رواية سراديب العشاق الفصل السادس

الفصل السادس انقضى شهرًا كاملًا عادت فيه الحياة إلى طبيعتها وإيقاعها المعتاد. عاد حمادة وزوجته من السفر منذ اسبوعين، وعادت وجيدة لممارسة مهامها ومتابعة تجارتها، ومتابعة تسلطها على زينة كما حاولت أن تتحكم في سوسن لولا توقف حمادة لها بالمرصاد يمنع سطوة والدته على زوجته، نجح في وضع حدود منذ عودته مع عروسه إلى شقتهم، أبى أن يتناول طعامه يوميًا كشقيقه ونجح في فرض رغبته في وضع حدود لحياته من البداية لكي لا تتحول حياته رويدًا إلى روتين ممل. بينما كانت زينة تشعر بالتشتت والتيه بينهما فالصراع والصدام يوميًا كان يفوق حد الاحتمال إلى أن جاء عليهم صباح أحد الأيام التي ستتبدل فيه الأحوال. كانت وجيدة تجلس تتناول طعامها بعد عودتها من عملها ليدخل حمادة عليهم باندفاع والغضب يتطاير من عينيه يسألها بهدوء ما قبل العاصفة من يراه يجزم بأن غضبه سيحرق الأخضر واليابس: الكلام اللي سمعته ومالي السوق دا حقيقي يا ماما. رمقته والدته بنظرة تحذيرية لتجبره على السكوت وهي تنظر إلى زينة ثم عادت تنظر له قائلة: نتكلم بعدين يا حمادة مش وقته الكلام دا دلوقتي ولا مكانه. تخصر حمادة في وقفته وهدر بحدة وصوت عالي: لا والله دا كتب كتاب البيه بكرة وأنا آخر من يعلم، لأ أنا إيه دا كلنا هنا آخر من يعلم، طيب مش الأصول بتقول إن الأستاذ ياخد رأي الزوجة الأولى في جوازته الثانية ويا توافق تكمل معاه يا تنفصل عنه. خرجت زينة وسوسن من المطبخ على صوت حمادة المرتفع ليهب صلاح واقفًا يهدر به: ما تخرس بقى هو انت محدش مالي عينك ولا إيه؟. اه محدش مالي عيني هنا ما هو الكبير اللي بيحترم تصرفاته وبتكون كلها في النور مش في الدرى زي الحرامي اللي بيسرق سريقة. هدر بها حمادة في وجه صلاح تحت نظرات الجميع الفضولية؛ لمعرفة ماذا حدث بينهما. هبت وجيدة من جلستها واقتربت من حمادة وهي تصرخ به: اخرس قطع لسانك يوم ما تتكلم مع أخوك الكبير بالأسلوب دا إيه خلاص نسيت نفسك، مبقاش ليك كبير يلمك طايح فينا كدا ليه؟. ليهدر حمادة بعدما فقد آخر ذرة في ثباته بغضب جحيمي: أخويا الكبير خاين... ايوا خاين ومالوش أمان، اللي يتفق في جوازه مرة تانية وفي السر ميبقاش كبير ولا محترم. اقترب من صلاح وعيناه تخترق صلاح ترمقه باحتقار يسأله: قولي أنه كذب.. قول لي كل اللي سمعته في السوق كذب... انطق أنت اتفقت في جوازك من مها بنت الحاج حامد يوم الخميس الجاي يا أخويا يا كبير انطق؟. استمعت إلى كلماته بصدمة وذهول، كل كلمة تفوه بها حمادة كانت تهشم قلبها وتفتته إلى أشلاء، كذبت اذنها شكت بأنها سمعت خطأ ولكن تأكدت من صحة ما سمعته عندما وقفت وجيدة تصرح وتؤكد حديثه قائلة: أيوا يا حمادة أخوك هيتجوز يوم الخميس الجاي من مها بنت حامد، وأكملت وهي تنظر إلى زينة باحتقار وتهديد: واللي مش