رواية سراديب العشاق الجزء الأول

ربتت عائشة على يد وجيدة التي كانت لا تزال على كتفها بابتسامتها اللطيفة: حبيبتي ربنا يقويكي، لكن ما شاء الله صلاح وحمادة كبروا ارتاحي بقى يا وجيدة وسيبيهم هما يدوروا الشغل بكفياكي شيل الهم يا وجيدة.

أرادت وجيدة أن تستغل الفرصة بعدما رأت سمية وسوسن: الا قولي لي يا عيشة بناتك مخطوبة ولا لسه؟.

نظرت عائشة تجاه بناتها اللاتي اندمجن بالحديث مع زينة وندى ثم التفتت إلى وجيدة: لا يا وجيدة لسه وكده كده الحاج حسنين مش مستعجل على جوازهم أوي بيقول إن الاتنين لسه صغيرين.

رفعت وجيدة حاجبها باستنكار: ولا صغيرين ولا حاجة ما احنا اتجوزنا واحنا اصغر منهم يا عيشة ولا نسيتي

ضحكت عائشة على حديث وجيدة فهي تعي تمامًا أنها لا زالت تحتفظ بعادات وتقاليد باتت بالية ولا تصلح بهذه الأيام: ايوا ده كان زمان يا وجيدة خلاص الزمن اتغير، وزمنا غير زمنهم

تحدثت وجيدة بتهكم: الزمن واحد يا عيشة والبت مسيرها لبيتها وجوزها، نخلص بس من فرح البت زينب وبعدها اللي ربنا رايده هيكون

عائشة بعدم اكتراث لحديث صديقتها أردفت بسخرية: ونعم بالله، لكن ليه بتسألي إيه اشتغلتي خاطبة وأنا معرفش؟.

نظرت لها وجيدة نظرة جانبية فهي تعلم صديقتها وتدرك تمامًا أنها تسخر منها وأردفت: يمكن ليه لأ.

……………

عند الشباب في الحنة التف الجميع حول العريس ورقصوا على الأغاني الشعبية التي ترفع الادرينالين وحماسة الشباب وكان الجميع يشعر بالسعادة للعروسين.

كان حمادة يقف بجوار صلاح شقيقه فقال له: تصدق فكرة الحنة دي حلوة إن العريس والعروسة يعملوا حنتهم مع بعض في ليلة واحدة ومكان واحد دي فكرة حلوة أوي.

صلاح وهو يصفق على الحان إحدى الأغاني: فعلا فكرة حلوة إن رجالة العيلتين يتجمعوا مع بعض، وكمان حريم العيلتين مع بعض بتخلق جو من الألفة بين العيلتين وخصوصًا أن العريس مش هيعمل فرح وهياخد عروسته وهيسافر أنت عارف شغله بره مصر، عقبالك يا حبيبي وأنا أعملك ليلة أجمد من دي.

احتضن حمادة شقيقه بحب وقال: حبيبي يا أبو صلاح وأنا موافق همتك معايا بقى جوزوني بسرعة بقى.

ضربه صلاح على مؤخرة رأسه بخفة وهو يضحك على حديثه: هتموت وتتجوز عارفك انا.

مسد حمادة مؤخرة رأسه قائلًا: بصراحة الفرح حلو يا أخي وأخوك نفسه يدخل دنيا بقى حياة العُزاب دي مش جايبة همها، ثم أكمل بمشاكسة وهو يغمز له: تنكر أنك أسعد لحظات حياتك لما ترجع من الشغل هلكان وتلاقي زينة مستنياك.