنت رجعت في الوقت المناسب . ربت أخوه على كتفه وابتسم مشجعا ثم قال : – على ايه يا أدهم دعواتك بس نوصل لحاجة لأن بابا لو وافق طنط فريدة مش هتقدر تعارض. أومأ (أدهم) برأسه موافقا ثم قام متسائلا : – فين يوسف ؟ نايم ؟ أجاب أخوه : – أيوة عنده مدرسة الصبح. (أدهم) : – طيب تمام, أنا كنت ناوي أنام عندك النهاردة بس مادام هتيجي بكرة خليني اروح أمهد لبابا . (آدم) موافقا : – ماشي يا أدهم. تبادلا السلام ثم انطلق (أدهم) عائدا لمنزله في حين بقي (آدم) يفكر في طريقة لإقناع والده أن يترك لأخيه حرية اختيار من يريدها ولا يمنعه حتى لا يفقده هو الآخر . ____________________________ في اليوم التالي كان اللقاء العاصف بين (دينا) ووالدتها وبين (فريدة), كانت (دينا) تشعر بحقد لا مثيل له وتغلي من الغضب لا يماثله سوى الغضب المتجمع في سماء (فريدة), قالت (دينا) بعصبية شديدة : – يعني إحساسي كان في محله ! أنا مش فاهمة أدهم بيفكر إزاي وايه اللوكال دي اللي فضلها عليه, مش جميلة مش شيك يوزد Used وعندها بنت كمان, إزاي يسيبني انا ويروح لدي ؟ حاولت والدتها تهدئتها قائلة : – ماتقلقيش يا دينا, جوازة زي دي مستحيل تتم, مفيش توافق أبدا, واحنا هنتصرف بس عاوزين خطة مظبوطة مش يعرف زي المرة اللي فاتت. قالت (فريدة) بحنق : – طبعا مستحيل, دي ايه دي اللي اسمح لها تتجوز ابني وتاخد فلوسنا كلها, لا نعرف لها أصل ولا فصل ولا مركز اجتماعي ولا عندها أي حاجة. تأملتها (ناريمان) ثم تساءلت في بطء : – طيب وهنتصرف إزاي يافيري ؟ ردت (فريدة) بعصبية شديدة : – مش عارفة يا ناني, مش عارفة أنا هاتجنن ونفسي اشوفها عشان هاقت*لها بجد. تبادلت الفتاة وأمها نظرة خبيثة ثم قالت (دينا) : – مش لدرجة القت*ل يا أنتي فيري, في حاجات بتكون أفظع من القت*ل, أنا هاعرفها شغلها الرابيش Rubbish دي, وإزاي تفكر تاخد حاجة مش بتاعتها, لازم أدهم يعرف إنها لها علاقات كتير ويحتقرها زي ماعمل معايا عشان مجرد صورة, ولازم يفقد ثقته فيها, من ناحية الحب ومن ناحية الشغل كمان لأن واضح إنها مش عاوزة تسيبه على الرغم من اللي فهمته لها إن في علاقة بينا. تطلعت إليها المرأتان في تساؤل صاحبه بعض القلق والخوف لدى (فريدة), هل هذه من تريد إجبار ابنها على زواجها ؟ هل بالفعل ستصونه وتحفظ غيبته ؟ أما (دينا) فأكلمت : – أنا هاشرح لكم الفكرة اللي جت لي لما شفت اللي اسمه هشام ده اللي كان بيشتغل في الصيدلية بتاعة جوزها اللي مات, أنا لي عيون في الشركة مش معنى إني خرجت منها إني خلاص مش هاقدر اعرف ايه اللي بيحصل هناك, وكله بتمنه طبعا. صمتت لترى تأثير كلماتها على والدتها ووالدته فوجدت منهما الإنصات والتساؤل والفضول فانطلقت تحكي لهما خطتها, والتي كانت خطة شيطانية آثمة لا تنبع إلا من عقل لا يعرف للفضيلة طريقا. __________________________ في فيلا (الحسيني) احتضن (جلال) ابنه الأكبر في شوق وسعادة جمة وقال : – آدم مش مصدق إنك جيت هنا, ماشفتكش بقى لي اكتر من أسبوعين وحشتني يابني, وفين يوسف ؟ رد (آدم) بحنان : – إنت اكتر يا بابا, يوسف في مدرسته دلوقتي, أنا جاي لك بخصوص موضوع سريع مش محتاج إني أجيبه معايا ولما رجلك تتحسن تبقى تيجي وتقضي معانا يوم كده في أي مكان بإذن الله, طمني عليك وعلى صحتك عامل ايه ؟ أجاب الوالد : – الحمد لله, أهو يوم كده ويوم كده, حتى الشركة زي ماانت شايف كنت باروح لها زيارة كل أسبوع دلوقتي مش بأقدر. ابتسم (آدم) قائلا : – ربنا يديك الصحة يا بابا. ثم التفت لأخيه الصامت قائلا بلهجة مداعبة : – ايه يا أدهم مفيش حاجة عندكم تتشرب ولا ايه ؟ ابتسم (أدهم) وعلم أن أخاه يريد الانفراد بوالده فقام وهو يقول ممازحا : – هاروح استكشف كده بس بيتهيألي مفيش. قالها وخرج من غرفة المكتب الذي عمه الصمت لثوان بعد خروجه, قطعه بعد ذلك الوالد قائلا : – إنت جاي عشان موضوع جواز أدهم مش كده يا آدم ؟ مفيش حاجة تخليك تتنازل وتيجي الفيلا هنا غير أخوك. رد (آدم) بابتسامة لذكاء والده : – معاك حق يا بابا وانا مش هاقول لا لأني عاوز أتكلم معاك في الموضوع بجد وهدوء من غير عصبية. نظر إليه والده وصمت منتظرا منه بدء الحديث فاستطرد : – بابا مش كل حاجة في حياتنا هنقيسها بالفلوس وده مركزه الاجتماعي ايه وعنده كم شركة وهيورثنا ونورثه والمهم حسابنا يزيد في البنك ونغير العربية كل شهرين ونتفسح في أوروبا, مش دي السعادة اللي ابنك أدهم بشخصيته محتاجها, أدهم دماغه كبيرة وعقله أكبر, أكبر بكتير من إنك تختذله في حاجة مادية أو شكل خارجي لواحدة شايفينها حلوة وغنية وتستاهله أكتر, أدهم محتاج واحدة يحبها, يحبها بجد ويعيش معاها الحب اللي كان محبوس جواه طول عمره لحد مالقاها, صعب تحرمه منها, صعب بعد ما وصل للسن ده تستغل حبه وتقديره لك وتجبره على حاجة مش عاوزها, صعب تقوله مستقبلك وحياتك وزوجتك وأولادك أنا هاختارهم كانه ملك يمين تتحكم فيه زي ماتحب. كان الكلام يشق قلب والده بسهولة كما تشق سكين حادة قالبا من الزبدة الباردة, أكمل (آدم) بعد تنهيدة حارة : – بلاش تخذل أدهم يا بابا, أنا مش عاوز أقولك إنك خذلتني وخليتني أبعد بس ده اللي حصل, أدهم لو حس بالخذلان مش بس هيبعد, لا هيبعد أوي أوي ومش هيرجع, أدهم فيه مني كتير بس شخصيته أصعب, شديد وفيه حتة قسوة هو بيسيطر عليها, الحتة الصغيرة دي لو طغت على مشاعره هتخليه إنسان مختلف تماما, بلاش تدوس عليها يا بابا عشان ماتخسروش, وللأبد. لحظة صمت أخرى تابع بعدها : – فكر بقلبك يا بابا, قلبك اللي مفروض همه الأول سعادة ولاده, خلي عقلك برا شوية, عقل التاجر ورجل الأعمال مش هينفع في موقف زي ده قلب وعقل الأب هو بس اللي من حقه يفكر هنا ويقول قراره, اديله حرية الاختيار وسيبه يتحمل نتيجة اختياره, لو صح تبقى ساندته ووقفت جنبه وهو كمان فضل جنبك ولو غلط هيرجع لك ويعتذر لك ويفضل جنبك, في الحالتين هتبقى ما كسرتش قلبه أو بعدته عنك. تطلع إليه الوالد في دهشة, هاهو يكرر عبارة أخته, هل هو الوحيد الذي يرى أن الأمر ليس كما ينبغي ؟ وأن اختيار ابنه خاطئ ويجب أن يمنعه ؟ . في هذه اللحظة عادت (فريدة) من الخارج لتفاجأ بوجود سيارة غريبة لا تعرفها أمام المنزل, خرجت من سيارتها ووقفت تتطلع إليها للحظة ثم اتجهت بخطوات سريعة للداخل, نادت أقرب العاملين في الفيلا إليها وسألته : – هو احنا عندنا ضيوف ؟ هز الرجل المسن رأسه نافيا وأجاب : – لا ياهانم ده آدم بيه ابن جلال بيه, معاه في المكتب. شعرت بالصدمة, ما الذي أتى به إلى هنا ؟ ألم يقل يوما بأنه لن يعود مهما حدث, فكرت لدقيقة ثم استنتجت سبب وجوده, لابد أنه يحاول إقناع والده بزواج أخيه, إنه دوما يغار منه ويسعد كلما حدث له شيء يشعره بدونية أخيه, انطلقت كالصاروخ تجاه المكتب في أثناء عودة (أدهم) من المطبخ مبتسما وهو يحمل ثلاثة اكواب من العصير البارد والذي رآها تتجه في غضب للمكتب وتفتح بابه في عنف بدون استئذان, وضع الصينية من يده وتبدلت ملامحه للغيظ والغضب خاصة عندما بدأ صوتها يعلو هاتفة : – بتعمل ايه هنا يا آدم ؟ مش مكفيك اللي عملته قبل كده جاي عاوز أخوك يتجوز واحدة من الشارع ؟ انتفض (آدم) واقفا في غضب تبعه والده هاتفا فيها بصرامة : – فريدة, ايه الكلام ده ؟ ماتتكلميش مع ابني بالشكل ده. صرخت في وجهه : – إنت مش شايف يا جلال, جاي عاوزك تجوزه واحدة كانت متجوزة لا هي من مستوانا ولا بيئتنا طول عمره بيغير من أخوه عشان اتعلم احسن منه وكان دايما أذكى منه وأمه هي اللي بتربيه. ارتسم الألم على وجه (آدم) في حين قال (أدهم) بقسوة بعدما وصل للغرفة : – أمه مين ؟ الأم دي حاجة مش في قاموسك يا فريدة هانم, اخويا اللي كنت السبب في بعده عننا وعلى الرغم من كده اتنازل وجه بيتك تاني وبرده بتهينيه هو أكتر حد وقف جنبي وشجعني وعلمني ووصاني اقف جنب والدي, لولاه كان ممكن اكون واحد تاني مختلف 180 درجة بس إنت مش واخدة بالك. صرخت مرة أخرى : – اخرس إنت يا أدهم. ثم التفتت مخاطبة (آدم) : – شوف يا آدم لو عاجباكو البنت أوي روح اتجوزها انت اهو انتو الاتنين أرامل ومناسبين لبعض وكل واحد يربي ابن التاني ونخلص, إنما ابني مستحيل يتجوزها فاهم؟ مهما عملت عشان تقلل من قيمته او تنتقم مني فيه مش هاسمحلك, مستحيل كفاية سرقتني قبل كده ودلوقتي جاي عاوز تضيع ابني مني. هتف فيها (جلال) غاضبا : – فريدة. تطلعت إليه في قسوة واكتفى هو بالصمت, لم يجد كلاما يقوله ليداوي به جرح ابنه فكان صمته بمثابة ملحا على الجرح, لم يرد (آدم) اكتفى هو الآخر بالصمت ونظرة عتاب طويلة ألقاها على والده الساكن ثم التفت مغادرا المكان يتبعه (أدهم) هاتفا : – آدم استنى, أنا جاي معاك. وألقى نظرة غاضبة على والديه وهو يغادر الفيلا ويغلق بابها خلفه في عنف, ومن الطابق العلوي كانت عيني (سارة) المصدومتين تتابعان مايحدث في حزن الفصل الثامن عشر _____________ بعد خروج الرجلين من الفيلا انطلقت (فريدة) تصرخ وتصيح في زوجها بغضب وهو مكتفي بالصمت, تطلع إليها كثيرا وبدا أنه لا يسمع حرفا مما تقول, هاهو يخذل ابنه للمرة الثانية ويكمل مسلسل خذلانه بمحاولة حرمان ابنه الآخر من المرأة التي أحب, تركها تفرغ شحنات تكبرها وغرورها ووقف, نظرت إليه في دهشة لكنه اتجه نحوها ثم تخطاها خارجا من المكتب, وصعد لغرفته مغلقا بابها عليه بإحكام, كان يود تفريغ ذهنه من كل المنغصات والأحداث, أراد التفكير بصفاء في كثير من الأمور التي تحتاج لحسم, راجع حديث ابنه (آدم) هل يقسو بالفعل على (أدهم) وستكون نتيجة ذلك هي ابتعاده بلا عودة ؟ لما صمت بالأسفل عندما صرخت زوجته في وجه ابنه وآذته واتهمته بالغيرة والكره والسرقة للمرة الثانية ؟ لما يخذله دوما ويكسر شيئا بداخله في كل مرة, ابنه الذي سامحه في المرة السابقة لمجرد أن نظر في عينيه وهمس باسمه, يا إلهي لما يشعر بالضعف ؟ شعر بنبضات قلبه تتعالى وتكاد تخترق أذنيه لم يتمالك نفسه فاستند لأحد الكراسي بالغرفة ومنه للحائط متجها للباب وما إن فتحه حتى وجد (فريدة) خلفه تهم بطرقه رفع عينيه إليها في ألم بادلته هي بالقسوة , ثم هوى فاقدا للوعي عند قدميها تصاحبه صرختها الملتاعة باسمه. ________________________ لحق (أدهم) بأخيه في سيارته واستقلها بجواره, جلس داخلها (آدم) صامتا يعتصر عجلة القيادة بكفيه, مشاعره كانت مزيجا من الألم والحزن والغضب مع شعور طاغ بالانكسار واليتم, ربت أخوه على يده برفق فالتفت