عاجبه الباب يفوت جمل. لم تقوى زينة على الصمود أكثر من ذلك، كانت تقف كالجماد ثابتة أمامهم ثبات ظاهري تنظر إلى زوجها الذي كان يحدثها منذ قليل بمعسول الكلام، فقبل قليل كان يخبره عن مدى اشتياقه اليها، كيف له بخداعها، لعنت سذاجتها، سرت في أوردتها برودة لا تعرف سببها حتى أصبحت لا تقوى على الصمود أكثر من ذلك لتسقط مغشيًا عليها لتصرخ سوسن باسمها وهي تجثو على ركبتيها تفادي سقوط رأسها وارتطامها بالأرض ليلتفت الجميع على صراخها ليصاب صلاح بالفزع وهو يراها ممدة أمامه لا حول لها ولا قوة، ليسرع إليها يحملها بين يديه مغادرًا إلى شقته ليسعفها صعدت خلفه سوسن وندى وشقيقه حمادة بينما وجيدة ظلت جالسة مكانها تتمتم: في ستين داهية خلينا نخلص منها بقى. دفع صلاح باب شقته بقوة ودخل بها إلى غرفتهم ولحقت به ندى وسوسن لمساعدته بينما ظل حمادة منتظر في الصالة أن تستعيد تلك المسكينة وعيها. حاول صلاح وسوسن افاقتها ولكن دون جدوى مما اضطر الأخيرة للخروج إلى حمادة بسرعة تطلب منه أن يأتي بطبيبة المستوصف سريعًا فزينة لا تستجيب لمحاولات الافاقة، وعلى الفور غادر حمادة راكضًا ليأتي بالطبيبة لإسعافها. جلس صلاح بجوارها يضم رأسها إلى صدره كالطفل الذي يخشى فقدان والدته، أشفقت سوسن على حالته لتتحدث بهدوء حذر: ليه يا صلاح ليه تجرحها بالشكل دا، طالما بتحبها ليه تكسرها؟. طيب كنت قولت لها وصارحتها كان على الأقل الموقف هيكون غير اللي احنا فيه دلوقتي. نظر إليها بعيون باكية لم يقوى على كبح دموعه قائلًا: غصب عني... والله غصب عني. ابتسمت سوسن باستهزاء لأول مرة تشعر بحقارته فقالت: غصب هو في راجل يتغصب على الجواز، دا البنت هي اللي ممكن تنجبر على الجواز انما راجل وينجبر طيب تتفهم ازاي دي؟. أردف ولا زالت عيونه تذرف دموع الندم: في حاجات الظروف بتجبرنا نعملها حتى ولو غصب عننا، وصدقيني يا سوسن أنا خوفت أقولها أخسرها. أومأت سوسن بأسى: واهو اللي أنت كنت خايف منه حصل، أنت خسرتها فعلًا يا صلاح، ربنا يسترها بقى لما تفوق من رد فعلها. تفوق هي بس وكل اللي تطلبه ماشي والجوازه دي أنا مش عوزها هفضها سيرة الحكاية دي أنا مش عايز غير زينة وبس. ربنا يهدي لكم الحال. أردفت بها سوسن ولكنها تعلم أن صلاح قد دمر حياته ودعس على قلب رفيقتها دون رحمة أو شفقة. بعد قليل سمعوا طرقات خفيفة على الباب فذهبت سوسن لتفتح الباب ووجدت حمادة قد أحضر الطبيبة. دلفت الطبيبة مع سوسن إلى الداخل وخرج صلاح وندى إلى أن تنهي الطبيبة الكشف الطبي عليها، حاولت افاقتها ولكنها رأت عدم استجابة من زينة فسألت سوسن عما حدث فأخبرتها سوسن باقتضاب: مشكلة بينها وبين جوزها بس كبيرة شوية. أومأت الطبيبة رأسها بتفهم وحاولت مرة أخرى افاقتها واستعادت زينة وعيها ولكنها كانت منهارة مما اضطر الطبيبة إلى أن تعطيها حقنة