كيف اعيش معك ج4
الحلقه السادسه و العشرون ♥
اشرق الصباح ببطء على العروس المنتظر .. تسلل شعاع شمس داخل غرفتها .. تمللت فى فراشها .. احست بباب حجرتها يفتح بهدوء شديد .. ظلت مغمضه العينين لتكشف ما يحدث .. شخصين داخل حجرتها .. يقتربان بهدوء نحو فراشها .. سمعت “شششش” .. احدهما يشير بالصمت للاخر .. مرت ثوانى معدوده .. وضع يده بهدوء يلمس شعرها ! .. فتحت عيناها بسرعه .. شهقت بصدمه .. ” خالو ! ”
لم تعرف لمار كم مر عليها من الوقت وهى بداخل حضن خالها .. سيطرت عليها احاسيس متناقضه .. فرحه .. حزن .. امان و خوف ..
ابعدها خالها بهدوء مبتسما قبلها على جبينها ثم قال : ايه يا لم لم وحشتك اوى كده ؟
ابتسمت لمار ابتسامه واسعه وقالت : وحشتنى لم لم كمان
ربت على كتفها : خلاص ياحبيبتى مش هسيبك لوحدك تانى و حقك هيجيلك لحد عندك
وقف عمر متابعا للموقف باعين صامته وقلب منفجر بالمشاعر المختلفه .. فرح كثيرا لفرحه لمار .. ولكنه خاف كثيرا ايضا ان ترجع فى كلمتها له .. طمأن نفسه بوعد خالها بموافقته على زواجهما .. احس بالغيره الشديده منه .. اراد ان تشعر لمار بهذه الفرحه معه هو وفى احضانه وتكون له وحده .. سرعان ما نفض عنه افكاره وافاق من شروده على صوت الخال ..
الخال : ايه يا عمر ساكت ليه ؟
عمر مبتسما : بتفرج على اللحظه العاطفيه دى
رد الخال ضاحكا : معلش ياسيدى هاخدها منك شويه بس اهى هتبقى معاك طول العمر
ارتجفت لمار عند سماعها لهذه الجمله ترددت فى اذنها ” طول العمر ” .. ماذا فعل عمر لخالها جعله يثق به بهذه السرعه !
انتبهت لخالها قائلا : يلا يا عروسه قومى افطرى عشان يومك طويل انهارده
لمار بسرعه : احنا هنعمل كتب الكتاب انهارده مش قولنا بكره
قالت جملتها الاخيره ونظرت لعمر
أومأ عمر برأسه قائلا : اه بكره
قاطعه الخال : ان شاء الله هنبقى بكره عشان ساره و ولاء يحضروا معانا
لمار بفرحه : ساره و ولاء اخيرا هينزلوا مصر
الخال بابتسامه : اه يا حبيبتى وكمان عبد الله وام عبد الله
لمار : وطنط كمان هتيجى ؟
الخال : اكيد هو احنا عندنا كام لم لم يعنى وبعدين بطلى كلام بقى وقومى عشان تاكلى
لمار : وانت يا خالو مش هتاكل معايا ؟
الخال : انا جيت من ساعتين والداده وام أسر صمموا افطر لحد ما نسيبك تصحى براحتك وقاعدين يشرحولى ازاى وشك يبقى رايق عشان المكياج والحاجات الغريبه بتاعتكوا دى يا عروسه
