ملح بطعم السكر 1
ياخذ رياض نفس عميق وينظر اليها باسمآ”
مش هتصدجي مين يا اماي دي خيتك وحبيبتك وسلفتك
لتحدق اليه امه بقوة وتهتف بعدم تصديق ودهشه ”
لاه مش معجول ،جصدك حفيظة خيتي ومرت عمك منصور ممصدجاش ،ياه بعد كل السنين ده افتكرتنا جولي فين ارضيها وكيفها وكيف جوزها وولادها طمني عليها
يبتسم رياض بتهكم ”
انا عرفت هما فين بمصر، لكن معرفش احوالهم ولا اخبارهم، ومضطر اسافر دلوج لانها جالتلي محتاجني ضروري
انا هشوف لو لحجت جطر نازل مصر الليلة هنزل فيه ملجتش هسافر بالعربية وهاخد معايا سباعي يبدل معايا في السواجه
ترتاب امه من حديثه عن السفر وتساله بقلق”
تسافر دلوج واحنا داخلين علي نص الليل !! خليك للصبح الصباح رباح والنهار له عيون، مجتش من الكام ساعه بتوع الليل
يهز راسه رافضآ وكلماتها تصدح في راسه وتردد بقوة وهي تقول”
((جبل العار ما يلحجنا))
ليسال نفسه بغضب ، ياتري عار ايه يا مرت عمي اللي هيلحجنا
انا لازم اخبر عمي الشيخ ياسين ، هو الكبير يعرف عمي منصور زين عني لينظر الي امه ويقول لها بتصميم”
مينفعش يا اماي مدام طلبتنا ،يبقي اكيد محتجانا ،عن اذنك انا هجهز حالي ،وجولي لسناء تنام مع ولادى لحد ما اعاود
لتساله امه باستفسار شاعرة بهم ثقيل قد القي علي كاهل أبنها”
هو انت هتغيب في مصر كتير ولا اية؟
يربت رياض علي يد امه في حنان وينحني يقبلها باحترام”
ماخابرش يا اماي، هي مجلتش غير انها محتاجاني ضروري ومن الواجب اروح ليها واعرف اللي حوصل منيها
انا خارج واول ما اوصل هتصل ابلغك كل حاجه، كمان الموبيل معايا تجدري تتصلي فينا لو جلجتي علي او اتاخرت عليكم
يتركها بعد أن وصاها علي اولاده ليذهب الي عمه الشيخ ياسين ، الذي استغرب عودته له بعد اقل من ساعه ليساله”
خير يارياض ، عاودت تاني ليه؟ وفين الولد اوعي تجولي حصلهم حاجه طمني يا ولدى خلعت جلبي حوصل ايه رجعك!!
يمسد رياض علي ظهر عمه ويطلب منه أن يجلس ويسمع له”
اجعد يا عمي وانا هفطنك علي كل حاجه ؛ عارف مين حددتني لما رجعت من عنيدك جبل ساعه مش هتصدج
ينظر اليه عمه ياسين بريبة”
مين ياولدى ، اكيد حد مهم اللي يخليك تهمل ولادك ودارك وتجي عندي دلوج ،واكيد هو ده سبب سحنتك المجلوبة
يبتسم بضيق ويمسد علي يده مع ايماءه من راسه لا تبشر بخير”
اول ما وصلت الدار لجيت سناء بتجولي الحج في واحدة عايزة الحج وجدى وبتقول انها محتجاله
انا جولت حد غريب عن البلد وليه عشم في ابويا وطالبه مساعدة لكن اول ما حددتها لجيتها سالت عن بوي وعنيك لما عرفت انه مات وكانت خابرة زين انك الكبير من بعده
وده خلاني اشك انها تعرفنا زين، ولما سالتها هي مين
خبرتني انها حفيظة مرات عمي منصور