مهدئة لتعود زينة إلى الصمت مرة أخرى تسقط في دوامة مظلمة من جديد لا تعلم كم ستمكث في هذا الظلام. وقف صلاح يقطع الردهة ذهابًا وإيابًا والقلق ينهش قلبه تحت نظرات شقيقه الحزينة على حالتهم إلى أن تلاقت الأعين في عتاب بينهم ليتحدث صلاح بعدها بعتاب ولوم: استفدت إيه لما هي عرفت، طول عمرك مندفع ومستهتر ومبتحسبش الأمور بالعقل، فيها إيه لو كنت جيت لي وسألتني بيني وبينك؟، صدقني لو حصلها حاجة بسببك أنا مش هسامحك يا حمادة والله العظيم ما هسامحك. تحدث حمادة باستهزاء: تصدق أنك بجح مش هتسامح مين فوق يا حبيبي أنت اللي دبحتها، وجاي تلبسني أنا الليلة دي طيب بذمتك شوفت بجاحة أكتر من كده. ثم أكمل حديثه بتهديد: صدقني يا ابن أبويا البت الغلبانة دي لو جرالها حاجة أنا اللي مش هسامحك لا أنت ولا الست والدتك. اقترب منه صلاح ممسكًا به من تلابيبه هادرًا: اتظبط ياض هو أنت هتخاف على مراتي أكتر مني ولا إيه، فوق أحسن ما أفوقك. نفض حمادة يده من عليه كمن ينفض شيء ملوث يخشى أن يلوثه وهتف: ايوا هخاف عليها أكتر منك لأنها اختي زي ندى ترضى حد يعمل في اختنا كده، وبعدين أنت قولت أني متهور ومتسرع لكن الحمد لله مش خاين يا.. يا أخويا يا كبير. خرجت الطبيبة لهم فتحدث صلاح بقلق: خير يا دكتورة زينة مالها. أجابته بهدوء: واضح أنها تعرضت لصدمة عنيفة مقدرتش تتحملها، هي دلوقتي واخدة حقنة مهدئة هتساعدها تنام شوية، وجاولوا لما تصحى تبعدوها عن أي توتر. اصطحب حمادة الطبيبة للخارج بينما صلاح دلف إلى الغرفة فاستأذنت سوسن وخرجت لتتركه معها يجلس بجوارها على الفراش ممسكًا كفها بكفه ورفعه إلى ثغره يلثمه بألم: أنا آسف، صدقيني غصب عني.. حتى لو اتجوزت تاني الجوازة دي عشان أرضي أمي لكن محدش هيسكن قلبي غيرك، التانية هتكون مجرد وعاء لطفل يجي يشيل اسمي واسم ابويا. قاطعه حمادة وهو يقف بالخارج ليحثه على الخروج قائلًا: اسم الله على اسمك أنت وأبوك بذمتك أنت مقتنع باللي بتقوله، طيب لو كان العيب منك كنت هتقبل أنها تنفصل عنك عشان تتجوز راجل تاني تخلف منه، يا صلاح اتقي الله في مراتك واتكلم معاها لما تفوق. ثم اقترب منه وربت على كتفه بمشاعر أخوية صادقة: يا حبيبي حقك تتجوز مرة تانية وتخلف، لكن مش من حقك تغدر بمراتك وتعمل كل دا من وراها، مش من حقك تكسرها. نظر له صلاح بحيرة: أكسرها؟، لما أكون عاوز أبقى أب دا يكسرها؟، لما أتجوز تاني على سنة الله ورسوله والشرع محلل لي كدا وهي هتفضل معززة مكرمة في قلبي وحياتي أبقى كده بكسرها؟. ايوا بتكسرها ومش بس كده دا أنت كده بتجرحها بتصرفك دا، وبتحرمها من أبسط حقوقها أنها تعرف وتختار تكمل معاك أو لأ. نظر صلاح إليه والغضب يتطاير من عينيه: يعني إيه تختار، زينة ملهاش تختار غيري أنا، وبعدين أنت ازاي واثق أنها ممكن تسيبني؟. رد شقيقه عليه بشفقة: زي