مع وقف التنفيذ ج4

أنهت مُهرة أختباراتها وبدأت فى اتمام أمر الاثاث الجديد أخذته الى معرض الاثاث الخاص بوالد صديقتها وأنتقيا غرفة نوم جديدة وغرفة أخرى للاستقبال ولقد كانت مُهرة فى غاية السعادة والفرحه وهى تتعلق بيده وهما يتنقلان بين الغرف المعروضة .. اشارت له على غرفة صغيرة الفراش وقالت :
– مش ملاحظ ان الاوضه دى الكومدينو فيها اكبر من السرير
مال على أذنها وقال :
– هو فين السرير اصلا

كتمت ضحكتها وأكملا رحلتهما فى البحث عن أسعار مناسبة وقسط مناسب لحالتهما المادية فى ذلك الوقت وتم تحديد ميعاد الزواج بعد ايام من اتمام تجهيز شقة الزوجية …

حزمت عزة حقيبتها وهى تقول :
– خلاص يا عمرو كل حاجه جاهزة
دلف إلى الغرفة وقال وهو ينظر للحقائب :
– ده أحنا هنشوف بهدله يابنتى
قالت باعتراض ليه بس ده انا بحب اسكندرية اوى وكان نفسى اعيش فيها من زمان كويس أنك لقيت شغل هناك
بدل ملابسه وهو يقول :
– اه طبعا مصائب قوم عند قوم فوائدُ

لفت ذراعيها حول ساعده وهى تقول بابتسامة واسعة :
– يعنى أنت مش فرحان زيى اننا هنعيش فى اسكندرية على الاقل هنقضى شهر عسل جديد مع مُهرة وفارس وكمان بلال وعبير هيسافروا معانا اسبوع
وضع يده على بطنها وهو يقول بمرح :
– شهر عسل ايه بقى ما خلاص أدبست واللى كان كان

دفعته وهى تقول بتبرم:
أمشى كده هو أنت كنت تطول ابقى ام عيالك
دفعها من كتفها برفق وهو يقول :
-أمشى كده وانا متجوزك شفقة ورحمة اصلا

**************************************

كالعادة كانت زفة اسلامية جميله ـ أحاطت مُهرة الاخوات حاملين الدفوف والشعلات وأطواق الزهور وهى تمر بينهم زهرة يافعه فى مقتبل العمر اذا نظرت فى عينيها ترى الامل والسعادة والتفاؤل والحب ..
تصفق وتنشد معهم كالاطفال .. أما فارس فى قاعة الرجال فكان يشعر للمرة الأولى أنه فى حفل زفافه كانت السعادة بادية على وجهه وبين الحين والاخر يقترب من عمرو قائلا :
– ما تنهى بقى يا عم أنت مش مسافر الفجر ولا ايه

اقترب بلال منهما وسمع عمرو وهو يقول ل فارس مداعباً :
– ايه ده هو مش الفرح عندكوا بيبقى اسبوع متواصل ولا ايه
ضحك بلال ضحكات رنانة بينما دفعه فارس من كتفه وهو يقول :
– اسبوع مين يا عم أنا هروح اخد مراتى وأمشى واقعد انت بقى الاسبوع ده براحتك
وضع بلال ذراعيه على كتفيهما وهو يقول مشاكساً :
– لا يا عمر حرام اسبوع كتير مشيها تلات تيام بس