اسفة انا لا ارفض الطلاق ج1

تذهب ساره ف اليوم التالى الى عملها وتطرق باب مكتب د.محسن
محسن: اتفضل
ساره: صباح الخير يا دكتور
محسن: اهلا دكتوره ساره المكتب نور
ساره: بوجودك يا دكتور انا مش هاخد من وقتك كتير
محسن: ياستى خدى اليوم بطوله ولا يهمك
ساره: ميرسى لذوقك انا ف الحقيقه عايزه اطلب منك طلب بس خجلانه اووى
محسن: ياخبر يادكتوره انتى تأمرى
ساره: انا اصلى كنت عايزه اخد اسبوعين اجازه فامعلش هتقل عليك شويه ياترى يناسبك
محسن: مش معقوله يادكتور بتستأذنى عشان تاخدى اجازه ده لو معندكيش رصيد خدى رصيدى تحت امرك والله
ساره: ربنا يخليك يادكتور انا كنت بس حابه اطمن انه يناسبك ومايكونش عندك ارتباطات او حاجه
محسن: انتى ادينى الاجازه وانا بنفسى هقدمها للعميد
ساره: لاء كتير يادكتو ميرسى لذوقك
محسن: العفو على ايه انا عملت حاجه انا كده كده باجى الشغل

انهت ساره اوراق اجازتها واخذت بالفعل اسبوعين وثلاتثه ايام تحسبا للظروف

اعدت العائله باكملها نفسها للسفر وذهبوا بالفعل ووصلو مارينا

يصل الجميع بسلامه الله للفيلا بمارينا ذات تصميم فريد يتميز بالخصوصيه المطلوبه لافراد العائله
محمد وطنط نوال وسعاد ف الطابق الارضى
وغرفه المعيشه وغرفه ساره وفرانده ف الطابق الثانى
اما الطابق الثالث والكبير به غرفه واحده واسعه لسلمى واحمد واولادهم
ويطل المطبخ على حديقه خلفيه واسعه
كان المكان يبعث على الراحه والاسترخاء وبعيدا نوعا ما عن الضوضاء التى تصاحب عاده المصايف

احمد: ها مرتاحين يا جماعه بجد كلكو عجبكو اوضكو

محمد: ماشى ياعم بعد ما اخدت الرويال سويت انت والمودام وسايبلنا بقيه الاوض نتعازم جى دلوقتى تقول مرتاحين

احمد: يا اخى حرام عليك ارحمنى شويه الى انت بتقول عليه الرويال سويت ده انا اخدته ورضيت يوميا اطلع وانزل باولادى من الدور التالت وبعدين انا وزعت الاماكن كده عشان ماما وطنط مش هيقدروا يطلعوا سلالم وساره تبقى براحتها بعيد عنك وغلاستك وانت كده كده الواحد ف المصيف بيشوفك قدرا كده طول النهار والليل بره

نوال: ااه ومابتجيش غير على النوم
اخوك معاه حق وبعدين كتر خيره حبيب قلبى مجمعنا
سعاد: ربنا يديم المعروف بينا وان شاء الله هيبقوا اسبوعين عسل
محمد: يلا على المطبخ يا سرسوره شوفيلنا هتعملى ايه النهارده ناكله من ايديكى الحلوين
ساره: انا مش هرد عليك
بجد انا مش هرد انا مش اخده 17 يوم من رصيد اجازاتى عشان احرق ف دمى معاك حد يرد فيكم على الكائن الغريب ده
احمد: انا اللى هرد احنا جايين نصيف يعنى ناخد اجازه يعنى اللى كان بيعمل حاجه ومواظب عليها هياخد اجازه منها اولنا ساره
بجد يا ساره مش عايز اشوفك ف المطبخ نهائى
ساره: لا مش للدرجادى يعنى انت عارف انها هوايه عندى مش واجب
سلمى بدلع: يعنى معنى كلامك ده ياحبيبى ان الرضاعه والتغيير للعيال والحاجات التانيه دى انا كمان اخد منها اجازه
احمد: ياسلام دا انتى ماصدقتى بأه ويهون عليكى حبايب قلبك
سلمى: لا طبعا مايهونش
محمد: قال يعنى انتى قايمه بكل حاجه لوحدك
سلمى: ماتدخلش من فضلك هما ولادى لوحدى ماهم احفاد مامتك ومامتى وولاد اخت ساره وولاد اخوك ولا كانو ولاد الجيران واذا كان عليك وفر المجهود الجبار اللى بتعمله
سعاد: جرى ايه ياسلمى محمد بيهزر معاكى مش كده احنا مش جايين نتناقر
نوال: اه وعشان خاطرى يامحمد خف شويه من مناقرتك دى وخصوصا ف ساره
محمد: ساره
دى ساره اللى فيكو
هيا فهمانى كويس ومن القلب للقلب رسول ماحدش يتدخل
ساره: اطمنى عليا ياطنط انا اعرف اخد حقى منه كويس
محمد: ااه يعنى اطلعى منها
ساره: لاء طبعا طنط على راسى من فوق وكلمتها تمشى على الكل
نوال: حبيبه قلبى
محمد: ااه باينلها قلبت كده بالحزب الاطلسى ااقوم انا استطلع المكان تيجى معايا ياساره
ساره: لاء انا هفك الشنط ونطمن على الولاد
احمد: وانا هروح معاك اشوف نجيب ايه للغدا النهارده
نوال: يلا بينا ياسعاد نرتاح انا وانتى شويه انا ركبى من السكه تعابانى اوى
ساره : سلامتك ياطنط اجيبلك مسكن
نوال: تسلمى ياحبيبتى انا هرتاح شويه