ما أنت كنت واثق أنك لو قولت لها على جوازتك الثانية كانت هتسيبك، اومال تقدر تقولي انت خبيت عليها وعلينا ليه؟. وكأن حديث حمادة كان صفعة مدوية على وجه صلاح فلقد عراه أمام نفسه وكشف حقيقته التي هو بنفسه يهرب منها ويخشى مواجهتها. ربت حمادة على كتف شقيقه: ادخل شوف مراتك وأنا هنزل أشوف الدنيا تحت ولما تفوق كلمني أطلع لك أتكلم معاها وأحاول أصلح اللي أنت نيلته. أومأ صلاح برأسه ودلف إلى غرفتهم مرة أخرى ليجلس بجوار تلك النائمة بفضل المهدئات. ظل يراقب نومتها يتأمل ملامحها إلى أن انكمشت ملامحه عندما رأي دموعها تسيل بهدوء على وجنتها. اقترب منها وجفف دموعها بأنامله برقة، وظل يتأملها إلى أنه غفا وهو متكئ على ذراعه بجوارها كأنه فضل الاستسلام للنوم والهروب من الواقع. بعد عدة ساعات بدأت تستيقظ بهدوء لتفتح عينيها لتجده أمامها قد نائم، ظلت تتأمله لعدة دقائق متذكرة ما حدث في الصباح. تسللت من جواره بهدوء كي لا توقظه وأبدلت ثيابها، وجمعت بعض من ملابسها وأغراضها في حقيبة صغيرة ثم توجهت إلى باب الشقة لتغادر بهدوء مغاير للعاصفة التي تطيح بقلبها. هبطت الدرج أثناء دخول حمادة إلى المنزل ليقف مكانه يراقب نزولها إلى أن رأته وتجمدت مكانها تخشى ان يمنعها فوقفت صامتة لبرهة والدموع حبيسة مقلتيها ليردف هو: رايحة فين يا زينة استهدي بالله؟. لتجيبه بانكسار ورجاء: حمادة أنت طول عمرك بتقول أني زي أختك لو سمحت سيبني أمشي من هنا بهدوء. هو الأستاذ اللي فوق دا سابك تمشي كده بالبساطة دي؟. قالها حمادة وهو ينظر إلى الدرج فوقهم. أجابته بتهكم: لأ الأستاذ نايم بلاش تقلقه دا عريس جديد سيبه يرتاح شوية. كادت أن تتخطاه لتخرج ولكنه استوقفها: استني يا زينة واهدي بلاش تمشي خليكي وحلي المشكلة بينك وبين جوزك في بيتكم. كانت محاولة اخيرة من حمادة محاولة بائسة، ولكنها أبت أن تنتظر في هذا المنزل دقيقة واحدة بعد ذلك وقالت: خلاص يا حمادة مبقاش ينفع أخوك جاب ضُلفها بدري بدري. التفتت لتغادر ولكنه أردف: استني يا زينة أنا هوصلك ما هو أنا مينفعش أسيب أختي تروح بيتها لواحدها كده. وحمل منها حقيبتها ووضعها بالسيارة جلست في المقعد الأمامي بجواره لينطلق بسيارته إلى منزلها الواقع في الشارع الخلفي لهم. دقائق قليلة وصلا فيها إلى وجهتهم لتترجل من السيارة تشكره وهو يعطيها حقيبتها ليجيبها: لا شكر على واجب، انا وصلتك للبيت اعتبريها اجازة قليلة من أخويا عشان تهدي وترجعي تنوري بيتك من تاني. أومأت برأسها ودخلت إلى منزلها، وقف يتابع اختفاء اثرها بهدوء ثم غادر لمنزله من جديد. استيقظ صلاح لم يجدها في فراشها ظن أنها في الحمام بحث عنها ولم يجدها في المنزل بأكمله فأسرع يهبط الدرج وهو ينادي باسمها كالمجنون في نفس اللحظة التي دلف بها حمادة وسمع صوت شقيقه ينادي باسمها. وصلا الاثنان