رواية روعة روعة ج2

_امال ايه اللى حصل؟

هزت راوية كتفيها تجيبها بحزن:

_كانت عيانة من الاول، جلبها كان ضعيف والدكتور منعها من الحمل لكن مسمعتش الكلام وحملت وبعد ما ولدت تعبت وفضلت راجدة فى فرشتها سنتين وبعدها راحت عند اللى خلجها

تراجع رأسها للخلف بصدمة وهى تسألها بحزن:

_واللى فى بطنها؟

التمعت الدموع بعيني راوية وهي تمل بألم:

_تمارا بته الوحيدة واللى طلع بيها من الدنيا وستر ربنا انها چات سليمة بس هي مجدرتش تراعيها او تلعب معاها حتى انما اللى كبرتها هى ستها ام يونس واهى البنت اتيتمت بدري ومرته سايباه ارمل ومعاه بنت صغيرة وهو لسة مكملش التلاتين

نظرت لها بحزن وقد انفطر قلبها بالالم على هذا الرجل لتسالها بعدها بوجع عليه وعلى هذه الدنيا الظالمة لشاب مثله:

_وبعدين؟

هزت راوية كتفيها تجيبه بقلة حيلة:

_ولا جبلين، زى ما انتِ شايفة دفن نفسه وشبابه ورافض يتچوز بعدها، ووچع فراجها تعبه ومع ذلك مابيحاولش يبين وواجف فى ضهر ابوه

ثم اكملت باستحسان:

_واد راچل من ضهر راچل ما چابتوش ولادة

رمشت بعينيها تستمع لحديث جدتها والتى اكملت بفخر:

_مابيسيبش حد محتاچ مساعدة واصل، دايما كان ييچى يطل عليا لاكون محتاچة حاچة ويوصى الرجالة يچيبولى طلباتى، ويوم ما نبجى بنحمل محصول يجف مع ابوك او يبعت حد يجف معاه

صمتت تكمل بابتسامة:

_وكمان عُدى ولد عمه محفوظ، واد سبحان الله جمر مايتخيرش عنيه بس جاعد اغلب الوجت فى مصر علشان شغله بس لما بياچى اهنه بيكون احترام وادب واخلاج والكل بيحبه

حولت انظارها لها لتقول بحنان:

_هما دول الرچالة يا بتى اللى نآمن على بناتنا وروحنا معاهم، رچالة لو موتنا نعرف اننا سيبنا ورانا ضهر وسند يحمى عيالنا، رچالة نهار منچوز بناتنا ليهم يبجى بنضيف لنفسنا اننا بنچيب ابن يراعينا ويراعى بنتنا

اومات براسها بتعب لتربت جدتها على كتفها قائلة بحنان:

_ربنا يهديلك نفسك يا بتى

ــــــــــــــــــــــــــــــــــــــــــــــــــــــــــــ

تحرك للدخول للمنزل الضخم الخاص به وبشقيقه وهو يفتح ازرار قميصه ويتنهد براحة حينما لمح تلك التي تركض جهته وهي تمسك يدهاو قائلة من بين شهقاتها المتقطعة:

_بتي، عملت ايه فى بتى يا عبد السلام؟

سحب عبد السلام يده من يد زوجة شقيقه وهو يجيبها ببرود:

_اطمني يا مرت اخوي، بتك لسة عايشة وفي الحفظ والصون، انى مجتلتهاش