رواية سراديب العشاق الفصل الثامن

الفصل الثامن أشرقت شمس يوم جديد لتداعب أشعتها جفونه ليتململ ويفتح جفنيه بهدوء ليجد نفسه قد غفا في سيارته حاول الاعتدال في جلسته ولكن شعر بألم في جسده ورقبته الذي حاول فك تشنجاتها بإيماءة رأسه نحو اليمين واليسار، أدار محرك سيارته متوجهًا إلى منزلها لينهي الأمر ويعيدها إلى منزله مرة أخرى وليحترق العالم بعد ذلك. قطعت السيارة الطريقة بسرعتها الزائدة وبعد قرابة النصف ساعة كان يصف سيارته أمام منزلها ليترجل منها بلهفة قاطع الدرج بخطوات سريعة حتى وقف أمام باب شقتها يلهث وكأنه أتى إليها سيرًا على الأقدام. لحظات انتظمت فيها أنفاسه ثم ضغط على الجرس عدة مرات، لكن دون جدوى لم يفتح له أحد ليشتعل قلبه خوفًا عليها ليطرق على الباب بعنف يدرك أنها بالداخل عندما قرر استعمال نسخة المفتاح الاحتياطي التي يحتفظ بها في سلسلة مفاتيحه، ولكنه وجد الباب مغلقًا من الداخل. صعد إلى شقة شقيقها وطرق الباب عدة مرات ولكن دون رد فلقد كان شقيقها وزوجته خارج المنزل مما اضطره إلى أن يهبط إليها يحاول مرة أخرى أن يطرق الباب ولكن هذه المرة كان يطرق بعنف تململت على أثر هذا الضجيج لتهب من نومها جلست مفزوعة تتلفت حولها لتجد نفسها غفت على الأرض. وقفت في محاولة لفك تيبس عضلاتها وخرجت بسرعة من غرفتها وظنت ان الطارق هو اسماعيل شقيقها، فعلى الفور فتحت الباب لتجده يقف أمامها بهيبته المهلكة إلى قلبها. استدارت تاركةً إياه على الباب دون أن تنطق بحرف واحد وكأنها لا تراه، تحركت تجاه المرحاض لتغسل وجهها من آثار النوم ثم تحركت أمامه إلى غرفتها لتبدل ثيابها بأخرى مريحة وخرجت إلى المطبخ لتعد الشاي، بينما هو قد دخل وأغلق خلفه باب الشقة وجلس على الأريكة بالصالة منتظر خروجها إليه بهدوء. دقائق قليلة خرجت بعدها لتضع أمامه كوب الشاي الخاص به، وأمسكت بكوبها وجلست تنظر إلى الفراغ منتظرة الجزء الثاني من هذه المسرحية السخيفة التي تعيشها منذ ليلة أمس. أشعل سيجارة ينفث دخانها بهدوء وهو يتأمل كل إنش فيها يلعن نفسه على غبائه فيوم واحد بعدت عنه أحرقت قلبه فكيف سيكون الأمر إذا قررت الابتعاد نهائيًا ولكن عقله رفض الأمر ليتحدث بهدوء: زينة أهون عليكي تباتي بعبد عني ليلة كاملة. ابتسمت بتهكم وهي تنظر إليه دون أن تتحدث وتركت كوب الشاي من يدها على المنضدة، ليكمل هو حديثه فهو يعلم جيدًا أنه أمام مهمة صعبة جدًا وعليه أن يفوز بها من جديد: ممكن تسمعيني يا زينة وتفهميني؟. اقترب منها وجثى على ركبتيه أمامها وأمسك بيدها بين كفيه وضمهما تجاه قلبه وقال: صدقيني يا زينة عمري كله غصب عني مش بمزاجي.. كان يبحث داخل مقلتيها على أي بارقة أمل بأن قلبها سيلين من جديد ولكنه وجدها خاوية من أي تعبير عجز عن قراءتهما ولأول مرة يرى بعينيها نظرة جديدة لا يعرفها من قبل، وما أكد حدسه أن يديها كانت بين كفيه جامدة وكأن لا روح فيهما. أكمل والدموع تتلألأ بمقلتيه قائلًا: أمي يا زينة ومقدرش اعصاها وغصب عني وعنك لازم يكون لها حفيد يشيل اسم ابويا ويورثنا بعد ما أموت، كنت هتجوز بس عشان أخلف ابن هيكون ابنك قبل ما يكون ابني وكنتي هتفضلي ملكة متوجة على عرش قلبي ولا غيرك هيسكن قلبي. سحبت يدها من يده وقالت: ياه دا أنت فكرت في كل حاجة وأنا المغفلة اللي كنت نايمة على وداني صح. ثم دارت حول نفسها وهي تهدر بغضب وقهر: أنا زعلانة