إلى باب شقة والدتهم فأردف حمادة ببرود: زينة مش هنا يا صلاح رجعت بيت أهلها، أنا بنفسي اللي وصلتها ولسه واصل وأنت بتنادي عليها. قطع صلاح المسافة التي كانت بينهم في خطوة واحدة ليجذبه من تلابيبه يسحبه نحوه بقوة وغضب شديد لتلتقي أعينهما بنظرات متباينة ما بين نظرات تشتعل بالغضب، ونظرات أخرى باردة متحدية للجميع. هتف صلاح بصوت جهوري اهتز على أثره أركان المنزل كله: أنت إيه... مش ممكن تكون أخويا اللي أنا مربيه على إيدي دا أنت لو عدوي مش هتعمل فيا كده ليه بتعمل معايا كده يا حمادة... ليه أنا بحاول ألاقي مبرر واحد لتصرفاتك الغبية دي معايا تخليني أسامحك، لكن حقيقي مش لاقي لك مبرر واحد يغفر لك غلطاتك دي كلها. خرج على صياحه في أخيه الجميع بذعر ما الذي يحدث بالخارج ليتجمد الجميع لهذا المشهد. هتفت وجيدة بصوت مرتفع والغضب قد بات جلي على ملامحها: إيه يا ولاد محرم خلاص مبقاش ليكم كبير يلمكم ماسكين في بعض وعلى السلم وصوتكم عالي، خلاص بقيتوا بلطجية يا معلمين السوق. نظر حمادة إليها نظرة جانبية وهو يبتسم بتهكم لحديثها ثم عاد بنظره إلى شقيقه ينظر إليه ليتحدث بهدوء حذر ينذر بقدوم عاصفة ستعصف بعلاقة الشقيقين وهو ينفض يديه بقوة محررًا نفسه من قبضته: اللي بعمله دا بعمله لأني أخوك وتربية ايدك، تربيتي متسمحليش أشوف أخويا الكبير بيغلط وهيخرب بيته باديه وأقف أتفرج عليه، مش هي دي تربيتك يا أخويا. صاحت وجيدة فيهما بحدة: اتفضلوا يا بهوات ادخلوا نتكلم جوا البيت بدل ما الحارة هتتلم على صوتكم ونبقى فرجة للي يسوا واللي ميسواش. ودلفت إلى الداخل يتبعها الجميع لتقف في منتصف الصالة تحاول السيطرة على غضبها لتنظر إلى حمادة ولا زال صوتها يقطر منه غضبها: أنت مالك بتتدخل في حياة أخوك ليه يتجوز ولا يطلق ولو اتجوز اربعة أنت مالك؟، دا بدل ما تدعم اخوك وتقف معاه بتزودها عليه. كفاية ظلم يا أمي إحنا عندنا بنات. أردف بجملته تلك ليكمل بعدها: أنا مش ضد أنه يتجوز مرة تانية لكن مش بالطريقة دي، أبسط حق من حقوق زينة البنت اللي ما شوفناش منها إلا كل خير أنه كان يصارحها ويحتويها وبعدين يروح يتقدم لبنات الناس، ليه يغدر بها ويخونها بالطريقة دي؟. قال صلاح بعصبية ووجه متجهم: وأنت مالك أنا حر في مراتي أقول لها أو لأ دي حاجة خاصة بينا ازاي تسمح لنفسك تتدخل بالطريقة دي؟، وبعدين ارتحت دلوقتي لما سابت البيت بسببك؟. اقترب حمادة منه وهو يصفق بيده: إيه البجاحة اللي أنت فيها دي يا صلاح بتقلب الطرابيزة عليا لأ برافو برافو بجد. أكمل بحدة: مراتك مشيت بسببك يا عريس... إيه كنت متوقع رد فعلها هيكون إيه غير كده، لأول مرة تطلع غبي يا صلاح لأول مرة تحسبها غلط. لم تشعر وجيدة بنفسها ولا بردة فعلها إلى وهي تجذب حمادة من كتفه لتجبره على الالتفات إليها لتدوي بعدها صفعة قوية على وجهه.