أرض بور
كان الكل يبكي معهم حتى شهد زوجة حازم والتي كانت تشبه الملاك فمسحت رهف دموعها ونظرت لحازم فتحدث
– انت كمان يابابا وحشتني كلكم وحشتوني قوي ونفسي اشوفكم انا السنة دي عدت عليا صعبة قوي من غيركم شهد خففت عني كتير نفسي تعرفوها وتحبوها لتضحك رهف بقوة وهي تصفق بيدها
– العب بعيد ياشاطر كلنا عارفين شهد وبنحبها وبنتكلم دايما انت اللي في الطراوه لينظر حازم لشهد بذهول فيحمر وجهها ثم تهمس
– اعمل ايه طيب حبيتك قوي وكنت عايزة اتعرف على عيلتك كلهم ويحبوني زي مابحبهم من كلامك عنهم يحتضنها حازم أمام الجميع مقبلاً رأسها ثم يعود لينظر لـ رهف
– مبارك يارهف الف مليون مبارك بتمنى لك السعادة من كل قلبي وخليكي عارفة ان في اخ وراكي غير اللي عندك دول لو عملك حاجة الباشمهندس ح انزله وانتي عارفة اني مجنون ومعايا شهادة معاملة أطفال ليضحك الجميع ويقترب أدهم من رهف ويضع يده عليها وينظر لحازم
– بقولك ايه ياعم المجنون لو انت معاك شهادة واحدة مايغركش عقلي لا ده انا ممكن اقلب لك مجنون رسمي
اخذ الجميع يضحك وقام حازم بالمباركة لشهيرة وشريف فهو علم بزواجهم وتغيير شهيرة دون معرفة التفاصيل وظلوا جميعا يتحدثون ويضحكون معاً حتى اختتم أدهم الحوار
– بقولك ياحازم قبل ماتقفل بقى لك سنة عندك يعني اكيد لك اجازة وفرحي انا ورهف اول الشهر ياريت تيجي وتكون جنب اختك واخوك ولا ايه ليبتسم حازم بسعادة
– ان شاء الله اتمنى ده اكيد بس خفت اقول أتفهم غلط بس الحمدلله خلاص كده ان شاء الله أنزل قبل فرحكم بيومين تلاته ولا حاجة… قولولي بس لو محتاجين حاجة من هنا
ليرد الجميع تيجي بالسلامة
أغلق حازم الهاتف معهم وهبطت دموعه مره اخرى لتقترب منه زوجته وتحتضنه بقوة فيلقي برأسه على صدرها كانت شهد تخاف من مواجهته مع رهف فهي كانت تعرف انه احبها بالفعل من كلامه معها قبل زواجهم وبعد أن هدءت دموعه شعر بها وبخوفها من دقات قلبها فرفع رأسه ونظر لها يمسح دموعها التي تنحدر في صمت
– شهدي لو انتي فاكرة ان دموعي دي علشان رهف تبقى غلطانة انتي سمعتي كلامي لأدهم وده احساسي فعلا رهف كانت بالنسبة لي بنت جميلة حلوة ورقيقة مراتي مش ح انكر عشت معاها ايام حلوة وانهرت بعد انفصلنا وتصورت اني لا يمكن ارتبط بعدها لكن لما شفتك وحبيتك واتجوزنا عرفت ان اللي كان بيني وبين رهف كان حاجة حلوة وراحت خلاص اللي جوايا لـ رهف مشاعر حلوة وجميلة بس تحت بند ولاد العم الأخوات مش اكتر انتي وبس ياشهدي انتي حبيبتي ونور عيني انتي اللي مقدرش استغني عنك ابدا