ليه دا أنا لازم افرح اومال إيه جوزي هيتجوز لمجرد يبقى أب، وماله إيه المشكلة إيه يعني هيكون في حضن واحدة تانية إيه يعني يا بت يا زينة ما تحمدي ربنا ما أنتَ البنت الهبلة اللي هيضحك عليكي بكلمتين مالهمش لازمة قال ملكة متوجة على عرش قلبه. قهقهت بصوت عالي وكأن ما تبقى من عقلها ذهب أدراج الرياح قائلة: هو في ملكة حد بيشاركها عرشها يا صلاح هههههه تصدق دي نكتة بايخة. ثم اقتربت وأمسكته من تلابيبه بغضب وسحبته ليقف أمامها وقالت بغضب أنثى جُرِح كبريائها لتوه: وأنت نايم معايا امبارح الصبح وأنا بين أحضانك وأنت بتقولي أنك بتحبني كنت بتقولها لي ولا كنت شايفها مكاني؟، أنت ازاي بالبجاحة دي نايم في حضني ودابحني بسكينة باردة، ازاي جالك قلب تعمل فيا كده ازاي؟. طيب كنت تعالي قولي وصارحني والله ما كنت هعترض، وكنت هنسحب من حياتك بهدوء وهتمنى لك السعادة. تنسحبي من حياتي ازاي يا زينة؟. نطق سؤاله يخشى من ردها لتخبره بجبروت: ايوا كنت همشي وأسيبك بهدوء على الأقل كنت هحترمك يا صلاح لكن دلوقتي انت خسرت احترامي ليك. ابتعدت قليلًا وهدرت: مبروك يا عريس... ورقة طلاقي توصلني بهدوء والله يسامحك على كسرة قلبي لكن أنا عمري ما هسامحك يا صلاح فاهم عمري ما هسامحك. لم يستطيع أن يتمالك اعصابه ليقترب منها في خطوة واحدة وهو يمسكها من ذراعها بقوة: على جثتي طلاق مش هطلق يا زينة وهتفضلي على ذمتي لآخر يوم في عمري برضاكي أو غصب عنك أنتِ فاهمة. نفضت يده بقوة من عليها ونظرت له باحتقار واردفت: لأ مش فاهمة.. عاوز تبقى جوز الاتنين.. وأكملت باستهزاء: عارف المثل بيقول إيه على جوز الاتنين بيقول: جوز الاتنين يا فاجر يا قادر. ثم اقتربت منه وهمست بجوار أذنه: وأنت الاتنين يا صلاح فاجر وقادر من وجهة نظري، ومش أنا اللي تقبل تعيش مع نص راجل. زي الشرع ما حلل لك تتجوز اربعة حلل كمان للزوجة تختار تكمل أو تنفصل، وأنا مش هقبل يكون لي ضرة أو أعيش مع نص راجل. جذبها من خصرها لتستقر بين أحضانه ليهمس بجوار ثعرها: مش هطلقك يا زينة مهما عملتي ومهما قولتي مش هتستفزيني وكل ما فهمتي الكلام دا بسرعة هيكون أحسن لنا إحنا الاتنين. ابتعدت عنه والغضب يتطاير من عينيها ليتحدث بتحدي ولكنه لم يحسب رد فعلها جيدًا: كتب كتابي الخميس الجاي والجوازة دي لهدف أنها أخلف طفل وأول ما دا يحصل جوازتي التانية انتهت، أتمنى تفهمي دا كويس. قطع حديثهم صوت طرقات عنيفة على الباب فتوجه يفتح الباب ليجد والدته أمامه بشموخ وكبرياء تطالعهم باحتقار قائلة: الله الله إيه يا سيد الرجالة مقدرتش على بعادها بايت عندها بتحايلها ما شاء الله على الرجالة. نظرت زينة اليها بعدما أدركت أنه لم ينم بالمنزل بالأمس، بينما صلاح كان صامت مندهش من تصرفات والدته، ولكنها لم تعيره أي اهتمام لتكمل بكلامها اللاذع لتلك المسكينة التي تقف تدور بنظرها بينهم: إيه يا زينة سايبة بيتك ليه يا حبيبتي.. لا أنتِ أول واحدة جوزها هيتجوز عليها ولا أنتِ آخر واحدة. الراجل يقدر يفتح بدل البيت اربعة، وكفاية أنه متمسك بيكي رغم العيب اللي عندك مش عارفة على إيه لكن هنقول إيه وماله مش مشكلة تفضلي على ذمته وهو يتجوز ويشوف حاله ويخلف عيل يشيل اسمه. كادت أن تتحدث زينة لولا دخول اسماعيل وزوجته بعدما وصلا إلى المنزل ووجدوا باب شقة زينة مفتوحًا: السلام عليكم يا جماعة خير أنتم هنا في إيه؟. نظرت وجيدة