ينظر إليه, كانت عينيه لوحة مجسدة لعذاباته التي قرأها (أدهم) في لحظة, حاول قول شيء فخرجت حروفه متحشرجة خافتة ليس بينها رباط, قاطع حشرجاته رنين هاتف (أدهم) بشكل مفاجئ جعله ينتفض هو وأخيه في عنف, التقط (أدهم) هاتفه ليرى رقم هاتف الفيلا الأرضي, رفع عينيه نحوها في قلق متسائلا عن السبب الذي يدعوهم للاتصال به من هذا الهاتف, فتح الخط ليجد صوت والدته صارخا : – الحقني يا أدهم باباك وقع في الأرض ومغمى عليه. كان صوتها عاليا وصل للجالس بجواره فالتقت أعينهما في نظرة جزعة فتح بعدها كلاهما الباب المجاور له وقفز خارج السيارة متجها نحو الفيلا, دخلا إليها وصعدا السلم قفزا حتى غرفة والدهما, رأت (فريدة) (آدم) يعدو بجوار ابنها فشعرت بالضيق لكنها صمتت, كانت خائفة على زوجها ربما كانت قاسية همها نفسها أولا لكنها تحب زوجها حتى وإن عاملته بخلاف ذلك, حمل الرجلان الأب ووضعاه في سريره ثم اتصل (آدم) بأحد أصدقائه الأطباء الذي جاء على الفور, طمأنهم الطبيب أن الأمر لا يعدو عن كونه نوعا من الضغط العصبي تعرض له مؤخرا فنظرت الأم لابنها في عتاب جعله يخفض عينيه أرضا في ألم, طلب منهم الطبيب أن يعتنوا به وبراحته وألا يبلغوه أية أخبار سيئة يمكن أن تضايقه, وكتب له بعض الأدوية وانصرف, ومعه انصرف (آدم) بعد أن إطمأن على والده, بقي (أدهم) بجواره وهو يمسك كفه وينحني مقبلا جبهته قائلا في حزن وبصوت دامع : – سامحني يا بابا, أرجوك ماتزعلش خليك معايا. هتفت فيه أمه بعصبية : – عاجبك كده يا أدهم, هي دي آخرتها ؟ هتمو*ت أبوك من القهر ؟ رفع عينيه إليها وقال في حزن يحمل لمحة غضب : – أنا برده يا أمي اللي قهرته وأهنت ابنه قدام عينيه واتهمته بالسرقة, أنا اللي وقفت في طريق سعادة ابنه التاني ومش عاوزه يتجوز اللي اختارها ؟ راجعي الموقف كويس يا فريدة هانم . صاحت فيه بغضب : – انت اتجننت يا أدهم ؟ إزاي تكلمني بالطريقة دي ؟ زفر في حنق وقال : – تقريبا اتجننت, ماهو لما تبقى دي طريقتك في تربية ولادك ومعاملة ابن جوزك اللي هو أخوهم الكبير أبقى اتجنن, ارحميني يا أمي وارحمي بابا, من فضلك بابا محتاج يرتاح يلا نخرج ونسيبه بلاش نتعبه أكتر. تطلعت إليه في غضب لكنها صمتت لخاطر زوجها المريض فاتجهت لباب الغرفة يتبعها (أدهم) والذي التفت كالصاروخ عندما سمع همسا باسمه, كان والده قد أفاق من إغماءته وناداه, حدق في والده في فرح واقترب منه وكذلك والدته التي هتفت : – حمدالله على سلامتك يا جلال, كده ترعبني عليك ؟ تطلع إليها في صمت ثم قال بصوت خافت لا يكاد يسمع : – سيبينا لوحدنا يا فريدة. نظرت إليه في دهشة ثم قالت في عصبية : – ليه ياجلال ؟ بعد خوفي عليك ده كله تقولي سيبينا لوحدنا ؟ نظر إليها نظرة جمع فيها كل مااستطاع من الصرامة الموجودة بداخله فبادلتها بنظرة عصبية ثم التفتت مغادرة الغرفة في غضب, حاول هو النهوض فأسرع إليه ابنه هاتفا : – لا يا بابا خليك مستريح. قال والده : – لا يا أدهم ارفعني بس شوية عاوز أقعد. ساعده على الجلوس في وضع مريح ثم جلس في مواجهته على السرير والتقط يده يقبلها وهو يقول : – كده يا بابا؟ كنا هنمو*ت من القلق . لم يهتم الرجل بما يقوله ابنه لكنه سأله : – اخوك فين يا أدهم ؟ مشي وسابني ؟ رد (أدهم) مدافعا : – لا يا بابا, آدم كان معايا برا لما أمي اتصلت ورجع معايا فورا وهو اللي جاب الدكتور وفضل معانا لحد من 10 دقايق بس اضطر يمشي عشان يوسف. ابتسم والده ابتسامة حنان خافتة ثم قال له : – أدهم, هأسألك سؤال وترد علي بصراحة ووضوح اتفقنا ؟ أومأ (أدهم) برأسه وهو يقول : – طبعا يا بابا ! صمت الرجل لحظة ثم سأل : – إنت بتحب جمانة بجد ولا مجرد نزوة او حاجة غريبة مش متعود تشوفها فشدتك ليها, حاجة جديدة عليك وعاوز تجربها زي وانت صغير لما صممت نجيب لك كمبيوتر عشان تفككه وتعرف هو عبارة عن ايه ؟ نظر إليه ابنه بجمود ثم قال بهدوء يحمل الكثير من الغضب الذي حاول كتمانه : – إنت شايفني طفل يا بابا ؟ المهم إني لقيت لعبة جديدة وشبطت فيها وعاوزها ؟ هي دي فكرتك عني بعد السنين دي كلها ؟ رد والده بلهجة دفاعية : – لا طبعا يا أدهم مش دي فكرتي والمسألة مالهاش علاقة بالسن قد حبك للتجديد والحاجات الغريبة اللي مش متعود عليها, يا أدهم لو ده فعلا اللي حاصل هنا يبقى بتظلم نفسك وتظلمها قبلك, الست مش بتستحمل إنها تكون مجرد تجربة في حياة الراجل, بتحب تكون هي حياته , لو حست إنك اتجوزتها لمجرد الاختلاف بينكم هتتعذب معاك وتكسر قلبها لو هي فعلا بتحبك. قال في نفسه ساخرا : هذا إن كانت تحبني؟ أنا بالنسبة لها مجرد وسيلة دفاعية تحتمي بها, لكنه قال ردا على كلام والده : – يا بابا أنا قلت لك إني لقيت معاها مشاعر عمري ماكنت اتخيل إني اعيشها, مشاعر مجنونة بتتحول من الحاجة لنقيضها في ثواني, بأحس في وجودها إني طفل مشاغب, أبقى عاوز أقولها بحبك وفي نفس الوقت استفزها وأغيظها وأضحك من جوايا زي الأطفال, حاجات جميلة أوي عاوزين تحرموني منها لمجرد فوارق مادية سهل أوي أستغنى عنها. كان يتطلع إليه في حنان وهو يتحدث عنها لم يلبث أن تحول إلى ذهول عندما نطق جملته الأخيرة فسأله في قلق : – تقصد ايه بتستغنى عنها يا أدهم ؟ تنهد مفكرا ثم رفع عينيه لأبيه وهو يجيب : – أقصد إني هاسيب البيت واعيش في شقة عادية واسيب إدارة الشركة لآدم وأشتغل موظف فيها وكده ميزانكم هيتظبط, أنا مرتبي الفترة اللي فاتت كان شبه غير مستخدم وبيتراكم في حسابي وخلاص وأعتقد إني أقدر أبتدي حياتي بيه معاها. شعر والده بقبضة باردة تعتصر قلبه فقال في حزن : – هتسيبنا عشانها يا أدهم ؟ هو ده قرارك ! هو ده الحل اللي هداك له عقلك, تبيع أهلك ؟ لم يجد ردا فصمت, لما قال ما قاله لوالده خاصة وهو في هذه الحالة, هل كان فقط يبثه أوجاع قلبه عله يشعر به ؟ هل يمكنه بالفعل تنفيذ ما قاله للتو ؟ سمع والده يقول له : – أدهم, أنا مش هأقدر اوافق على جوازة زي دي وأقولك أنا راضي عنها, لا هي تنفع لك من الناحية الاجتماعية ولا المستوى المادي ده غير جوازها السابق وبنتها ولا حتى إنت تنفعها بعصبيتك وشدتك واندفاعك, ومصيره ييجي يوم تحسوا بالفوارق دي لأن التوافق على كل المستويات حاجة ضرورية في أي جواز. شعر (أدهم) بالألم هاهو والده يصر على رأيه ويحاول منعه من الاختيار الوحيد الذي أراده, لقد ترك المجال الذي أحبه من أجله, ليقف بجانبه ويعمل في الشركة ويديرها, العمل الذي يعتبر الأول في حياة أي رجل, قاطع تفكيره والده بعدما لاحظ صمته وعلامات الألم المرتسمة على وجهه وهو يقول : – أدهم, أنا قلت لك إن التوافق مهم, لكن أنا هأسيبك تخوض التجربة بنفسك. رفع (أدهم) عينيه إليه في أمل فأكمل بابتسامة حانية : – أيوة يا أدهم, إنت اخترت وهاسيبك تتحمل نتيجة اختيارك, لو التجربة نجحت يبقى خير, ده شيء يسعدني إنك تكون مبسوط في حياتك, ولو فـ …… قاطعه (أدهم) بلهفة : – مستحيل يا بابا, أنا واثق في اختياري وعارف انا باعمل وهاعمل ايه. تطلع إليه والده في حنان وهو ينحني مقبلا يده ثم يرمي بنفسه بين ذراعيه فربت على كتفه, ثم سأله : – إنت عرضت عليها الجواز ؟ ابتعد عنه ثم أومأ برأسه إيجابا في خجل فابتسم الأب واستطرد : – وهي رأيها ايه ؟ أجاب في خجل أكبر وتردد : – لسه مش عارف, اديتها مهلة تفكر. رفع والده حاجبيه في دهشة ثم سأله : – يعني إنت مش عارف قرارها وعامل الفيلم ده كله ؟ ارتبك (أدهم) وقال مدافعا : – ماهي لو ماوافقتش هاتجوزها غصب عنها, يعني في جميع الأحوال في جواز. ازدادت دهشة الأب وهو يتطلع إليه ثم ضحك بصعوبة رسمت ابتسامة على شفتي ابنه وقال بعدها : – مجنون يا أدهم, للدرجة دي بتحبها ؟ شعر (أدهم) بنوع من الخجل وهو يجيب : – وأكتر يا بابا. ابتسم الأب في حنان وهو يتطلع لابنه وكأنه يراه لأول مرة, هاهو مندفع مجنون مثابر, عاد يسأله : – آدم عامل ايه بعد اللي حصل ؟ عاد الارتباك لـ (أدهم) وهي يجيب : – مش عارف يا بابا, كان شكله متضايق جدا وحزين ولما أمي كلمتني عشانك جري معايا وجاب الدكتور وفضل جنبك شوية ومشي, مش عارف هو عامل ايه دلوقتي. أومأ والده برأسه ثم قال : – طيب يا أدهم روح له اطمن عليه وقول له ما يزعلش مني, سكوتي كان مراجعة حسابات ماكانش قصدي أخذله. رد (أدهم) وهو لا يفهم : – حاضر يا بابا, المهم تقوم لنا بالسلامة. تنهد الرجل بعمق وهو يستعيد ذكرياته مع والدة (آدم) تلك المرأة الحنون التي لم تعش طويلا لترى ابنها الرجل الناجح الحنون الذي يهتم بالجميع ويحتويهم على الرغم من فقدانه هو نفسه للدعم والحنان. _____________________________ اتصلت (دينا) بـ (هشام) وطلبت مقابلته فدعاها لمنزله لكنها رفضت واتفقا على اللقاء في النادي الذي تذهب إليه, كان اللقاء ليلا وحرصت أن تتأنق أكثر من المعتاد, كانت تريد ولاؤه الكامل ليس فقط من الناحية المادية فهي ستدفع له مهما طلب لكنها تريد إبهاره كأنثى, تريده ذليلا لجمالها وأنوثتها متضرعا من أجل رضاها, وقد كان فما إن وقع بصره عليها من بعيد حتى تدلى فكه في بلاهة شديدة, رأته هي فتعمدت تجاهله وظلت ترقص مع أحد أصدقائها أمامه متمايلة في إغراء خلبه لبه, اتجه إليها فتظاهرت أنها رأته للتو وتركت صديقها متجهة إليه مادة يدها فتلقفها في لهفة وهو يهتف في تملق : – إيه الجمال ده, كتير كده أوي, إنت متأكدة إنك من الأرض مش من الجنة ؟ ضحكت بميوعة تاركة له يدها يلهث عندها وقالت : – أكيد من الجنة بس اتكرمت عليكم ونزلت الأرض. ضحك بفظاظة لفتت الانتباه إليهما فأمسكت بيده وجذبته مقربة إياه منها هاتفة : – تعالى نرقص. ارتبك وقال في خجل : – بس أنا مابعرفش أرقص. ظلت تضحك وهي ترد : – مش مهم تعرف اعمل أي حركات هتلاقيك بترقص يلا. وظلت تتمايل أمامه وتجذبه من يده وهو يتحرك معها كالمتخشب, أما هي فكانت ترقص بحرفية عالية وحركات مغرية للغاية أدارت الرؤوس من حولها, و هو كان يتحرك أمامها كالأبله وعينيه لا تنفكان عن متابعة جسدها بتفاصيله المكشوفة وتخيل المغطى منه, كاد لعابه يسيل عليها بالفعل وكم أسعدها ذلك وهي تلاحظ تعبيرات وجهه وهو ينظر لجسدها في اشتهاء مقزز لكنها لم تهتم, بعد انتهاء الرقصة جذبته من يده متجهة إلى إحدى الطاولات في ركن هادئ وجلسا سويا , سألته في دلال : – ها ايه رأيك في رقصي ؟ أجاب في شغف : – يجنن, كلك على بعضك تجنني, أنا مش فاهم إنت بتشتغلي في الشركة دي ليه ؟ تجاهلت سؤاله وقالت : – ثانكيو بيبي, المهم أنا لقيت فكرة هايلة عشان نعاقب جمانة ع اللي عملته فيك. انتبه لها وسأله بلهفة : – بجد ؟ فكرة ايه ؟ ابتسمت في انتصار واقتربت منه وهي تحكي له تفاصيل فكرتها الخبيثة وهو سيستمع إليها وعيناه تلمعان في جشع, جشع لأنوثتها ولما سيعود عليه من فكرتها. _____________________________ في مساء اليوم التالي كانت (دينا) جالسة مع والدتها في حديقتهم تثرثر معها بخصوص فكرتها للتفريق بين (أدهم) و (جمانة), سألتها والدتها باهتمام : – إنت متأكدة يا دونا إنه هيساعدك ؟ آخر مرة كان زعلان منك جدا. ابتسمت في غرور وردت : – مام, هو مايقدرش يزعل مني لأنه بيمو*ت فيا, هو بس غضبان زي الأطفال وحابب يتدلع شوية, وأنا عارفة مفتاحه فين. قالتها وأطلقت ضحكة ماجنة عالية شاركتها إياها والدتها ثم قالت بعدها : – خلاص كلميه دلوقتي أما نشوف. قالت (دينا) وهي تهز كتفيها بلا اهتمام : – أوك مام. ثم تناولت هاتفها واتصلت بأحد الأسماء المخزنة عليه وانتظرت الرنين بصبر وهي تنقر بأظافرها على الطاولة بجوارها, أتاها صوت طارق يقول : – دونا, أخيرا افتكرتيني؟ ردت بدلال : – هو انا أقدر أنساك يا بيبي, ظروف كده على حاجات كانت شاغلاني وباظبطها. شعرت بابتسامة على شفتيه وصوته يقول في شغف : – وحشتيني أوي, عاوز أشوفك. ابتسمت في ظفر وأجابت : – شور يابيبي, وقت ماتحب هاجيلك, بس عاوزة منك خدمة الأول. قال بسرعة : – أؤمريني. جاءه ردها سريعا : – انتو لسه بتسجلوا مش كده ؟ جاوبها صمته فأسرعت تبرر : – عاوزة عينة من صوت اتنين كده هتقدر تجيبهالي ؟ لم تجد سوى الصمت مرة أخرى فقعدت حاجبيها في قلق وكادت تقول شيئا لولا أن أتاها صوته يقول في صرامة ولهجة من اعتاد أن يأمر فيطاع : – تعالي يا دونا ولما تيجي هنتكلم في الموضوع ده وتشرحي لي التفاصيل. قفز شعور مبهم بالخوف إلى قلبها لكنها ضحكت بدلال وردت : – طيب يا بيبي, ويت فور مي Wait for me في مكاننا المعتاد. وافقها ثم أغلقت الخط لتلمح علامات التساؤل على وجه والدتها فقالت : – عاوز يقابلني ويعرف التفاصيل. سألتها أمها : – امممممممم وهتقولي له. ردت بسرعة : – لا طبعا مش كلها, هاديله فكرة سريعة كده وأألف الباقي, مش من مصلحتي يعرف إني بأعمل حاجة عشان أتجوز واحد تاني دلوقتي, خليها بعدين . هزت الأم كتفيها بلا اهتمام وتابعتها بنظرها وهي تنهض متجهة للفيلا قائلة : – هاطلع اغير وانزل اروح له, مام بليز دونت تيل داد Don’t tell dad يمكن أتأخر النهاردة. قالت أمها : – شور يادونا. قابلت والدها عند مدخل الفيلا فابتسم لها قائلا : – دينا حبيبتي, أنا رايح أزور عمك جلال تعبان شوية, تيجي معايا ؟ عقدت حاجبيها وهي تسأل : – تعبان ماله داد ؟ رد في قلق : – مش عارف اللي عرفته إنه أغمى عليه النهاردة وجاله الدكتور, هو الحمد لله أحسن بس لازم أزوره واطمن عليه. شعرت أن ذهابها معه سيزيد من قيمته لدى (فريدة) ووالد (أدهم) لكنها لم تكن تملك من الأمر شيئا الآن فلديها موعد أهم, فما كان منها إلا ان قالت : – أوك داد, معلش مش هاقدر آجي تعبانة شوية وهاطلع آخد شاور وانام, ابقي سلم لي عليهم كلهم. سألها والدها في قلق : – مالك يادينا ؟ تعبانة من ايه ؟ ردت في ملل : – مفيش داد مرهقة بس شوية وحاسة عاوزة أنام, سي يو. وتركته ثم دخلت إلى الفيلا لتستعد لموعدها الهام. ___________________________ أوقفت (دينا) سيارتها أسفل تلك البناية الفاخرة في أحد أرقى أحياء العاصمة, ثم ترجلت منها واتجهت للمصعد, ضغطت زر الطابق السابع عشر وهي تعدل من هندامها في مرآته وتخلع سترتها لتبدو من أسفلها ملابسها الشفافة الضيقة, أخرجت أحمر شفاة من حقيبتها وطلت شفتيها الممتلئتين سريعا مما زادها جاذبية ثم نثرت رذاذا آخر من عطرها المفضل, وصل المصعد للطابق المنشود فغادرته متجهة لإحدى الشقق في نهاية الممر, أخرجت مفتاحا من حقيبتها وفتحت الباب ودلفت للداخل, وجدت الشقة مضاءة بأضواء خافتة وتفوح منها رائحة عطرية محببة, تلفتت حولها في اهتمام فلم تلمح أحدا, أغلقت الباب خلفها واتجهت للداخل ملقية سترتها وحقيبتها على إحدى الأرائك في إهمال ثم نادت بصوت ناعم : – طارق, طروقة إنت هنا ؟ سمعت صوتا من ناحية الشرفة فالتفتت إليها لتجده يدخل منها مرتديا روبا منزليا أنيقا وهو ينفث دخان سيجارته وينظر لها بشغف كان يبدو في العقد الرابع من عمره طويلا عريض المنكبين وبدا على جسده أنه يمارس إحدى الرياضات العنيفة, عيناه سوداوين صارمتين تحملان نظرة تشي بالقسوة خاصة مع أنفه الحاد وشفتيه الرفيعتين التهمها بعينيه في ثوان ثم قال : – دونا, وحشاني يا مزة, تعالي. مد يده إليها فاتجهت إليه ووضعت كفها في يده فضغط عليها ثم جذبها إليه وهو يتأملها بشهوانية جعلتها تبتسم, ثم قالت في دلال : – إنت أكتر يا طروقة, من زمان ماكلمتنيش ولا لازم أكلمك أنا ؟ انطلقت من حلقه ضحكة مجلجلة ساخرة وهو يقول : – إيه يادونا احنا هنضحك على بعض ؟ ماانت عارفة إننا مش بنتقابل إلا لو في مصلحة مش بس للمزاج. مطت شفتيها في دلال أكبر وردت متظاهرة بالغضب : – يعني مااعرفش اتدلع عليك شوية يا طاطا ؟ استمر في الضحك وضمها إليه وقال : – هههههههههه اتدلعي براحتك ياقمر, هو أنا أقدر. ابتعدت عنه وسارت تتهادى في خطواتها مثيرة إياه أكثر ثم جلست على أريكة كبيرة والتفت تناديه : – تعالى اقعد بقى عشان نشوف المصلحة. رفع حاجبيه في دهشة مفتعلة وفال : – ياااه مستعجلة أوي ع المصلحة المرة دي يعني !! تظاهرت بعدم الاهتمام وهي ترد : – مش أوي تقدر تقول انتقام, تعالى وأنا أحكيلك. ثم جلست تقص عليه قصة ملفقة عن (جمانة) و (أدهم) وعن رغبتها في الانتقام منهما بعد إهانتها وطردها من الشركة, ثم صمتت في انتظار رده, قال بعد فترة قصيرة من الصمت : – اممممممم يعني الموضوع مزعلك وعاوزة تنتقمي وخلاص ؟ مفيش حاجة تانية ؟ نفت قائلة : – نو, حاجة تانية زي ايه ؟ رد بذكاء وهو ينظر إليها : – عاوزاه لنفسك مثلا. شعرت بالارتباك ولم تجد ردا فضحك مرة أخرى وقال : – يابنتي عادي, حتى لو عاوزاه لنفسك, أهو زيادة الخير خيرين والمليون يبقى ملايين, مادام أنا وانت زي مااحنا. قال جملته الأخيرة بلهجة خاصة أصابتها بالرعب لكنها على الرغم من ذلك ابتسمت وقالت : – أكيد مع بعض يا طروقة. سألها مدعيا النسيان : – ها قلتي لي بقى عاوزة ايه ؟ ردت بسرعة : – تسجيلات, هاديك الرقمين وعاوزة بس عينة, وأظن الموضوع ده سهل أوي بالنسبة لظابط في مركزك. فكر لثانية ثم قال في خبث : – امممممممم والثمن ؟ ابتسمت في إغراء وردت : – زي ماتحب. اقترب منها وقال في شغف : – انا باحبك إنتي. ولم يمهلها فرصة للرد.

مقالات ذات صلة

سمير شفيق ابراهيم

ملح بطعم السكر 2

وفـ..ـاة إبراهيم شيكا لاعب الزمالك السابق بعد صـ..ـراع مع المر.ض

عروسة تسجل مع زوجها لمدة 90 دقيقة وتنشر الفـ,ـيديـ,ـو في وسائل التواصل الاجتماعي

رواية عقد زواج ابتدائي ج2

عشق في قلوب قاسية

اترك تعليقاً إلغاء الرد