مع وقف التنفيذ ج4

حاولت عبير فكاك يده من حولها وهى تشعر بالخجل وهو مازال مطبقاً عليها بقوة لا يريد تركها فصاحت فى والدته :
– ألحقينى يا ماما خاليه يسيبنى
جلست والدته على الاريكة وهى تهتف به :
– سبها وبطل استعباط

نظر الاولاد إلى بعضهم البعض وكأنهم يقررون خطةً ما لفك أسر والدتهم … أندفعوا بقوة نحوهما وسقط الستة أرضا وسط ضحكات عالية .. استطاعت عبير أن تتحرر وتنهض مسرعةً تجرى باتجاه المطبخ وهى تصيح :
– حرام عليكوا الاكل هيتحرق

دخل بلال خلفها بعد أن أعطى والدته دوائها ووقف خلفها ينظر إليها وهى تُعد الطعام والعرق ينبت على جبينها من الدخان المتصاعد فى وجهها وهى تزيل غطاء القدر وتقلب فيه بهمة وتتذوقه لتشعر بالرضا تجاهه .. وضعت الغطاء مرة أخرى وألتفتت لتجده واقفاً يشاهدها قالت وهى تضيق عينيها :
– نعم يا فندم جاى تكمل هزار هنا ولا أيه
ضحك وهو يقول :
– لا والله مش قصدى
ثم تقدم منها ومسح حبات العرق التى تجمعت على جبينها وقال :
– أنتى بتتعبى اوى يا عبير ربنا يخاليكى لينا يارب أنا مش عارف من غيرك كنت هعيش أزاى
نظرت له بحب وقد تناست تعبها تماماً على اثر كلماته العذبة المُقدرة لمجهودها وقالت :
– ما أنت كمان بتتعب فى شغلك بره البيت
هز راسه نفياً وقال :
– لا أنا لازم اساعدك قوليلى اعمل ايه وأنا هتلاقينى فوريره على طول

قالت بخجل :
– ممكن تحضر الاكل معايا بس
رفع حاجبيه قائلا بدهشة :
– بس كده
أومأت برأسها فأنحنى بخفة أمامها وهو يقول بأحترام :
– تحت أمرك يا مولاتى
ضحكت وضربته بخفة على كتفه ثم أعطته أحد الاطباق فى يده قائلة :
– أتفضل بقى للخلف دور

ألتفوا جميعاً حول المائدة وشرعوا فى تناول الطعام ولكنه فجأة ترك الملعقة من يده لتصدر صوتاً عاليا وهى ترتطم بالطبق امامه وعقد جبينه هاتفاً :
– ايه ده يا عبير ايه الاكل ده
نظر الجميع إليه وقالت عبير بتوتر :
– ايه ماله
عقد جبينه أكثر وقال بصرامه:
– طبيخ ده ولا بسبوسة
تذوقت والدته الطعام وقالت :
– ماهو كويس أهو يابنى

بينما قالت عبير بإضطراب :
– بسبوسة ازاى يعنى
ألتفت إليها بنفس الصرامة وقال :
– المعلقه يا هانم اللى دوقتى بيها الاكل ولمست بؤقك حطتيها فى الحلة تانى علشان كده الطبيخ بقى مسكر
رفعت عبير حاجبيها بينما نظرت له والدته ثم ضحكت وقالت :
– والله أنت عاوز علقة
ثم نظرت لعبير وقالت :
– الله يعينك عليه يا بنتى أنتى مستحمله رخامته دى أزاى
زفرت عبير وهى ترى ضحكاته وقالت :
– الله يسامحك يا بلال خضتنى انا قلت حطيت سكر بدل الملح
ضحك وهو يمسك بيدها ويقبلها وهو يقول :
– مش انا قلتلك قبل كده اى حاجه بتمسكيها بتبقى مسكره
قاطعه أحد الاولاد قائلا:
– ابى أنا عاوز من الفرخه دى