إليهم وقالت: عقل اختك يا اسماعيل الهانم سايبة بيت جوزها وبايتة هنا من امبارح قال إيه زعلانة عشان صلاح هيتجوز ويخلف عيل يشيل اسمه. إيه يتجوز تاني؟. اردفت بها أميرة وهي تنظر إلى صلاح بغيرة، ثم سرعان ما تبدلت نظرتها إلى دهشة تدور بعينيها بين الجميع بصمت. اقترب إسماعيل من شقيقته وتحدث بهدوء يداري شماتته فيها قائلًا: إيه المشكلة يا زينة دا حقه يا حبيبتي من حقه يتجوز ويخلف. ابتسمت زينة بحزن وأهدرت: ومين قالك أني زعلانة أنه هيتجوز ربنا يتمم له على خير، لكن زي ما من حقه يتجوز من حقي أقبل أو أرفض أعيش مع ضرة. نظر اسماعيل بغضب إلى شقيقته فها هي ستهدم مخططه بالاستيلاء على المنزل فهدر بحدة: يعني إيه عايزه تطلقي منه. لتتحدث وجيدة بحدة: قال رضينا بالهم والهم مش راضي بينا. اهدي يا حاجة وجيدة وكل حاجة هتم زي ما أنتِ عاوزة. قالتها أميرة بخبث وهي تنظر إلى زينة التي رمقتها باحتقار. اقترب اسماعيل من شقيقته قائلًا: طلاق إيه اللي أنتِ عاوزاه يا زينة مفيش طلاق وهترجعي مع جوزك دلوقتي بيته. بُهتت ملامحها من كلام شقيقها أيساند صلاح بدلًا من أن يكون سندًا لها، تذكرت الحاج حسنين عندما اشترط على حمادة أن يحافظ على ابنته، لتهرب دمعة غادرة على وجنتها وتمنت أن يكون والدها على قيد الحياة في هذا الموقف ليساندها في محنتها. امسك اسماعيل يدها ليسحبها تجاه صلاح تحت نظرات وجيدة الشامتة قائلًا: يالا يا صلاح خد مراتك وحلوا مشاكلكم في بيتكم، وربنا يهديكم. مد صلاح يده ليمسك بيدها ولكنها نفضت يدها من يد اسماعيل وصرخت بهم: أنتم إيه مبتحسوش، ثم نظرت إلى اسماعيل وقالت بغضب: هو انا مش أختك المفروض تكون سندي مكان أبونا اللي لو كان موجود كان حرق الدنيا كلها عشاني، بتاخدني وبترجعني له عشان يدوس عليا تاني لأ يا اسماعيل... لأ وألف لأ. ثم نظرت إلى وجيدة وأهدرت: إيه اللي يجبر ابنك يتحمل واحدة معيوبة يا حاجة وجيدة بالعكس قولي لابنك يطلقني وينساني ويعيش حياته مع اللي اخترتيها له. وأنت يا صلاح صدقني على أد حبي ليك على أد ما أنت نزلت من نظري وبقولها لك قصاد الكل: طلقني يا صلاح طلقني وروح لحالك. لطمة قوية نزلت على وجهها لتشهق أميرة بصدمة من فعلة زوجها بينما وجيدة نظرة بشماتة لها، وقف صلاح بينهما يحميها خلف ظهره يبعد اسماعيل عنها، نجح صلاح في منع اسماعيل من الوصول إلى زينة ولكنه فشل في منع كلامه المسموم من أن يصيب قلبها عندما نطق الآخر بغل واضح للجميع: بتبيعي وبتشتري في الراجل ليه يا بت دا اللي زيك تحمد ربنا إن جوزك متمسك بيكي على عيبك يا جاحدة عايزة تفضحينا وسط الناس خلاص مش لاقية اللي يلمك. وقفت زينة وعيناها تنزف دموع القهر والظلم لتتحدث من بين شهقاتها: الله في سماه يا اسماعيل القلم دا هتدفع تمنه غالي، ومن النهاردة ملكش دعوة بحياتي. ثم التفتت إلى صلاح وقالت بنبرة تهديد: طلقني وإلا قسمًا بالله هخلعك. حاول إسماعيل أن يضربها مرة أخرى ولكن صلاح منعه وسحبه معه إلى الخارج وأخرج معه أمه وأميرة وتحدث بحزم: زينة هسيبك تريحي أعصابك يومين... يومين وهرجع لك، وأنت يا اسماعيل لو عرفت أنك مديت إيدك تاني على مراتي هزعلك. وأكمل بتحذير: مراتي قاعدة هنا في بيتها ممنوع تقرب منها هي أختك لكنها لسه مراتي وصدقني أنا اللي هقف لك مفهوم. اغلق عليها باب الشقة ونظر إلى اسماعيل وزوجته بتحذير. ..........................